الخميس، 17 ديسمبر، 2009

مبرووووووووووووووك ياحياة قلبي مبرووووووووووووووك






سالخييييير يا أهالي البلوجر الكرام وحشتوني جدا جدا جدا وشكرا جدا لكل الناس اللي سألوا عليا في غيابي بس زي ما أنتو عارفين الدنيا تلاهي بس مايبقاش فيه تلاهي لما البت توتا الأمورة صاحبة مدونة همسات على ضوء القمر تكلمني وتقولي إن خطوبتها يوم الخميس اللي هو النهاردة.



ألف مليون مبروك ياتوتا ياقمر وألف مبروك عليك يا أستاذ وليد الملاك ده وبجد توتا دي من أجمل الناس اللي عرفتهم في حياتي وبالرغم من إن أنا مشفتهاش قبل كده بس هي شخصية ذوق جدا وأول واحدة دايما تسأل عليا لما أغيب وتكلمني وأول واحدة تهنيني بكل مناسبة ودايما تفكرني بربنا وتبعتلي أدعية كتير خلي بالك منها وشيلها في عنيك يا أستاذ وليد لأنها بجد جوهرة عمرك ماهتلاقي زيها في الدنيا أبدا

والأغنية دي مخصوص علشانكم





كان نفسي أكون موجودة معاكي بس إن شاء الله في الفرح هكون جنبك وهاقرصك أكيد في ركبتك وعارفة إنك أكيد النهاردة هتبقي زي القمر





مش عارفة أقولك إيه بس إنتي عارفة أنا فرحانة إزاي ربنا يسعدك وبكل الخير يوعدك ويباركلك في خطيبك ويرزقكم كل السعادة والرضا ويكون طريقك للجنة ويتمملك بألف خير وتجيلي السنة الجاية وتقوليلي البت شوكولاتة بنتي مجنناني.



هقولك حاجة واحدة بس أخيرة كلما أرضيت الله في خطوبتك رضي الله عنك في زواجك





السبت، 21 نوفمبر، 2009

احتراق عاشق




انا احبك

ومالي لا أقولها
لا سوف اقولها حتى يجف لساني
ويصبح كالشوكة
في فمي
الذي مل النداء عليكي
وصدري الذي أحرقته آهات فراقك
وجفني الذي ذبل من كثرة بكائي عليك


حبيبي


لن أنساك وان طالت سنين فراقي عنك
ولن أنساك حتى اموت
ويسألني الملكين عن الهي
فأقول الهي الذي خلق حبيبي وخلق كل شئ
فهل ستراك عيني التي أبيضت من الحزن على فراقك
هل يجئ هذا اليوم
وتلقي بنفسك بين أحضاني التي طالما ضمتك
وكانت حصنا لحبك وهواك

ورأيت في عينيك عمري
فما مضى منه أيام لا اذكرها
ومابعدها ايام لن احياها
فكيف احياها وأنا قلبي معلق بروحك
وروحي ترثي فراقك عني


فكلها ايام واعود من حيث جئت
الى المجهول كما جئت من المجهول
الى ربي الذي احسن خلقتك
والذي جمعني بك يوما
والذي ابعدني عنك دوما


فكيف اكسر الزمن
الذي استلذ بفرقتنا
كيف اعيد الي صدري قلبي
وكيف اعيد الي جسدي روحي


فهل تعود


لتبكي على رحيلي قبل رؤياك
ملاكي الطاهر .. تأكد اني احببتك بحزن
حزن عارم استوطنني منذ ان عرفتك
ويخالطني لحظات الفرح حين احتضن طيفك كل مساء

فهل اعجبتك مرارة الفراق عني
وكيف تعجبك
وانت روحك معلقة بي
اني اراك دوما في خيالي
فهل صعدت روحك الى بارئها من شدة حزنك
على فراقي
ام ذهب عقلك ووصلت الى الجنون
من عشقي


فليس لي سوى الانتظار
ومع انتظاري سأذرف مابقى من دمي دموعا
حزنا على لحظة لم أقل لك فيها إني أحبك
ام سئمت من اشتياقي لك
ولوعتي عليك
اتجرع مرارة ايامي
واراك شيطانا يعبث بأحلامي
وجدني احبه فسقط في غيابات الحب معي
ولم يراني الا مرأة
كسرتها الاحزان

ولكني لن أمل من حبك


الخميس، 19 نوفمبر، 2009

آخر بوست ... وماتزعليش يامصر




عوووووودنا تاني بعد بوست التهييس اللي فات وأعدكم دائما بالمزيد ولا أقولكم بلاش المزيد علشان المرة اللي فاتت اتنشيت عين معتبرة جابتني الأرض وبقالي أسبوع عندي دور برد رهييييييييب والله رهيب ياللا بقى الله يسامح اللي كان السبب كنت شمعة منورة

ومعلش يامصر إننا مكسبناش الماتش بس هي الدنيا كده دوارة يوم لينا ويوم علينا وأهم حاجة في الرياضة الرووووح الرياضية.


يارب الفيفا يمنع الجزائر من المشاركة في كاس العالم ونصعد إحنا
يارب كل لعيبتهم بتدغدغوا قبل كاس العالم بأسبوع
يارب يقعوا في مجموعة البرازيل وفرنسا وإيطاليا والأرجنتين
يارب وسع مرماهم لملايين الأهداف
يارب اكسر نفسهم زي ماكسروا نفس 80 مليون غلبان
يارب يرجعوا من أول ماتش على بلدهم

مش بقولكم روح رياضية
نيهاهااااااااااااااااااا

عموما النهاردة أنا هاتكلم عن الجزء التالت والأخير من الأنماط التمثيلية لأن أكيد طبعا كلكم زهقتوا وعاوزين تعرفوا إيه هو أحسن نمط ؟ وإزاي نتعامل مع كل نمط بالطريقة اللي تحقق أكبر قدر من التواصل


أهم حاجة لازم نعرفها في بوست النهاردة إن مفيش نمط أحسن من نمط يعني كل نمط فيه ميزة وعيب معظم آرائكم أجمعت إن أفضل الأشخاص في المشاهد التلاتة كان المدير لأنه هو وكريم عرفوا يخلقوا لغة للتواصل مابينهم. ببساطة السبب إن الحوار بينهم نجح إن المدير عرف بالظبط يجمع بين التلات أنماط وعرف يتعامل من المنطلق ده مع كريم. يعني أحسن حاجة إننا نعرف نمزج بين التلات أنماط ونعرف نحدد نمط الشخص الآخر ونتعامل معاه من خلال نمطه شوية بشوية هتلاقوا الموضوع بينجح معاكم جدا

طيب إزاي نتعامل مع شخص نمطه مختلف عن نمطي ؟


لو بتتعامل مع شخص بصري حاول إنك تتكلم أسرع شوية لأن الشخص البصري مش بيبقى عاوز بنتظر وقت طويل علشان يعرف بقية الكلام وحاول تتكلم بصوت أعلى شوية أو بمعنى آخر خلي كلامك حيوي وله طاقة عالية وابعد تماما عن أي كلام عن المشاعر والأحاسيس واهتم أكتر بلغة الجسد لأن لغة الجسد بتجذب انتظار الشخص البصري جدا وبتخليه يركز معاك أكتر ودايما بص في عينه وهو بيكلمك ولازم تبعد الشخص البصري عن أي حاجة روتينية وابهره دايما بمفاجأت وأشياء جديدة واستخدم نفس لغة الشخص البصري يعني استخدم نفس الألفاظ اللي هو بيستخدمها لأن ده هيقربه منك جدا وهايحس إنك شبهه جدا وهيتعامل معاك من المبدأ ده.

التعامل مع الشخص السمعي بيكون أسهل شوية من التعامل مع الشخص البصري لأنه نمط شائع جدا. أهم حاجة في التعامل مع الشخص السمعي هي الاهتمام بالصوت يعني صوتك لازم يبقى معتدل جدا مش عالي ومش واطي يعني لازم تساعده إنه يسمعك كويس قوي لأن السمع بالنسبه له وسيلة الاتصال الوحيدة والأكثر فاعلية ونبرة صوتك لازم تتغير مع تغير مجرى الحديث يعني لو الموقف اشتد شوية ارفع صوتك والعكس صحيح. الشخص السمعي شخص عقلاني إلى حد ما كبير يعني لازم لما تتكلم مع شخص سمعي تراعي إنك ماتتسرعش في كلامك أو في قراراتك أو فهمك للموضوع لأن التسرع بيثير أعصابه جدا وبيخليه يخرج من دائرة الحوار. وحاول تستخدم معاه تعبيرات كلامية تقدر تأثر عليه وتقنعه بكلامك بصورة أفضل.

التعامل مع الشخص الحسي بيبقى أصعب شوية لأنه شخص قليل الكلام بطبيعته علشان كده بيبقى صعب شوية إنك تفتح حديث معاه. بس أهم حاجة في الشخص الحسي الهدوء يعني ابعد تماما عن الصوت العالي لأنه أكتر حاجة بتخرجه من حالة الاهتمام بموضوعك لكن الصوت المنخفض يجذب انتباهه بصورة أكبر أسهل وسيلة للوصول إليه وإقناعه هي اللعب على وتيرة أعصابه حاول تقنعه أكتر بمجموعة من الصور العاطفية والأحاديث الودية لأنها بتحسسه إن فيه حد بيشاركه إحساسه وهذا هو مايذيب الثلج بينه وبينك.

