السبت، 1 أغسطس 2009

ياتجيبلي الشوكولاتة يابلاش ياولا


باااااااااااااس كفاية بقى ارحموني
ده انا لسه نغة ويدوب لسه مكملة 21 سنة من تمناشر شهر كده انا لحقت ... ارحمونى بقى كل شوية مش هتتجوزي مش هتتجوزي اروح اخطف واحد يعني خدنا ايه من الرجالة غير حلاقة الدقن والتسبيل
أه انا فعلا لما حد بيتقدملي يبيقى دهل كده وبصريح العبارة كده بيبقى ليهم مواسم. بيقولوا دايما ان اى بنت ليها فترة كده وأنا الموسم بتاعي كان من سنة كده.... تلاقى في الموسم بقى ماسورة عرسان ضربت فى المكان وفجأة ما تلاقيش كلب حتى يعبرك... يلا ماعلينا

المهم ان كلام الناس عملى ازمة نفسية جامدة زى ما اكون هجوز نفسي ولا اروح اخطب واحد وللاسف الازمة دي خلتني افكر بطريقة مختلفة خااااالص
فكرت في كل حاجة ممكن توقعني في عريس كده فكرت ألبس ضيق قوي و مشخلع كده ولا أكني في فيديو كليب أو ألبس بنكلون سكيني ولا سكركش وأخرج أدلع في أي نادي أو أشتغل حتى مع فرقة علشان كل يوم أروح فرح المهم اتجوز وقلت اروح كل افراح الناس اللى اعرفها واللى معرفهاش يمكن حد يمشي ورايا ولو محدش مشي اهوه يبقى خدتلى حتة جاتوه وخلاص وأخيرا لقيت ماما قاعدة كده مش على بعضها وعمالة تقدم خطوة ورا وخطوة قدام.
ماما: شوكولاته حبيبتي طنط عنايات جايبالك عريس لقطة بس إيه يابت شكله من نصيبك وهاييجي يزورنا بكرة.
شوكولاته: (قشطة) عريس ... عريس إيه بس ياماما مانتي عارفة أنا مابفكرش في الحاجات دي خااااااااالث (وطبعا أنا قلبي بيرفرف في السما السابعة دلوقتي وعمالة أفكر في الجرابيع اللي بيقولولي أنتي هتعنسي وفي أعضاء حزب المفلسعين من على السلالم واللي كانو بيقلقوا من عتبة بيتنا تكونش عتبة نايلو ومحدش هيعرف يعدي عليها)
ماما: يوه ... يوكسك ياموكوسة ماتفكريش فى ايه يا بت اخلصى ياللا ساعديني عشان ننضف البيت وبعد كده نقعد نرتب مع أبوكي إحنا هنقول إيه للعريس
شوكولاته: طالما فيها تنضيف طب مانقابله بره أحسن
ماما: ماتقرفنيش بقى إنتي شكلك هاتعنسي بجد شالله عنك مااتنيلتي خلاص نتصل بالناس نقولهم إحنا مش موافقين وخلاص مش كفايه إنك ماشية بمعدل بطئ قوي
شوكولاته: (حتى أنت يابروتوس) حاسبي بس على نفسك ياماما أنتي صاحبة مرض خلاص هانضف معاكي (قال نتصل بيه قال ده أنا كنت أولع في البيت هوه حد لاقي عريس اليومين دول .... قطيعة محدش بياكلها بالساهل )
الساعة دلوقتي 5 العصر أمي جابتني من دماغي ودخلتني الحمام وقالتلي لازم تتليفي كويس علشان نخلص بقى
شوكولاته: نعم هوه المحروس هايتشدد من أولها كده وبعدين مانا حلوه أهوه ولسه مستحمية من ساعة آخر عريس شرف حدانا أنا صحيح مش عارفة كان إمتى الكلام ده بس أنا متهيألى إنى استحميت ساعتها (ماحبيتش أطول في الكلام علشان ماما ماتتهورش)
الساعة دلوقتي 6 المغرب يامسهل يارب
جربت كل اللبس اللي عندي واخترت الحتة اللي ع الحبل اللي ممكن توقعه في دباديبي
الساعة 9 ونص تيرن تررن تررن
شوكولاته: أنا هنا هنا ياابن الحلاااااااااال لا عايزة جاه ولا كتر مال
ماما: ياللا يابت ادخلى أوضتك العريس جه
شوكولاته: (ياحلولي) انا مش هقابله يا ماما اتكسف خالث مالث
ثانية وكنت بسبق ماما على الصالون وواقفة قدام المحروس وعمالة اتفرج عليه ولا اللي أكون بتفرج على جون مصر في نهائي كاس العالم
حمايا: نتكلم بقى في التفاصيل أنتو عايزين شبكة بكام
بابا: عيب ياريس الكلام ده احنا بنشتري راجل
حمايا: خلاص يا حج وإحنا كمان شاريين إحنا هانجيبلها طقم السوليتير اللي تشاور عليه موافقة ياعروسة
شوكولاته: ماتكلفوش نفسكم ياعمي (قشطة علشان أعرف أتأنعر براحتي ع العيال ولاد اللذينة المعنسين صحابي دول)
بابا: والشقة تكون هنا جنبنا كده أيجار او تمليك على قد ماتقدر يابني
حماتي: لأ ده جيمي عنده فيلا في الزمالك جنب شغله كده
بابا: طب والمؤخر هايكو......
المحروس: لأ ياعمي ماتقلقش أنا هامضيلكم على شيك على بيا.....
شوكولاته: لولولولولولولوللولولولولووووووووووووووووووى ........ ألف مبروك علينا ياللا نقرا الفاتحة ولو مش حافظينها خلاص دي شكليات والفرح يوم الخميس الجاي إن شاء الله