طيب لو حضرتك بتتكلم مجموعة ؟؟


المجموعة بتجمع بين مختلف أنماط البشر علشان كده لازم تخلط بين الأنماط دي وحاول تقرب أكتر من كل شخص باستخدام نمطه فالتحدث على طريقة الشخص البصري يجذب إليك أصحاب النمط البصري وهكذا



ملحوطة صغنونة كده : الموضوع ده كده خلص بس انا عاوزة أعرف رأيكم في بوستات التنمية البشرية دي لو عجبتكم أنا ممكن انزل منها أكتر وحاجات مفيدة أكتر




الاثنين، 9 نوفمبر، 2009

أنا عندي شعرة ساعة تروح ويوم تيجي .. راحت





حبايبي سكان دولة بلوجرستان التهيسية التخريفية الهزلية المنخوليا المتحدة وحشتوني قوي قوي قوي بقيتوا بتوحشوني أكتر من الشوكولاتة أصلي اكتشفت إنكم ألذ من الشوكولاتة ياللا بقى بمناسبة البق الحلو ده كل واحد يقب بالشوكولاتاية أحسن أثبتكم هنا وأدفعكم رهن وأنتو داخلين
نيهااااااهاااااا

أنا قلت أجي أروقكم شوية وأكتب بوستي التهييسي الأول بناءا على حالتي دلوقتي وأرجع أشتغل لحسن أنا قربت أكلم نفسي من كتر الشغل ووجع الدماغ وما أدراكم ما التعامل مع طلبة الجامعات الخاصة يعني الواحد فيهم يبقى عيل وبر... ولا بلاش ويحسسك إنه اشتراك بفلوس أبوه وهما أصلا عيال ولاد تيييييييت ياللا ماعلينا لولا فلوسهم برضو كان زماني بلعب مع ابن أختي

نيجي بقى للموضوع أولا أنا هكمل موضوع الأنماط التمثيلية علشان خاطر عيونكم بس لما أميرة هانم صاحبة السمو الكوكوي تقولي تاج يبقى لازمن وحتمن ولابد أقبل منها التاج ده شكلها هاتدبسني في كوكوها المهجور ده وشكلها لسه عليها أقساط ماشي ياست أميرة هو أنا عندي كام أميرة حلوة وأمورة كده

نيجي بقا للتاج

اسمك؟

شوكولاتة بنت أم شوكولاتة وميخو سنيور

سنك؟

من غير فشر كده 15 سنة وماشية في الاتنين وعشرين عادي يعني بتحصل

اسم مدونتك؟

أحلى حاجة في الدنيا طبعا إنتو عارفينها الشكاليطة

مجال دراستك؟

أحب أهديكم أغنية الدنيا علمتني مرمطتني غلبتني فرمتني

هل فكرت في إغلاق مدونتك ؟ ولماذا؟

بالفوم المليان كده آآآآآآآآآآآآآآآآآآه ليه بقى إن شا الله تعدموني لو كنت أعرف أهيه وزة شيطان وإنتو عارفين بقى شيطان وقال للعبد آه

ايه رد فعله لو حد قل أدبه عليكي في المدونة؟

نعم يابيضة مين ده اللي يقدر يقل أدبه عليا ده
لأ بجد ولاهعبره لأنه مايستاهلش أصلا عادي يعني أهو صرصار وبيعبر عن إحساسه برضو ما كلنا مخاليق ربنا

أسوأ مدونة دخلتها؟

مدونة لواحد كده عاملي فيها أنور وجدي صاحب شعلة التنوير وهو أصلا مش واخد باله إنه محتاج يتعالج لامؤاخذة كده عبيييييييييييييييييييييييييييط

هيحصل إيه لإيميلك بعد ماتموت؟

أخص ماتفولهاش في وشي كده أنا كابسة على مراوحكم إشمعنى أنا ويوم ما أطق وأموت هاتلاقوا عفريتي شغالكم في الأزرق ده أنا مربياه على إيدي أحسن تربية

إديتي الباسورد بتاعك لحد قبل كده؟

نيفر

السفر بالنسبة لك إيه؟

روقااااااان وأنتخة وشوكولاتة

المود بتاعك إيه؟

متهيألي باين قوي من البوست
طار في الهوا شاشي وإنت متدراشي


بتعمل إيه في وقت فراغك؟

باكل شوكولاتة وأنا بتفرج على التلفزيون وانا مأنتخة على السرير


الأكلات المفضلة؟


السيمون فيميه والكافيار من عند زيزو بتاع الطعمية بيعملهم حلو قوي
وأهوه حاجة تسد الجوع وخلاص


الصفات التي أخدتها عن والدك؟

حب الشغل وإني أديله أكتر ما بيديني وما انتظرش منه كتير
الضحك والفرفشة
العصبية

الصفات التي اخدتها عن والدتك؟


أنا شبهها قوي
حب النجاح
الإعتماد على النفس
الجدعنة
الشوكولاتة

أكتر 6 حاجات بتحبهم؟

الشوكولاتة
الشغل
النوم
ماما وبابا وأخواتي
الكومبيوتر
والناس النقية


أكتر 6 حاجات بتكرههم؟

اللف والدوران
الغباء
تصريحات الحكومة
إسرائيل
الهمجية في التصرفات
الظلم

شخصيتك نوعها إيه؟


شبه كل الناس بس مش زي أي حد


لماذا دخلت عالم التدوين من الأساس؟

بالشلوت كنت قاعدة بشيت مع ميخو أخويا وقالي أعملك مدونة قلتله هي دي إيه علاقتها بالناسا

أهمية التعليقات بالنسبة لك؟

عزوة ... بحس إني برضي أكبر عدد من القراء



أحلى بوست كتبته مع ذكر السبب؟


اللي مايتسمى وده بوست لسه ماكتبتهوش وماينفعش اجاوب على السؤال ده غير لما أبطل كتابة وأموت هابقى أحكم
مش قلتلكم عفريتي هيكمل بعدي
نيهااااااااااهاااااااااااااا


أفضل مدونة قريتها؟


شوكولاتة :)
بس مقدرش أقول كل مدونة وفيها حاجة بتشدني وحاجة مابتعجبنيش

أهمية الإنترنت بالنسبة لك؟

من أسبوع كان مالهوش لازمة بس بعد شغلي الجديد لو قطعوا النت عني ساعة أموت مشلولة

إهداء التاج؟

ميخو حليب هارتي وينزل لرنونة بوست هي كمان ترد فيه
دكتورتي ستوتة
أم مالك وشوكولاتة
دكتورة مروة الصعيدية روح قلبي
توتا همسات على ضوء القمر
شوشو البينكي بتاعت الأحلام الوردي
شيمو الشعب حبيبي وشرياني
دموع القمر اللي شبه القمر
ليدي النونو
أم سومة اليابانية سومو سومو
المنصورية الرايقة اللي مش مطحونة
آيوشة المنوشة

استنوا كده أريح شوية أصل حبايبي كتير

نوارة اللي منورانا دايما
مي السمكة الإسكندرانية
روني اللي بتحب ومش فقيرة ولاحاجة دي عملاهم بواكي خضرا
موناليزا المشتاقة للجنة
بسومة أنور الضغنونة
سومة هانم اللي قافلة الكافيه بتاعها ومش بتشربنا كازوزة خلاص
طوبة دهب وطوبة فضة

وكووووووووووووول الناس اللي بحبهم ويحبوني

كانت معكم ست الداكطورة شكاليطة من تحت أكوام الورق والسيديهات والكتب بصالون مشمش الثكافي وأنا بسمع أغنية الشيشة
ياني ياني ياني مش هعمل كده تاني
آه آه هروح أدور هروح أدور على نفسي

سلاموز بقى

الخميس، 5 نوفمبر، 2009

غير حياتك .. حدد نمطك


بعد ماسيبتكم يومين حلوين كده تفكروا في الموضوع وبعد الإجابات الرائعة اللي قربت كتير من الموضوع أعرفكم بقى دلوقتي إيه الفرق؟؟؟
الفرق في كلمتين صغننين خالص هما الأنماط التمثيلية
إيه بقى الأنماط التمثيلية دي ؟؟؟ دي في الكيميا ولا الجغرافيا يعني ؟؟
أقولكم الأنماط التمثيلية دي نمط حياة وتفكير وكلام يعني كل واحد منا ليه نمط تمثيلي وأشهر تلات أنماط هما :
أولا: البصري:
النمط البصري ده بنشوفه كويس قوي في واحد زي جمال وواحدة زي علا كده فاكرينهم
طيب إيه أهم سمات النمط ده؟؟؟
هاقولكم:
سرعة اتخاذ القرارات حتى عندما تحتاج إلى تأمل أو تفكير
التفاعل العالي مع التغيرات السريعة
يصلح أن يكون قائد لأزمة ولأنه يضع كل المعطيات أمامه على هيئة صور هذه القدرة تجعله يضع كل المتغيرات أمامه فيتصرف بحكمة يتعامل مع الإختبارات السريعة والشفوية بشكل جيد· يرى مالا يراه الأخرون لأنه يستطيع أن يتخيل العواقب والنتائج كما أنه يتسرع في الرد على الأخرين لذا فإنه غاليا مايقع في المشاكل
صاحب النمط البصري يرى العالم من خلال الصور، لو تذكر حادثة ما , تذكر صورمنها ، تكثر في مفرداتة التعابير الصورية مثل أنا شايف تخيل تصور إلخ
كما أنه سريع في الكلام ،يتجه نظره غالباً للأعلى يميناً ويسارا لأنه دائما يمشي وهو يرجع رأسه وأكتافه للوراء فيراه الكثيرون على أنه شخص مغرور
الشخص البصري يأخذ قراراته سريعاُ لأنه يرى بسرعة نتيجة قراره
ويتعلم البصري عن طريق التكرار الكتابي , التخيل الرسم الألوان , الخريطة الذهنية, الربط الصوري والتلخيص .
كما أنه غالبا مايتحدث بصوت عالي ويقاطع الآخرين كثيرا
وأنفاسه متسارعة جدا لأنه يشغل حوالي ثلث الرئة بالهواء فقط
طاقته عالية جدا



ثانيا: السمعي وده كان بيجسده في المشاهد علي فاكرين كان بيتعامل إزاي مع جمال ومع والده
أهم سمات الشخص السمعي
عقلاني منطقي·
يمرر الكلام على عقله وفي كثير من الأحيان أكثر اتزان في اتخاذ القرارات· ينطق مايقصد ويقصد ماينطق
يتذكر أكثر مايسمعه
صاحب النمط السمعي يتميز بالبطء في الكلام ، يتقن الأستماع ولايقاطع ، يهتم إلى حد ما باختيار الألفاظ
ويغلب على كلامه مرادفات تتعلق بالسمع مثل أنا سامع كلي آذان صاغية وهكذا، يتجه بصرة إلى اليمين واليسار بمستوى أذنيه ويتعلم السمعي بالتكرار اللفظي ، الحوار المناقشة , شرح المعلومة ,السؤال والجواب , ربط الأصوات واستخدام الموسيقي ,وشرح الخريطة الذهنية .
هادئ إلى حد ما كبير لأنه يملأ حوالي ثلثي رئتيه بالهواء



ثالثا: الشخص الحسي زي محمد جوز علا اللي مكنش عارف يتفاهم معاها خالص لإختلاف أنماطهم الشديد
سمات الشخص الحسي
التفاعل مع الأحداث وعدم الجمود ولكن بعد أن يشعر بها
لايأخذ القرار حتى يتفاعل معه ولذلك هو بطيئ في اتخاذ القرار
إن صاحب النمط الحسي كلامه بطيء نوعاً ما،تكثر فيه المفردات التى تعبر عن المشاعر والأحاسيس مثل أنا حاس إحساسي بيقولي كده.
ويتعلم الحسي بالتكرار الكتابي واستخدام الحواس اللمس النظر السمع ,الربط الحسي والمشاعر, التعلم بالمرح واللعب , عمل المجسمات التنظيم والترتيب الخريطة الذهنية .
هادئ جدا لأنه يملأ رئتيه بالهواء فهو يتنفس كالأطفال من منطقة البطن.
ودود ولطيف ومحبوب.
يمشي منحنيا للأمام قليلا.





دي ببساطة أشهر صفات الأنماط التمثيلية الثلاثة الأشهر ولازم كل واحد يعرف يحدد نمطه ونمط الشخص اللي بيتعامل معاه علشان يوصل معاه لنقطة تفاهم زي ماشفنا كده مع كريم والمدير لأن المدير عرف يحدد نمط كريم وتعامل معاه على الأساس ده وقدر يقنعه بهدوء لكن في حالة الزوجين محمد كان شخص حسي وعلا كانت بصرية وهما الاتنين مش فاهمين بعض علشان كده ماوصلوش لنقطة تفاهم واحدة ونفس الموقف تكرر بين جمال وعلي فجمال شخص بصري وعلي شخص سمعي وطبعا ماوصلوش لحل


هاه كل واحد بقى يحدد نمطه ويقولي وممكن الواحد يجمع بين أكتر من نمط وقولولي بقى؟؟؟

لكن السؤال إيه هو أفضل نمط في الأنماط التلاتة؟؟؟


السؤال د يبقى سؤال المشاهدين قصدي الناس اللي بتقرا عاوزة اعرف توقعاتكم وهارد على السؤال ده في البوست اللي جاي وهاشرح فيه إزاي نتعامل مع كل نمط



ملحوظة صغنونة على جنب كده : الموضوع ده كله مبني علي أساس كورس انا درسته من سنتين كده وهاحاول أنزلكم أكبر قدر منه


السبت، 31 أكتوبر، 2009

إيه الفرق ؟؟؟

شكرا جدا لكل الناس اللي ساعدوني ونصحوني في البوست اللي فات وأنا حاسة فعلا إني ارتحت لما قريت ردودكم عندي وده اللي أنا متوقعاه من أصحاب زيكم وبعتذر مرة تانية إني مكنتش متابعاكم الفترة اللي فاتت بس انا خلاص هارجع وأزهقكم أكتر من الأول نيهاااهاااااااااااااااااا

نيجي بقى لبوست النهاردة هو بوست غريب حبتين بس لما يكمل أكيد هايعجبكم

المشهد الأول:

محمد : بقولك إيه أنا حاسس إني عاوز أغير جو ماتيجي كده نخرج نتعشى بره ولا إن شا الله حتى نتمشى ع الكورنيش شوية
علا: ياخويا ده انت فايق ورايق ده بدل ماتشوف عيالك وتذاكرلهم وتلمهم بدل ما الواحد منهم يبجيبلنا ملحق ع الاخر كده
محمد: يا بابا العيال مش هيسقطوا ولا حاجة طول ما احنا بنحبهم ومعيشينهم سعدا هما هيذاكروا وهاينجحوا
علا: والنبي يا محمد أنا مليش دماغ للروقان بتاعك إنت ده إنت مروق طول النهار وجاي تكمل روقانك عليا وأنا العيال قارفني فوق كده وشوف الهم اللي ورانا


المشهد الثاني:

جمال: عملت إيه ياعلي في مشكلتك مع أهلك
على: أنا تعبت قوي معاهم ده أبويا طردني من البيت أول إمب...
جمال: ليه يابني ؟؟
على: قال إيه كان بيكلمني وأنا مابصتلوش وهو بيتكلم
جمال: طالما إنت مش عاوز تتكلم طيب تعالى نتفرج على فيلم أحمد حلمي الجديد نفسي أشوفه من زمان
على: هوه نزل فيلم جديد أنا ماسمعتش عنه ولا حتى سمعت أغنيته
جمال: طيب طالما مش عاوز تشوف الفيلم ده تعالي نروح نشوف العيال أصحابنا فين ونقعد معاهم أنا أصلي شايفك مخنوق وقرفان فقلت أطلعك من المود ده
علي: .......................
جمال: لاااا ده أبوك ليه حق يابني مش بكلمك يا عم إنت ماتعبرني ولا تبص في وشي حتى
على: ما أنا سامعك كويس بس مش حابب أتكلم
جمال: خلاص ياعم مش هاتهبب أكلمك تاني طالما مش طايق تبص في خلقتي



المشهد الثالث:

المدير: أنا سمعت إنك ناوي تقدم استقالتك ياكريم الكلام ده مظبوط
كريم: اللي حضرتك سمعته مظبوط فعلا
المدير: بس أنا حاسس إن فيه حاجة مضايقاك بخصوص الشغل
كريم: أنا بس بدأت أفقد حماسي وإحساسي بحبي للشغل
المدير: طيب ليه ماتبصش للناس اللي حصلهم كده قبلك وتحاول تشوف هما عملوا إيه
كريم: بصراحة أنا مااهتمتش قوي باللي حواليا
المدير: لو بصيت لتجارب غيرك هاتعرف غلطتك وهاتحاول تصلحها إنت شخص كويس وأوعدني إنك تفكر تاني
كريم: خلاص يافندم أوعدك

دي مش مسرحية التلات مشاهد دول بيحصلوا في حياتنا كل يوم وزي ماشوفتوا المشهدين الأول والتاني انتهوا بخناقة يعني ماوصلوش لحل والتالت وصل لحل طيب إيه الفرق؟؟؟

الفرق ده بقى هو اللي أنا عاوزاكم تفكروا فيه كويس قوي عاوزة أعرف توقعاتكم للموضوع ده يعني أنتو شايفينه بيعبر عن إيه ؟؟؟ وبعد كده أنا هنزل بوست جديد هاشرح فيه المشاهد دي

السبت، 17 أكتوبر، 2009

صوتك ..... أمانة




ياجماعة اعذروني إني ماكنتش بزور ناس كتير وماكنتش متابعة ونادرا لما كنت بعلق على بوستاتكم بس أنا اليومين دول أنا عندي حالة ملل رهيبة مخلياني زهقانة جدا من المدونة لدرجة إني فكرت إني أقفلها شوية كده مش عارفة مالي علشان كده كان فيه موضوع عاوزة أخد رأيكم فيه أنا عاوزة أجدد حبي للمدونة وللكتابة بس نظرا لحالة الفلس الشديد اللي عندي انا قررت أخد رأيكم عاوزين تشوفوا مدونة شوكولاتة إزاي الفترة الجاية دي وتعليقاتكم على البوست ده هي اللي هاتحسسني إن فيه ناس عاوزة المدونة دي وهاتديني دفعة وتخليني أكمل.

في ناس كتير سألوني عن موضوع التنمية البشرية أنا بس عاوزة أوضح إني مش متخصصة في الموضوع ده قوي بس درست فيه شوية وبحب أقرا فيه كتير قوي وفي ناس اقترحوا عليا أنزل دروس تنمية بشرية وشوية مهارات إدارية بشكل منتظم فأنتوا إيه رأيكم؟

وفي ناس طلبوا مني إني أنزل شوية كورسات إنجليش وأفتح المجال للأسئلة وأجاوب عليها.

وممكن أنزل خواطر وأشعار بس الحاجات دي كلها هاتبقى منقولة لأن معنديش الموهبة إني أكتب أشعار أو خواطر.

ياريت ياجماعة كل اللي يدخل المدونة يديني رأيه في المدونة بشكلها الحالي وياريت يعرفني إيه الحاجات اللي هو شايفها حلوة أو وحشة سواء فيا أو في المدونة ويديني اقتراحاته ويفهمني هو عاوز الحاجة دي ليه وأنا أكيد هاخد بأرئكم في الآخر لأن أكيد رأيكم يهمني وياريت كلكم تدعولي قوي اليومين دول لأني محتاجة دعواتكم معايا.