يوم الجمعة بقى

شوكولاته: ياه وأخيرا اتجوزت وماعدش ناقصني حاجة محدش له كلمة عليا ولاحد له عندي حاجة

وعلشان طبعا سعادتكم دلوقتي مزبهلين أدي صورتى لما السعد جانى



شوفتونى وسط صحباتى
ملحوظة أنا المتعوسة الأولانية على اليمين




وآدي صور الألبوم



يعني بعقلكو كده هوه فيه عريس في مصر يقدر ع الطلبات دي إلا جيمي











هناك 35 تعليقًا:

ديالا يقول...

ايه ده بقي هو الكلام ده كان علي جيمي بتاعنا

وربنا انتي غلبانه سوليتير ايه وفيلا ايه الي بتكلمي عليها ياحبيبتي

يابنتي ده اقل حاجه يجبلها محافظتين كده ويكتبهم باسمها ماهيا ان شاء هتبقي سيده صر الاولي وتقوليلي فيلا وربنا انتي غلبانه


وبعدين مين دي يااختي الي تعنس خديجه

ههههههههه


ياحبيبتي يسعدني اني اقولك انك مش عارفه حاجه خالص

والسلام ختام

الشعب لابد له من حكومه تشكمه يقول...

يلبنتى هى دىطلبات دى البنت المعفنه اللى على اول شارعنا جالها اكتر من كده:)
انتى طيبه جداااااااااااااا....
ال هتعنس ال..لما هى تعنس احنا ايه هنتخلل:))

مي يقول...

اكيد ده اللى عنده مصانع الشيكولاته كلها !!!
وخديجة دى مين بقى ان شاء الله؟ طب ده كان كونتا قاعد هنا واخته كنتى قاعدة هناك وانا على صرخة واحدة مخدوووش يابابا مخدووووووووش يابابا
بلاش اكل شيكولاتة كتير لحسن شكلنا كده قريب هناكل عيش وحلاوة
هههههههههه
بحبك يا شيكولاتى باى باى

ستيتة يقول...