الأحد، 11 أكتوبر، 2009

مش هنسيبك مش هنسيبك .... ياأقصى مش هنسيبك

(كفانا نحيبا)




جائتني دعوة من الأخ الكريم طهر فؤادك صاحب مدونة رسول الله عن حملة جديدة رائعة وقد تفوق سابقتها في روعتها وهي عن ضرورة نصرة المسجد الأقصى
عجبني جدا تعليق أحد الأشخاص عندما يقول إننا اليوم نفرط في المسجد الأقصى ولاننصره وإذا جاء من اغتصب منا المسجد الحرام فلن نحرك ساكنا لأننا اعتدنا الصمت اعتدنا الذل اعتدنا أن نكون أقل الأمم اعتدنا على الفرقة ضاربين بكل أوامر الله ورسوله عرض الحائط ولانتذكر إلا قوت يومنا ولايشغل بالنا غير أنفسنا إلا أننا حتى أهملنا التفكير في أنفسنا ففقدنا جل مانملك وهو البقية الباقية من كرامتنا التي وضعها لنا الإسلام فكيف نطالب الغرب بالإعتراف بحقوقنا واحترامنا واحترام ثقافتنا وعقليتنا ونحن لا نحترم واحدة من أعظم مقدساتنا فكيف لنا أن نقف أمام الله مصليين ولانشعر بالحرج لأننا سمحنا لحثالة الأرض بانتهاك حرماته كيف لنا أن نرفع وجوهنا في وجوه من أسقونا الذل وشربناه هنيئا مريئا ولم نتجرع حتى غصته بل استطعمناها وطلبنا منهم المزيد استعجب جدا عندما أرى المصلين يصلون ويدعون الله بأن يحرر أقصانا فكيف نجرؤ على الدعاء ولم نفكر في أن نحرك ساكنا ونرفض هذا الوضع كيف ندعوا الله بأن يستخدمنا ولا يستبدلنا وقد أفضى بعضنا إلى بعض بكراهيتنا وعدم اكتراثنا بالقضية الفلسطينية وقد جعلنا همنا الأكبر من القضية مشاهد النساء والرجال والأطفال والعجائز الذين يذبحون على أيدي أبناء القردة والخنازير نسينا أنهم يضحون بأنفسهم في سبيل نصرة الأقصى عندما تخاذلنا نحن عن نصرته ونصرتهم واعتبرناها قضية الفلسطينين وحدهم كيف نصمت عندما نرى الأقصى أصبح في أيدي أشباه الرجال الذين يرفضون انتفاضة الأقصى الرابعة وقد شغلوا أنفسهم بتنمية علاقاتهم الشخصية بالولايات المتحدة ويرون مايحدث لأبناء هذا الوطن الجريح ويتركونهم ويبررون صمتهم بأنهم هم من اختاروا رؤسائهم فعليهم أن يتحلوا بالصبر ويتحملوا عواقب سوء اختيارهم فأين هؤلاء من أمير المؤمنين الذي فتح الأقصى وقد تمزقت عباءته من صعوبة رحلة فتح بيت المقدس وشدة اشتياقه إليه وإحساسه بالمسؤليه تجاهه.

فالأقصى ينادينا حتى بح صوته واشتكي غفوتنا إلى الله وقد صمت أذاننا وعميت أعيننا وتحجرت قلوبنا وصدأت عقولنا وتناسينا أصل إسلامنا عندما كان الأقصى أولى القبلتين وثالث الحرمين فمن للأقصى فهل مازال فينا رجالا يقول الله تعالي فيهم " مِّنَ الْمُؤْمِنِينَ رِجَالٌ صَدَقُواْ مَا عَاهَدُواْ اللَّهَ عَلَيْهِ فَمِنْهُمْ مَّن قَضَى نَحْبَهُ وَمِنْهُمْ مَّن يَنتَظِرُ وَمَا بَدَّلُواْ تَبْدِيلاً" الأحزاب:23
أم نحن من قال فيهم الله تعالى "يَا أَيُّهَا الَّذِينَ آمَنُواْ مَا لَكُمْ إِذَا قِيلَ لَكُمُ انفِرُواْ فِي سَبِيلِ اللَّهِ اثَّاقَلْتُمْ إِلَى الأَرْضِ أَرَضِيتُم بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلاَّ قَلِيلٌ " التوبة:38


اللهم إنى أشكو إليك ضعف قوتى، و قلة حيلتى، وهوانى على الناس
يا أرحم الراحمين
يا أرحم الراحمين
يا أرحم الراحمين
أنت رب المستضعفين، وربــى، إلى من تكلنى .. إلى بعيد يتجهمنى، أم إلى عدو ملكته أمرى, إن لم يكن بك غضب علىَّ فلا أبالى و لكن عافيتك هى أوسع لى
أعوذ بنور وجهك الذى أشرقت به الظلمات، وصلح عليها أمر الدنيا و الآخرة من أن تنزل بى غضبك، أو يحل على سخطك
ولك العتبى حتى ترضى
لك العتبى حتى ترضى
لك العتبى حتى ترضى
ولا حول و لا قوة إلا بالله العلى العظيم

وصلي اللهم على محمد وعلى آله وصحبه وسلم تسليما كثيرا


الثلاثاء، 6 أكتوبر، 2009

مطلوب إسفنجة ++ تحديث مالوش لازمة



شباب مصر ... نوابغ العصر


اليومين اللي فاتوا دول كنت مضغوطة جدا في شغلي ويمكن علشان كده كنت مقصرة معاكم
المهم النهاردة بقى قلت أخرج أشوف البلد وأشوف الحرافيش أصحابي فقررت أتنازل وأخرج وياريتني ماخرجت العيال الحرافيش دول حكولي موضوع طير عقلي مني وخلاني عماله أغني ظلموه الموضوع بقى إن واحدة فاشلة بكل مافي الكلمة من معاني كانت معايا في دفعتي اتعينت معيدة بجامعة خاصة عندنا يالهوي وده بأمارة إيه بقا إن شاء الله بأمارة السنة اللي دبلرتها ولا بأمارة المادة اللي قعدت تعيد فيها سنتين ولا بأمارة شخصيتها الزبالة ولا كان إيه وجهة نظر الموكوس اللي عينها المهم قعدت أقلب الموضوع في دماغي يمين وشمال وقلت فكك يابت ده نصيب أول ماروحت وفتحت الجهاز لقيت بوست للبت شيمو الشعب حبيبي وشرياني بتقول مصر زعلانة ولازمن أصالحها ورديت عليها وقولتلها لو مصر زعلانة سيبيها تتفلق!!!

أيوة تتفلق مصر اللي عملت في ولادها كده يعني أنا بت الحمد لله كل اللي بيفهموا ويتعاملوا معايا بيقولوا عليا شاطرة جدا في شغلي كمترجمة ومدربة وفي حاجات تانية كتير بالإضافة إني دارسة أنجليش وشوية فرينش كده من الكلية وكومبيوتر وسوفت سكيلز وموارد بشرية قوم إيه أول ما اتخرج ربنا يكرمني بشغلانة من الهوا كده وألاقي تليفوني بيرن بعد ما اتخرجت بأسبوع وناس بيقولولي عندك إنترفيو المهم لما روحت لقيت المكان ده بعيد عنكم جمعية أهلية ممولة من السفارة الفنلندية وما اداراكم ما الجمعيات الأهلية يعني تحطوا الحزب الوطني والكوسة اللي في البلد كلها في كوم وتحطوا الجمعيات الأهلية في كوم تاني سرقة إيه على عينك ياتاجر والحجة جاهزة دول ناس فنلنديين يعني هايفرتكوا فلوسهم على الموبايلات يبقى إحنا أولى بيها قلت ياللا يابت جمعية أهلية جمعية أهلية أهي حاجة والسلام تبدأي بيها واشتغلت في أول يوم اتعرفت على مجموعة جديدة هايبدأوا شغل معايا في مشروع جديد ومن الناس اللي اتعرفت عليهم واحدة تبقى أخت مرات المدير المالي والإداري للجمعية .. كبير شيوخ المنصر .. بعدها بيومين لقيت البت دي مابتجيش ليه ياولاد قالولي أصل البت تعبانة قلت واجب برضو أكلمها وأروح أزورها كلمتها لقيتها بتقولي لأ ماتجيش قلت عادي تعبانة بقى المهم الموضوع طول تلات شهور قالولي أصلها ياحول الله تعبانة قوي بعدها لقيت سعادتها جاية تسلم علينا وتقولنا أنا هاسيب الشغل .. ياعيني ياحبيبتي صحتها مش مساعدها .. المهم بقولها أنتي شكلك لسه مرهق أوي حتى باين على وشك أنك اسمريتي قالتلي لأ أنا دلوقتي كويسة بس أنا اسمريت أصل بقالي شهرين في شرم عند خالتي .. عملت زيكم كده بالظبط تنحت في وشها .. يعني الغندورة أخت مرات الغندور كانت بتصيف ماشي أهي هاتغور وتريحنا من قرفها أحسن برضو وكملت في الجمعية الملعونة دي كمالة السنة في أبشع درجات الإهانة وقلة الأدب ووقاحة المدير بتاعي جينا في أخر يونيو كده قالولنا هانبدأ مشروع جديد وعاوزين ناس فيه اللي يحب يقدم يقدم وبغباوتي قدمت وفي الانترفيو كسحت كل البشر اللي موجودين والراجل اتكلم معايا أكني خلاص اتعينت بالفعل وإذ فجأة وبعد أسبوع ألأقيهم عاملين انترفيو تاني للوظيفة بتاعتي وتاني يوم قالولي عارفة مين اللي اشتغل مين ياولاد البت أخت مرات المالي والإداري التانية يالهوي ليه هي تكية بابي ولا إيه وأخدت على قفايا وقلت يابت دي قسم. قوم إيه في آخر سبعة ألاقي المدير بتاعي بيقولي الناس في السفارة متأثرين قوي بالأزمة المالية وقرروا تخفيض عدد الموظفين بالرغم من إننا كنا اتنين بس أصلا علشان كده قررت السفارة الاستغناء عنك وأحنا حاولنا كتير علشان نخليكي بس مانفعش لتاني مرة أقول عادي ده رزق بس اللي كان هيجنني إزاي المشروع هايمشي من غير مترجم إزاي يعني ومعرفة المدير بتاعي عن الإنجليش زي معرفته عن الأخلاق والأدب عرفت بعدها إن تاني يوم بنت خالة المدير المالي والإداري اتعينت مكاني .. قولت نفس اللي بتقولوه دلوقتي حسبي الله ونعم الوكيل .. آه نسيت أقولكم إني كنت بقبض نص القبض اللي مكتوبلي في العقد والميزانية بتاعت المشروع وإيجار مقر المشروع كان بيتخصم مننا ده غير إنهم كانوا بيخصموا تأمينات وهما مش مأمنين علينا أصلا