وصلت بيكي المواصيل تجيبي سيرة الحاج جيمي بركة البيت
ده حتى متجوز ست مفيش فيها شيء اسلامي الا اسمها
خديجة
طب بذمتك بصفتها مزة مصر الأولى مش كان مفروض يسميها كده اسم شيك
قولي سراج عباس محسن
قال هيثم قال

ايه ده هو انا وانت خلصنا علبة الشيكولاتة كلها وسكرنا
يا داهية دقي

سامحنا يا جيمي جهلة منعرفش
حييييييييييييييييي

كائن الإبداع .... محمد يقول...

لأ أنا هروح أجيب الشوكولاته معايا لحسن أتحبس هنا


ما كنتش أعرف ان هنا المقر الرسمي لعاشقي الشوكولا



المهم


لسه نغة ازاي و انتي خلصتي الشوكولا اللي في البلد كلها ، في الحالة دي يا ريت ما تكبريش أبداً

من ناحية خدتوا ايه من الرجالة فانتم خدتوا كتير ، خدتوا من الحياة راحة البال ، و وجع دماغنا بالعيال ، و الجيب نضفتوه من الأموال ، ده انتوا يا شيخة خلصتوا الدنيا من الممكن و خليتوها كلها محال ، ده انتوا خلتوا الشوكولاته يبقى إزاي الراجل هيحلم بالخيال .

ما لكيش بالناس دعوة ، خليهم كده يقولوا و يزيدوا .



الحذر الحذر الحذر


كل الشوكولا و لا تاكل الجذر

كائن الإبداع .... محمد يقول...

* خلصتوا

كائن الإبداع .... محمد يقول...

http://www.ibtesama.com/vb/imgcache2/97010.gif




شفتي بقى انا بفهم ازاي

شوكولاتة يقول...

ديالا
قصدك إيه يادودي اهئ اهئ اهئ
قصدك إن اتضحك علينا نيهاااااااااا
يالهوي ده عاملي المؤخر ربع جنيه (شرعي يعني)
لألألأ أنا مش هاقعدله في البيت ولا دقيقية هاتولي المأون يطلقنيييييييي

شوكولاتة يقول...

ديالا
مبروك عليكي الفيرست كومنت ياحتة مارون جلاسية ياسكر إنتي

شوكولاتة يقول...

الشعب لابد له من حكومة تشكمه
أنا عارفة ياشيما جرى إيه لزينة شباب بلدنا اللي خا.. قصدي اللي حاميها إيه؟ كان واخد لكمية في عينه الشمال لما اتجوزها دي وحياتك ياحبيبتي إن البواب بتاعنا جنبها يبقى مارلين مورنووو
باي باي ياحبيبتي

شوكولاتة يقول...

مي
على يديييي
وبقولك ايه أنا فعلا حاسة إني بدأت أخرف ولما تجيلي في البتاعة اللي بيعلقو فيها الناس دي ده لو عرفتولي سكة يعني ابقي هاتيلي شوكولاتة وكرواسون أصلي مابحبش الحلاوة
ههههههههههه
بموت فيكي

شوكولاتة يقول...

ستيتة حسب الله الحمش
دستور ياسيادنا
والنبي يادكتورة ماأخدتش بالي
أصل أنا واخدة دور أنفلونزا خنازير كده مسخني ع الآخر ومخليني أخرف
هوه أنا اسمي ايه ملبس ..بسكوت ..ااه شكاليتة
اااتشوووو ااه
سلامو عليكو

شوكولاتة يقول...

كائن الإبداع ... محمد
ماتقلقش حبايبنا الحلوين عارفين إن إحنا شوكولاتة كده و كده يعني
ههههههههه
شكرا على الصورة
سلااااااام

غير معرف يقول...

ان كنت حاطه عينك على جيمي

اهو ادالك بمبه

دمك عثل خالث

بوست لذيذ زي الشكولاته

E73 يقول...

ااااااااااااااااااااه

حرام عليكم كدة

انا بمووووووووت في الشيكولاتة

ودي اساليب ملتوية للتعبير عن النفس

انكم تخلوني قاعدة نفسي آكل شيكولاتة ومش لاقية وااااااااااااااااااااء

انا هبلغ عنكم

وعن القالب اللذيذ قوي بكريمة الكراميل المنغمسة في صوص الشيكولاتة الغنية

شوكولاتة يقول...