المهم فضلت شغالة في مركز اللغات اللعين اللي أنا بدرس فيه وأقول أهوه شغل برضو احسن من مفيش عادي أبص بعد يومين داخلة المركز كده ألقي بت صايصة كانت دفعتي بس هي أكبر مني لأن سعادتها أخدت الكلية في ست سنين إزيك ياحاجة عاملة إيه أنتي جاية تاخدي كورس إيه ؟؟ يارب تبقي معايا قالتلي لأ أنا جاية أدي كورس كونفرسيشن يالهوي أبسوليوتلي هاو كام ؟ ليه هي المشرحة ناقصة قتلة قعدت أراقبها من بعيد لبعيد كده هي بتشرح إزاي لقيتها بتتدي مجموعة برايفت وقاعدة ومقعدة المتدرب جنبها وطبعا بيبص على البدي الأحمر في أسود وبتقراله من كتاب كونفرسيشن معفن بالعربي وبخمستاشر جنيه آه والله من غير ماركر ولا وايت بورد ولا ورك بوك ولا أي ورقة طعمية حتى لما بسأل بقى بنت صاحب المركز قالتلي إن مامتها زميلة بابا .. وبابا ده عينه زايغة آخر حاجة ..
طبعا أكيد نفسكم تضربوني أنا إيه اللي مصبرني على الغلب ده أقولكوا مانا لو لقيت احسن منه ماكنتش هاعبرهم ولما لقيت اشتغلت في أكبر دار نشر وترجمة في مصر في شارع الدقي وقالولي المرتب هايبقى 600 جنيه في أول تلات شهور وبعدين هاتزيدي طيب إن شاء الله هازيد كام قالولي 100 جنيه ده على أساس إني هاعيش في القاهرة وهاكل وألبس وأسافر لأهلي خميس وجمعة بيهم طبعا رجعت تاني لشغلي الأصلي بجزمتي حنين وعلى فكرة الشغل كان من تمانية لأربعة ولما تدخل المكتب بتاعك تقفل موبايلك وماتعبرش اللي جنبك لو بيموت أو تشرب شاي أو تعمل أي حاجة غير إنك تترجم الكتاب اللي معاك على الكومبيوتر علشان مانضيعش فلوس الراجل الشقيان اللي بيأكلنا ياعيني

والمرة اللي حبيت اتفزلك فيها روحت قدمت في وظيفة اتش آر كوردينتور والراجل كان مبسوط مني بالرغم إنه من أغلس الشخصيات اللي قابلتها في حياتي ولما واحد قريبي كلمه عليا اداله حقنة بنج معتبرة وبعدين عين أخت صاحبه عادي يعني

ولما حاولت أشتغل برايفت مع واحد زميلي ترجمنا ميزاينة لشركة وفي الآخر ضحكوا علينا وكلوا علينا حقنا

على الهامش:
- جمال مبارك عين 3000 شاب في وظائف مرموقة والشرط الأساسي في تعينهم إنهم يكونوا خريجين الجامعة الأمريكية .. وولاد الغلابة اللي أهلهم دفعوا دم قلبهم علشان يعلموهم طظ فيهم
- واحد من المتفوقين في دفعتي شفته النهاردة واقف في محل حلواني
- واحد راح يقدم لوظيفة في شركة فلما دخل عندهم سألوه : متىيكون حاصل ضرب 3*3 =10؟
فقال : عندما تكون الإجابةخاطئة.
قالوا : ماهو الشي الذي له أكثر من جناح ولا يطير؟
قال : الفندق.
قالوا : ما هي الكلمة المكونة من أربع حروف إذا أكلت نصفها تموت ، وإذا أكلتهاكاملة لا يصيبك شيء؟ قال : سمسم . قالوا : من هو الرجل الذي يستطيع أن يقفعلى الأرض ورأسه فوق النجوم ؟
قال : الضابط
قالوا : ما هو أكبر عدد من المواليد يمكن أن تضعه النعامة ؟
قال : النعامة تبيض ولا تلد
قالوا : ما هو الشيء الذي بدونه لا تستطيع أن تحصل على الوظيفة في هذه الشركة؟
قال : الواسطه
قالوا : وهل هي عندك ؟
قال : لا ....
قالوا :
طيب خد الباب معاك وإنت طالع !!!!
- اللي شاف برنامج تسعين دقيقة واتحرق دمه زي الملايين اللي شافوا البيه اللي بيقبض نص مليون دولار شهريا في أحد البنوك الدولية في مصر .. لو إدينا لموظف 500جنيه يبقا هانشغل 6000 شاب من اللي بيضيعوا بسبب البطالة والسخط على البلد

بجد ياجماعة أنا بكتب البوست ده وأنا دمي بيغلي ليه كده يعني أنا ولا حاجة بالنسبة لناس تانية فطاحل في البلد وبيجرالي كده النهاردة في وسط كمية الضغوطات دي حسيت إني محتاجة إسفنجة تمتص كل غضبي وسخطي والقرف اللي أنا شايفاه زي الإسفنجة مابتمص المية بالظبط وأقدر أستحمل كل الشكات والصدمات وياترى الصدمات دي بتحصلي ليه علشان مش عاوزة أعمل حاجة غلط ولا دي سذاجة وهبل وعجبي !!
ليه كده يابلدي ياللي كنتي زمان مرفوعة الهامة
دلوقتي قسينا عليكي وقسيتي علينا وبنرمي عليكي كل الملامة
ونقول ليه كده يابلدي وحياتك لأخليكي عالية الهامة
وهنمسح كل اللي بيجرحوكي وونخليكي طويلة القامة
وهنمحي كل ذكرى ذلتك بعد ماكنتي زمان علامة
وحياة اللي ضحوا بروحهم علشانا لأرفع راسك وأخليكي بين الناس إمامة

الخميس، 1 أكتوبر، 2009

علشان من حقهم يعيشوا



براءه ينهشها المرض والألم ويحييها الامل فنجدهـم مـن احشـائهـا يـولدون
بمخاض عسير يسبق قدومه ليأتي زينة الدنيا الى هذه الدنيا . فتفرح العائـله
وتزغرد الجده . وتبدأ رحلة الغد الطويله ... انها قصة حياتهم انهم اطفالنا
الذين غالبا ما تُرسم الحياة لهم بقسوةٍ وتعب . بمرضٍ وألم . عمراً مزهـواً
بطفولتهِ . مسيجاً بشوكِ مرضٍ خبيث ... فتتحول زينـة الدنيـا الى مـأسـاه
ونظرة الحب الى دموع شفقه . والغد الى شبحٍ أسـود يلبس المـوت ثوبـاً
ويحوم فوق رؤوس فلذات اكبادٍ صغار لم يعرفوا من العمر بعد الا طراوته
وبراءته . وفكرةً مخيفةً اسمها [ السرطان ] تقتل ضحكاتهم الصافية . وتحولهم
الى صغارٍ - كبار . بهموهم وحزنهم ..

جاتلي دعوة من الأخ الكريم طهر فؤادك صاحب مدونة رسول الله وشرحلي فيها فكرة حملة مدونتك هاتنقذ طفلك اللي بيقوم بيها وربنا يجازيه خير الجزاء


لما قريت الموضوع حسيت إني مش مخيرة أكتب أو ما أكتبش بس أتأكدت إني لازم أكتب لازم أساعد أطفال كنا وإحنا في عمرهم بنلعب ونضحك ونجري ماكناش نعرف في حياتنا غير اللعب ودول أطفال مايعرفوش في حياتهم غير الحقن والكيماوي والشاش والقطن


الحمد لله إني ماعايشتش التجربة دي عن قرب وأتمني من ربنا إني ما أعيشهاش وربنا يعين كل مريض بالمرض ده او ليه عزيز مصاب بيه بس أنا مرة عشت موقف لايمكن أنساه أبدا ماحييت كنت مرة مسافرة في اتوبيس من القاهرة لقيت أم وأب ومعاهم طفل عمره حوالي 6 سنين وكانوا قاعدين قدامي وجنبي كان فيه سيدة معاها طفلين حوالي 3 سنين و9 سنين فالأطفال دول قعدوا يلعبوا مع بعض ويجروا في الأتوبيس ولما الطفل الأول شافهم نزل يلعب معاهم وهوه بيلعب الكاب بتاعه وقع وعرفت على طول وقتها إنه طفل مريض بالمرض اللعين ده بعد شوية قليلين قوي الطفل ده جه سند على رجلي وكان نفسه عالي قوي بطريقة ملفتة للنظر جدا وبعدين طلع يجري على أمه وقالها أنا تعبان قوي ياماما أنا عاوز أروح المستشفى علشان أخد حقنة البروفين علشان أنا تعبت قوي تخيلوا طفل عمره 6 سنين مايعرفش حاجة في الدنيا غير حقنة البروفين اللي بتسكنه علشان يعرف يلعب مع أصحابه


الطفل ده عمره ماعمل حاجة نفسه فيها في الدنيا وإحنا لو ماساعدناهوش هيبقى محكوم عليه بالإعدام وإحنا ممكن نشيل الحكم ده عنه لو قدرنا نساعده بفلوسنا ولو قدرنا نروح نزوره ونخفف عنه ونحسسه إنه ممكن يعيش حياته كطفل سوي
أنا معنديش كلام تاني أقوله غير إننا الأطفال دول بني آدميين زينا يعني بيحسوا وبيفرحوا وبيزعلوا زينا بالظبط وأنت لما بيبقى عندك دور برد واللي حواليك ما بيسألوش عليك بتتعب اكتر وبتضايق أكتر مابالكم بأطفال مصابين بمرض لعين سرق منهم طفولتهم وأحلى أيام عمرهم وسرق الضحكة من على وشوشهم وقلوب أهلهم ياريت اللي يقرا البوست ده يروح على مدونة رسول الله علشان يعرف أكتر ويحاول يتكلم عن الموضوع أو على الأقل يحط الصورة


ودي ياجماعة بعض طرق التبرع واللي عاوز يعرف أكتر عن التبرعات يدوس على الصورة اللي على اليمين


البنوك :- (ودى متركز عليها كتير فى وسائل الاعلام ومش هنخوض فيها ) .
انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...
التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان
بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .
البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386
**** حملتنا على ال facebook ( ودى اهداء من مدونة قطرات ندى . جزاها الله خيرا ) :-) http://www.facebook.com/group.php?gid=139959994897&ref=search&sid=100000133813777.2100342868..1



وفي الأخر ها أقولكم بس حديث الرسول الشريف " مثل المؤمنين في توادهم وتراحمهم كالجسد الواحد إذا اشتكى منه عضو دعا له سائر الأعضاء بالسهر والحمى"

عيد ميلاد الليلة مين

كل عام و إنتم بألف خير
يا أعز ناس في قلبي الصغير
اليوم يوم ميلادكم السعيد
نفسي و منى عيني أشيلكم و أطير




ادي البلالين



البسلك طرطور






محدش يبص

اصل أنا اللي هاكلهم لوحدي






نطفي الشمع بقى



حلو ياحلو











وادي المشاريب ومحدش يقولي ع النوتة









النهارد ة تلاتة غاليين قوي على قلبي بيحتفلوا بعيد ميلادهم رنا حبيبة القلب وأم مالك نور العين ومروة بنت بلدي الصعيدية



النهاردة 30/9 عيد ميلاد الغالية على قلوبنا كلنا أم مالك واللي من النهاردة مابقاش اسمها أم مالك بقى اسمها أم مالك وشوكولاتة ربنا يخليهالنا وأدعولها ربنا يشفيها ومايورينا فيها حاجة وحشة ابدا
النهاردة 30/9 قمر اتولد لدنيتنا دي وهي مروة الصعيدية الأمورة واللي يارب السنة الجاية تبقى معانا وتكون رجعت للتدوين وتكون لقيت ابن الحلال وجابت منه هريدي صغنن ينور الدنيا والصعايدة الجدعان يزيدوا واحد
واللي عرفني إن عيد ميلاد مروة النهاردة بدراوي شكرا جدا يابدراوي مروة دي تستاهل كل خير



وبكرة بقى 1/10 عيد ميلاد توأم روحي ونور عيني وقلبي رنا الجميلة الحكومة بتاعت الواد ميخو ادعولهم بقى ربنا يكرمهم بعيل زي العسل يطلع عنيهم بس يسموه شوكولاتة بردو وربنا يرجعهم لنا بألف مليون سلامة




السبت، 26 سبتمبر، 2009

كيف تصبح متتامرا؟؟؟




كيف تصبح متتامراً؟
بص يابني أنت وهو وهوه لو نفسكم تبقوا متتامرين فهذه هي الطريقة الأسرع لكي يسجد لك الشباب:
أولا علبة جيل فيانسيه من أبو 6 جنيه وخلي أخوك الصغير يلعبلك في شعرك علشان ينفش وينعنش كده
ثانيا حظاظة منتنة من عند عم شعبان روشنة اللي في العتبة وعلى قكرة دي باتنين جنيه ونص ولو دفعك أكتر من كده يبقى حس فيك حسك التموري
ثالثا البس قميص أخوك الصغير وأوعى تنسى تقطع العشر زراير الفوقانين علشان السلسلة تبان





رابعا بطل تبعزق فلوسك على ناسيت تو وجيليت بلو وسيب دقنك للي خالقها
خامسا ألبس البنطلون اللي الشغالة عندكو عاملاه خيشة
سادسا لو كنت دخلت الجيش ألبس الحزام تاني بس ماتنساش تلمع التوكة عشان تزغلل عيون الموزز اللي طبعا هايتلمو عليك لما تسبلهم بعنيك المستخبية تحت حواجبك .. ولو كنت متهرب من الجيش أمرك لله أشتريلك واحد بس ماتشدهوش على وسطك علشان ماتضيعش قيمة النو ويست
سابعا وشفلك شبشب بصباع .. اسمع أغنية يابتاع الشباشب لنجم الچيل .. مرمي في أي مقلب زبالة كده وحطه في رجلك

ثامنا وبعدين تروح على أي أجزخانة جنب بيتكم وتجيبلك كام حقنة تستوستيرون يعملولك بالونتين في دراعاتك علشان الموزة تحس إنها ماشية مع هيركليز ولو بتخاف من الحقن يابيضة روح عند عم بلفة العجلاتي ينفخلك بربع جنيه ولو حبيت تشهيصه اديله خمسين قرش

اقعد بقى وانت منشكح باللوك التمورى ده ع الكورنيش وقابل يا سيدي ... موزز بقى ايه للصبح ... ابقى قابلني لو عرفت تتحرك من كتر التهزيئ




وطبعا بعد كده سعادتك تقعد على قناة مزيكا وخليك في حزب تمورة وحسك عينك تنضم لحزب عمورة واقعد فرتك فلوسك على مسجات من أم خمسة جنيه وعليك العوض يابني في كل حاجة


وبكده ياشباب الجيل نكون عملنا ثورة تمورية في البلد ولما تروح أي حفلة الناس هاتسجدلك زي كده بالظبط



على فكرة أنا مش بقول أن تامر حسني مش كويس بالعكس ده فنان بيقدم لون معين أنا بتكلم بس عن الناس الهايفة اللي أخدوه قدوة وعملوه نبي وبيقلدوه في كل حاجة وبعيب على الحاجات الغريبة اللي هوه بيعملها واللي مالهاش أي معنى. وعلشان محدش يتكلم أنا مش عمورية أنا بس بقول نعجب بفنان بس مانعبدهوش

الاثنين، 21 سبتمبر، 2009

كل سنة وأنتو طيبين ... يا أحلى مدونين



والله عاوزة أمشي جوه الحيط من كتر كثوفي منكم يا جدعان أنتو كلكم جيتو عيدتو عليا نفر نفر وأنا إيه مدياها تنفيض وكنس ومسح وخلاص
أنا آسفة ياجماعة أنا عارفة إني قصرت في حقكم بس بليز محدش يزعل مني بس والله ظروف العشرة الأواخر والعيد بقى غير إن في موضوع مهم قوي نفسي إنكم تدعولي إن ربنا يوفقني ويهديني للخير ويرضيني بيه
وعلى فكرة ميخو سينيور (على رأي دكتورة ستيتة بيشكركم كلكم وبيقولكم كل سنة وأنتو طيبين)
بجد أنا مش عارفة أقولكم إيه أنتو كنتم أول ناس أنا عاوزة أعيد عليهم قبل أي حد تاني وعلشان أصالحكم أنا هاشكركم نفر نفر واللي يسمع اسمه يرفع إيده (قصدي يقب بالكادبوري هازلنت)

أم مالك

دكتورة ستيتة ... مش عارفة بس نفسي أعرف

أستاذنا فشكول ... فشكووول دوت كوم

أستاذنا عمرو ... حبشتكانات فلسفية

ميخو ورنونا ... رحيق الحياة

رانيا البدري ... سبهللة

مي ... رحيق الورد

ديالا ... دموع الورد

صلاح ... مسدس صغير

بدراوي ... طعم البيوت

شيما ... الشعب لابد له من حكومة تشكمه

شوشو ... بينك دريمز

مروة ... مالقتلهاش عنوان

آيوشة ... تخاريف وأحاسيس آيوشة

سومة ... سومة كافيه

سومة ... سومة مجنونة في بلد عاقل

موناليز ... أمة الله

نور ... يبقا أنت اكيد في مصر
رحاب ... آبي بلانيت

أحمد الصباغ ...خالو أحمد الصباغ

طفلة محبة للرومانسية بس واقعية ... مش فارقة من اليابان أحدثكم

مهندس مصري بيحب مصر

نوراة ... نوارة فن الجمال

بسمة أنور... حكاياتي

يوسف ... إيديا في جيوبي

محمد ... ذا جيفينج ريفر

رانيا ... ليس فقيرا من يحب

حنين القلب

أحمد ... لاتشتاق

طوبة ذهب وطوبة فضة

بنوتة ... عالم بنوتة

عمرو فاروق ... شوية أحاسيس

المعلم محمد ... طعمية سخنة

جفرة ... كلاشينكوف

أحلام حقيقية

ليدي ... روح طفلة مش عايزة تكبر

مصطفى ... فك زنقة

المعتصم ... مش عارف

أسافور أناروز ... أحزان لاتنتهي

دموع القمر

سما ... استراحة أنوش

وكل الناس اللي ما كتبتش أساميهم بس هما أكيد ناس أنا بحبهم جدا جدا
كل سنة وأنتو طيبييييييييييييييييييييييييييييييييييييييين

الثلاثاء، 15 سبتمبر، 2009

عيد ميلاد ميخو

(كل سنة وأنت طيب ياميخو)



لا استنوا ماتروحوش هناك ده مش ميخو بتاعكم ده ميخو بتاع شوكولاتة وميخو الصغنون ده عيد ميلاد ميخو الأب
النهاردة يوم 15 سبتمبر ميخو حبيبي جه ونور الدنيا