فتاة من الصعيد
لأااا ماتفكرنيش ده احنا اللي رفضناه أصل طروفة المادية على قده خاااااالث ده يدوب مرتبه 120 بتاع في الشهر (أصلي مابعرفش أحسب الخمستاشر صفر دول يبقو كام) في الشهر بالحوافز والأوفر تايم.
أصله مش من مستوايا
هههههههههههههه
قصر الديل بقى هتقولي ايه بقى عنطظة

شوكولاتة يقول...

E73
إحنا مش عايزين نزعلك ياسكرة لأن أنا مافيش حد ييجي عندي ومايكلش شوكولاتة وكل مايبقى نفسك تاكلي شوكولاتة اتفضلي خدي زي مانتي عايزة كل الشوكولاتة اللي في المدونة كلها ماتغلاش عليكي بس والنبي سيبيلي واحدة.
هههههههههههه
نورتي المدونة ياست البنات الحلويين

رحلتنا في الحياة يقول...

ههه كنت خلاص قربت اصدق وهاحسد يامحظوظة انتى :D
وبعدين يطلع كله جيمى
ربنا يصلح الاحوال ياااااااااااارب

شوكولاتة يقول...

آيوشة
إحنا هنقر ولا إيه ده عينة بس من المرطرطين على الباب مانتي عارفة بقى من كتر خطابها بارت
ههههههههه
ربنا يصلح أحوالنا جميعا ونتاوى في بيوت المؤمنين كلنا في يوم واحد أنا وأنتي ومي وديالا وكل البنات الحلويين
سلام ياقمر
أموووووووووووووووووه

رنونة حكومة ميخو يقول...

ههههههههههههههههه
لا بجد عروسة حلوة وزى القمر شيكولاتاية
تتاكلى
تستاهلى احسن من جيمي بس جيمي مش يستاهلك
يا بنتى جيمي ايه ده اللى تتجوزيه
خليه يفرح بفلوسه اللى عمال يلمها دي يبقى ياخدها فى قبره بقى

بس سيبك انتى
حلو اوى أسلوب البوست
وفعلا بتبقى مواسم للبنت شوية يهلوا عليها وبعدين مفيش خالص
واحدة صاحبتي والله قالتلى من كتر ما المدة طولت ومحدش بيتقدم نسيت انى بنت واني المفروض اتجوز...

يارت تكترى م المواضيع دى يا شيكولاتى
بحبها قوى
ونفسي فى شيكولاتة سنيكرز
باي بقه

شوكولاتة يقول...

رنونتي حبيبتي
تصدقي فكرتيني إني المفروض اتجوز ياه ده انا كنت ناسية خااااااالث ده حتى خالتك ام شوكولاتة نست.
هههههههه
وعلى فكرة مش هاديكي سنيكرز غير لكا تيجي تزوريني ومعاكي تلات سندوتشات كبدة من عند كريزي كنتاكي وبيبسي وشسيسي عائلي.
قشطة ياعسل

رنونة حكومة ميخو يقول...

هههههههههههههههههههههههههههههه
ده احنا دمنا كله بقى كبدة
شكلنا هنشتري كريزى كنتاكى قريب
هجبلك انتى 3 سندوتشات و انا 3 برده وكانزين بيبسي دايت
وشيبسي يا ستى
من عينيا
اه و نحبس بجاتوه و حاجة ساقعة تانى
وبعدين ناكل كوكتيل من عند بتاع العصير و نجيب لب ونروح بقى
عشان ما نبوظش الدايت

Unknown يقول...

Rannona
نسينا نجيب قشطة وإندومي بس نروح مشي بقى علشان نظبط الدايط
سلام طاني مرة

رنونة حكومة ميخو يقول...

ههههههههههههههههههههههههههههههههههههههههههههههههه
بس بس
اندومى فى الشارع
ده احنا ما نتوصفش
هتفضحينا

قشطة بحبه قوي يا رب الاقيه

رنونة حكومة ميخو يقول...

بلاش دايط وطاني ديه
ههههههههههههههههههههههههههههههههه
هموت منك

غير معرف يقول...

وانا اللى مندمجة وعينى بتسابق
السطور لغاية مالشكولاتة ساحت
وراحت ماطرح ماراحت
وبعدين تقولى جيمى
برضه ده اسمه كلام الله يسامحك ياشكولاتة
ياام دم شكولاتة

شوكولاتة يقول...

أم مالك
وانا اقول الشوكولاته دي جاية منين
ماله جيمي بكرة نغنيله اختارناه وبايعناه واحنا معاه لما شاء الله
ههههههه
شرفتيني بالزيارة الكريمة

طوبه فضه وطوبه دهب يقول...

bgd t7fa wdamk zy el 3sal ya amr moteny mn el da7k rbna ykhly lk gemy wytmm lk 3la kher bs anty aafshy baydk wsnank 3res ya amay

شوكولاتة يقول...

طوبة ذهب وطوبة فضة
ماتقلقيش ياأختي مكلبشة في رقبته وعمري ماهخليه يفلت من إيدي
بقولك إيه جيمي ليه اخ اسمه لولو هاه إيه رأيك اظبطهولك ده بتاع البزنس كله بقى
ههههههههه
شكرا جدا على كلامك الحلو كلك ذوق
نورتيني ياقمر

لبنــــــــــى يقول...

شوكولاتة
وين دلوني
لا يا عم طلع الموضوع مقلب

على كل اهلا بيكي و بوست عسل
بس لهلا وين الشوكولا ؟

شوكولاتة يقول...

Jafra
حاضر الشوكولاتة أهيه بس بلاش والنبي الكلاشينكوف بتاعك ده
هههههههههه
شوكولاتي كلها ماتغلاش عليكي ياقمر إنتي وكل اهلنا في فلسطين
وشكرا ليكي قوي على كلامك الحلو الرقيق ده
نورتي المدونة

ألـــــــوان الحيــــــــاة يقول...

يا شيخة انا قلت هالاقى عقدتك اتحلت وكلبشتى فى اللى مامته داعية عليه ومامتك داعياله

طلعتى كنتى نايمة بااااين


فوقى فوقى اصححى وهاتى الشيكولاتة اللى عليكى

سلاموز

شوكولاتة يقول...

Alwaan
هم ممم مين؟ إيه؟ إمتى؟ ليه؟ جيمي
ياااااااالهويييييييييي
كان حلم يعني إيه؟ مفيش جواز نيها نيهااااا
كنتي تسيبيني نايمة صحتيني ليه بس
شوكولاتة إيه بقى تعالي ياأختي نشرب فنجانين قهوة سادة ع الريق كده بلا هم
ههههههههههه
سلامين وحتة ياسكر

فشكووول يقول...

سكر والله يا سشكولاته

وشامم ريحة عسل كدا فيك

السلام عليكم شوكولاته الناته كوناته

انا قاعد اقرا بقى واقول ياربى ما كنتش اقابل البت السكر دى واتعرف عليها قبل العريس ما يخطفها ويجيب لها دبلة سولوتير والفيلا بتاع الزمالك ياربى البت دى محظوظه قوى

اتارينى الآخر لقيت العريس احول وعروسته حولاء ولايقين على بعض

عسل ... عسل ...

شوكولاتة يقول...

فشكووول
شفت ياعمو فشكول إيه اللي حصلي أخدت واحد أحول في الآخر والشبكة السوليتير طلعت فالصو والفيلا طلعت فشنك وطلعت من المولد بلا حمص اعااا نيهااااا
ضحك عليا ابن الريس (الريس متقال علشان حبايبنا اللي مراقبين البلوج ده)
نورت البلوج يارئيس جمهورية فشكولستان البلوجرية