ميخو حبيبي كان بياخدني كل يوم معاه النادي ويجيبلي إزازة شاني فاكرينه أيون هو أبو خمستاشر قرش ده ولما كنا نروح كان بيعشيني من إيده الحلوة وكان بيعملي أحلى طبق فول بطماطم في الدنيا وسندوتش الجبنة الرومي اللي أنا بحبها (آخر العنقود بقى ومدلعني) ولما كبرت شوية ودخلت المدرسة كان كل يوم يوصلني للباص بتاع المدرسة ويقولي أوعي تعيطي ياروقة (وده لحد النهاردة أكتر اسم دلع أنا بحبه) وكان كل يومين تلاتة كده كان ييجي ياخدني من المدرسة ويقعدني جنبه في العربية ويقعد يلاعبني ويجيبلي طبعا شوكولاتة وبعدين لما نروح كنا نقعد نتغدى وكان أحيانا بيأكلني هوه بنفسه وبعدين يوديني الكتاب علشان أحفظ قرآن ولما أرجع يقعد يذاكرلي ويحل معايا الواجب وكان دايما بيذاكرلي العربي والحساب وطبعا كان بيزعقلي ياما وبعد كده ينزل يروح يكمل شغله أو يقعد مع أصحابه في النادي وكان لازم ييجي حاطط لإيده ورا ضهره علشان كان لازم يجيبلي وهوه جاي باكو بسكويت رشا فاكرينه بتاع فؤاد خليل لما كان يطلع يقول أنا عايز رشا هاتولي رشا وبعدين نتعشا سوى وكنت لازم بعد كده أأنتخ على حجره ويروح ياحول الله شايلني ومدخلني أوضتي بس كنت دايما بستهبل وأروح أقوله أنا تعبانة يابابا زوري واجعني يابابا يقوم بكل حنية ياخدني في حضنه ويحكيلي حدوتة الديب وماكنش ياعيني يعرف غيرها وكان بيحكيهالي كل يوم وفاكرة لما كنت أحفظ سورة من القرآن كان لازم يجيبلي حاجة حلوة فاكرة يوم ماحفظت سورة الفيل اتصل بيا من المكتب وقالي حفظتي السورة وسمعتهاله بعدها قالي طب افتحي درج البوفيه تحتك وهتلاقي فيه حاجة حلوة كان جايبلي علبة ألوان فلوماستر علشان كان عارف إن دي أكتر حاجة بحبها



أكتر حاجة بقى بتفرحني دلوقتي أنه كان نفسه أبقى بيرفيكت في الإنجليزي والحمد لله دلوقتي بقيت مترجمة ومدربة إنجليزي كحكوحة على قدي كده بس على طول بيحب يفتخر بيا وبيسألني على طول على كلمات إنجليزي نفسه يعرفها وكمان كل يوم خميس يروح يجيبلي الأهرام ويكلي علشان أقوي لغتي



وأجمل حاجة بحبها فيه حنيته اللي مالهاش حدود يعني لما بيكون حد منا تعبان بيبقى هوه كمان تعبان وممكن يعيط عليه ولا لما أخرج واتأخر دقيقة عن معادي يقعد يرن عليا ويكلمني ولا لما أسافر أنا أو يسافر هوه بيبقى عصبي جدا ونفسه ماسافرش بأي طريقة علشان هيقلق عليا قوي ولما يزعلني بيبقى مش قادر يسيبني زعلانة وببقى صعبانة عليه قوي بصراحة عمري ماشفت حد في الدنيا دي في حنيته



أنا بس عاوزة أقوله أنا بحبك قوي يابابايا ياحبيبي وربنا يخليك ليا ويباركلي فيك وماتزعلش مني علشان أنا بزعلك كتير بس إنت عارفني مجنونة بس والله غلبانة خالص وبمووووووووت فيك
ممكن بقى كلكم تدعوله يخليه ويباركلي فيه وادعوا كمان لأبهاتكم

الخميس، 10 سبتمبر، 2009

ألف نيلة ونيلة

(مش عارفة ليه حسيت إني لازم أحط الصورة دي)

من كام يوم كده سمعت إن اليابان يعني مش الصومال ولاحاجة هتقفل المدارس علشان خايفين من أنفلونزا الخنازير وكمان عمان هتأجل الدراسة شوية لحد ماالناس تعرف راسها من رجليها
بعدها بخمس دقايق بس طب عليا سعادة الأستاذ الدكتور المهندس اللواء الوزير يسري الجمل وشكله كان واكل اكلة جامدة حبتين علشان العيار كان تقيل قوي المرة دي وطلع قالها كده ببجاحة ( الموسم الدراسي 2009 / 2010 هيبدأ في معاده يوم 26 سمتمبر) مش عارفة ليه حسيت إن بطني وجعاني كده ونفسي غامة عليا يعني اليابانيين اللي مابيفهموش جنب المصريين حاجة فهمو وهيقفلو المدارس وخايفين على البشر بتوعهم اللي مالهمش لازمة دول وإحنا نقول المدارس في معادها إحنا كده نبقى ماشيين بمبدأ التيتا في الننا والننا في التيتا يمكن علشان دي فرصة ذهبية للحكومة اللي دايما بتسعى لراحتنا انها تخلص منا ونموت موتة ربنا بقى بدل مايغرقو العبارات وياكلونا عيش مسرطن ويشربونا مية مجاري واهوه يحكمو شوية الشعب الباقي ده لو فاض يعني على رواقة ويوفروا اللي كانو بيصرفوه علينا
قلت يابت يا شوكولاتة استني اسمعي أكيد الحكومة الرشيدة بتاعت بكار عندها وجهة نظر تانية فسألت نفسي سؤال غبي كده وقلت طب ليه ياسعادة الوزير؟
رد ببلاهة كده وقال لأننا مسيطرين على المرض في مصر ( بأمارة 845 حالة اللي طلعو كلهم في 3 تشهر واقطع دراعي من لغلوغه لو ماكنش في صفرين ولاحاجة قدام الرقم ده وعلى فكرة مصر تعتبر من آخر الدول اللي ظهر فيها المرض وكان يوم 2 يونيو ) طب سؤال ضغنن كده بس محشور في زوري يكونش البعيد بقى وزير صحة وأهوه نبقى ضربنا حما... احم احم حمامتين بحجر نبقى خلصنا من وش السعد في الصحة ورحمنا التعليم شوية يعني بتوع منظمة الصحة العالمية كانو محششين لما أعلنو المرض وباء عالمي وأنه خرج عن السيطرة وأنهم متوقعين موت الملايين بسبب المرض ولما سألوه طيب إيه إجرائتكم لحماية الأطفال من المرض قال إحنا هنخصص فترات من الأسبوع الأول في الدراسة للتوعية بخطورة المرض بالإضافة إلى الاهتمام بالتهوية الجيدة والنظافة (موت ياحمار ده احنا دافنينه سوا) وطبعا قرر تخفيض الكثافة الطلابية بالفصول ل 100 طالب بس وهانعمل حجرة عزل في كل مدرسة علشان المدير لما ينعس يخش يعسل شوية

طب انا عندي اقتراح جه في دماغ أي واحد عبيط ليه مانلغيش المدارس السنة دي أو نأجلها للصيف ؟
وأهوه يبقى عندنا سنتين فراغ يونسو بعض بس لأ طبعا مش هاينفع علشان كده إحنا هنأخر دفعة العلماء اللي طالعة دي وهنسبب جزمة اقتصادية في بنوك سويسرا وهنموت المدرسين الخصوصين مشلولين

ولما سألو وزير الصحة عن ضرورة إغلاق المدارس قال إيه ياولاد ؟؟ إحنا لو قفلنا المدارس العيال هتلجأ للشوارع وده هيؤدي إلى انتشار المرض ده على اساس إن العيال كانو مستخبيين طول السنة ومقضينها مكتبات ومعسكرات ثكافية
وطالما الحكومة واخداها عند أنا من هذا المنزنق بنصح كل شاب وكل فيتاه لاتذهب الى الجامعة ولا للمدرسة يعني اللي اتعلمو اخدو ايه من العلام

(نموت نموت وتحيا الحكومة الإلكترونية)

في نهاية البوست أحب أقولكم نكتة تموت من الضحك

فيروس اتش وان إن وان بيعيش على العملات المعدنية لمدة أسبوووووووووعين

وسمعني سلام ماتزوقيني يا ماما قوام يا ماما ده عزرائيل جاي يشيلنا بالسلامة يا ماما

الأربعاء، 2 سبتمبر، 2009

اليهودية والصهيونية .... عملتان مختلفتان تماما


هل هي مجر د كلمات وأحاسيس نسجها الداعية الإسلامي الأستاذ عمرو خالد في برنامجه الرائع قصص القرآن في جزئه الثاني فاخرج لنا شخصية طالما طال نسيانها شخصية لم نضعها أبداً في حسباننا شخصية لانتذكرها مادامت كما يقول البعض لاتشغلنا وفي الحقيقة هي الشخصية التي غيرت شكل البشرية أم أنها رسالة لتعريف العالم أجمع بسمو وتسامح الديانة اليهودية

ويأتي برنامج قصص الأنبياء بجزءه الثاني هذا العام ليضع إطاراً جديداً يصنع من خلاله مفهموما رائعاً لشكل العلاقة بين العالم الغربي والمسلمين فلطالما كثرت النداءات لعمل حوار مع الغرب وعندما لم يقتنع الغرب برغبتنا في توضيح المفهوم الحقيقي للدين الإسلامي جاء هذا البرنامج ليوضح للغرب المغزى الحقيقي من الديانات السماوية أجمع وعلى رأسها اليهودية وهو التسامح والوحدانية لله الواحد فيخرج رجل من رموز المسلمين ليشرح كيف أن الله أحب نبي بني إسرائيل وكيف كان هذا النبي عظيما ليصل إلى مكانة كليم الله وحبيبه وكيف أن كلا من محمد وعيسى أحبا أخيهما موسى وكيف يقول سيد ولد آدم " لا تفضلوني على موسى " حتى لايدع مكانا للفتنة ويوضح الداعية الأستاذ عمرو خالد كيف أن أخلاق ورسالة موسى عليه أفضل الصلاة والسلام تناهضان العنصرية والإرهاب حيث تجلى هذا المعنى في موقف سيدنا موسى عندما قتل الرجل من حاشية فرعون وكيف كان ندمه لمجرد أن شعر أن هذا الرجل قد يكون مظلوماً ويتجلى معنى المعايشة والحب في زواج سيدنا موسى من إمرأة عربية

ويوضح الأستاذ عمرو خالد كيف كانت رائعة صفات هذا النبي حيث كان كارهاً للظلم محباً للضعفاء وكيف كان قوي البنية وكيف استغل قوة بنيته في نصرة المظلوم وكيف كان متسامحاً ومتعايشاً ومحباً للآخرين ومرناً ومؤمناً برسالته وفي الوقت ذاته يربط الأستاذ عمرو خالد بمنتهى الذكاء بين سيدنا محمد وسيدنا موسى عليهما افضل الصلاة والسلام ويؤكد على مبدأ حب واحترام جميع الأنبياء والرسل معتمداً على قوله تعالى في نهاية سورة البقرة :
"آمَنَ الرَّسُولُ بِمَا أُنزِلَ إِلَيْهِ مِن رَّبِّهِ وَالْمُؤْمِنُونَ كُلٌّ آمَنَ بِاللَّهِ وَمَلائِكَتِهِ وَكُتُبِهِ وَرُسُلِهِ لاَ نُفَرِّقُ بَيْنَ أَحَدٍ مِّن رُّسُلِهِ وَقَالُواْ سَمِعْنَا وَأَطَعْنَا غُفْرَانَكَ رَبَّنَا وَإِلَيْكَ الْمَصِيرُ"

أكثر ماجذبني في البرنامج قول الأستاذ عمرو خالد " يابني إسرائيل لم يكن نبيكم عنصرياً فمن أين أتيتم بكل هذه العنصرية " فأين انتم ياصهاينة اليوم من قوة موسى وأنتم تحتمون بأسلحتكم هل نسيتم نبيكم أين أنتم ياصهاينة اليوم من النبي صاحب رسالة الحق ورسالتكم ملؤها الباطل والظلم أين أنتم ياصهاينة اليوم من موسى محب الضعفاء وأنتم تستضعفون المسلمين أين أنتم من موسى محرر البشرية من ظلام الإستعباد وأنتم تطوقون العالم اليوم بأسوار من الظلم والسادية فلماذا خلطتم الحابل بالنابل وقضيتم على سمو رسالتكم وجعلتم من اليهودية ستاراً لكم

(تلعنون النازية وتعيشون بها)



(لن تتلوث ابداً اليهودية بالصهيونية)



(وشهد شاهد من أهلها)

السبت، 22 أغسطس، 2009

أمن يجيب الضطر إذا دعاه ؟؟؟




في ناس كتيرقوي سألوني أنا ليه اخترت شعار أمن يجيب المضطر إذا دعاه وفعلا السؤال ده مهم جدا لأني لما قريت في الموضوع ده حسيت إن فيه علاقة غريبة قوي بين الدعاء ورمضان علشان كده قررت أني أهتم بالدعاء جدا السنة دي.
عارفين ربنا بيقول إيه عن الدعاء قال تعالى : " وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُمْ يَرْشُدُونَ " صدق الله العظيم
الحاجة اللي خليتني أفكر وأهتم بموضوع الدعاء قوي في رمضان هي مكان الآية دي بالظبط في القرآن الآية دي في سورة البقرة ورقمها186 لو بصينا للآية رقم185 هنلاقي ايه قال تعالى : " شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ فَمَن شَهِدَ مِنكُمُ الشَّهْرَ فَلْيَصُمْهُ وَمَن كَانَ مَرِيضًا أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللَّهُ بِكُمُ الْيُسْرَ وَلاَ يُرِيدُ بِكُمُ الْعُسْرَ وَلِتُكْمِلُواْ الْعِدَّةَ وَلِتُكَبِّرُواْ اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ " صدق الله العظيم
ودي الآية اللي ربنا فرض فيها الصيام علينا طيب عارفين ايه هي الآية رقم187 في سورة البقرة برضو قال تعالى : " أُحِلَّ لَكُمْ لَيْلَةَ الصِّيَامِ الرَّفَثُ إِلَى نِسَائِكُمْ هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ عَلِمَ اللَّهُ أَنَّكُمْ كُنتُمْ تَخْتَانُونَ أَنفُسَكُمْ فَتَابَ عَلَيْكُمْ وَعَفَا عَنكُمْ فَالآنَ بَاشِرُوهُنَّ وَابْتَغُواْ مَا كَتَبَ اللَّهُ لَكُمْ وَكُلُواْ وَاشْرَبُواْ حَتَّى يَتَبَيَّنَ لَكُمُ الْخَيْطُ الأَبْيَضُ مِنَ الْخَيْطِ الأَسْوَدِ مِنَ الْفَجْرِ ثُمَّ أَتِمُّواْ الصِّيَامَ إِلَى اللَّيْلِ وَلاَ تُبَاشِرُوهُنَّ وَأَنتُمْ عَاكِفُونَ فِي الْمَسَاجِدِ تِلْكَ حُدُودُ اللَّهِ فَلاَ تَقْرَبُوهَا كَذَلِكَ يُبَيِّنُ اللَّهُ آيَاتِهِ لِلنَّاسِ لَعَلَّهُمْ يَتَّقُون" صدق الله العظيم
َو في الآية دي ربنا بينظم لنا الصيام وقيمته أنا لما قريت التلات آيات دول حسيت إنهم رسالة مهمة جدا من ربنا بيقولنا فيها إنكم مهما تعملو في رمضان مش هتفوزو بالجنة إلا بالدعاء وإستجابتي لدعواتكم وكفاية أن الله يستحي أن يرد يد سائل في رمضان
وفي كمان قصة سمعتها في غاية الروعة عن قيمة الدعاء وحوجتنا اليه القصة دي عن صحابي وعالم حديث اسمه سفيان الثوري العالم ده كان بيصلي وحس انه مش بيصلي بقلبه فضايق قوي وخرج بعدها يتمشى في المدينة ولقي طفل أمه طردته من البيت علشان عمل حاجة غلط فالطفل قعد يبكي ويصرخ ويقول لأمه افتحيلي الباب أنا ماليش حته أروحها غير البيت وحضنك وبعدها حن قلب أمه وفتحتله الباب وفي اللحظة دي حس سفيان إن دي رسالة من ربنا إن زي ما الطفل ده مالوش غير أمه هوه كمان مالهوش غير ربه وأكيد ربنا أحن عليه من رحمة الأم بطفلها

ولو عايزين تعرفوأكتر عن أكثر الأدعي المستحبة ادخلو على اللينك ده
http://majdah.maktoob.com/vb/majdah32322/

أنا لسه مستنية بوستاتكم وشكرا لكل الناس اللي سألو عليا وأنا مسافرة واعذروني لأني المفروض كنت أنشر البوست امبارح بس للأسف أنا جيت متأخر قوي وكنت مرهقة شوية واعذروني أني ماتكلمتش عن هدفي باستفاضة علشان أنا حسيت إني لازم أوضح أهمية الدعاء قبل أي حاجة ولإن في ناس كتير مابيهتموش بالدعاء قوي قد اهتمامهم بالصيام والصلاة وصلة الرحم وربنا يتقبل منا جميعا صيامنا وقيامنا وسجودنا وركوعنا ودعاءنا وسائر أعمالنا وجعلها خالصة لوجهه الكريم

الاثنين، 10 أغسطس، 2009

هدية الرحمن ... هل تقبلها ؟؟؟

أولا كل سنة والناس كلهم طيبين وفي صحة وسعادة وهنا فاضل ياجماعة 11 يوم بس ويبدأ شهر رمضان وتزيد كرامات ربنا وفي ناس كتير ربنا هايرحمهم من العذاب وفي ناس كتير ربنا هايغفرلهم وفي ناس ربنا هايعتقهم من النار وفي ناس ربنا هيبلغهم ليلة القدر ... ياتري أنت عاوز إيه من ربنا السنة دي؟
حدد هدفك من رمضان أولا وياريت كل واحد مننا يكتب هدفه من رمضان في ورقة ويحطها في اكتر مكان واضح قدام عينه زي مثلا السرير .. الدولاب .. شاشة الكومبيوتر .. في العربية المهم تكون قدام عنيك على طول وماتبطلش تفكير في الهدف ده وفي نفس الورقة اكتب أساليبك لتحقيق الهدف ده وياريت مانزهقش بعد يوم أو يومين ونداوم على الفكرة دي لأخر يوم في رمضان وبإذن الله ربنا هينعم عليك بالرحمة أولا ثم المغفرة ثانيا ثم يهبك بإذنه الجائزة الكبرى وهي العتق من النيران. وفي آخر الشهر كلنا هانكتب إحنا عملنا إيه فعلا علشان نحقق الهدف ده ومحدش يقولي اللي انا عملته ده بيني وبين ربي لأ ربنا بيقول " وفي ذلك فليتنافس المتنافسون ". وكل واحد منا هايكتب بوست عن الفكرة يوم 21 أغسطس وكل واحد يكتب عن هدفه وناوي يحققه إزاي علشان نفيد بعض وكلنا هانكتب تحت شعار واحد وهوه " أمن يجيب المضطر إذا دعاه " وياريت كلنا ننشر الفكرة دي علشان صحبتنا دي نلاقيها في الجنة برضو وياريت كل واحد يحكي لأصحابة وقرايبه وجيرانه. وكلنا هانحط الصورة دي تحت الشعار.

أحب بس أقولكم إني مسافرة اليومين الجايين أروح أصيف بقى علشان أصفي نيتي قبل رمضان وربنا يهديني وأبطل أكل شوكولاتة وهارجع إن شاء الله على رمضان فاعذروني لو مقدرتش أرد على تعليقاتكم. كل سنة وأنتو طيبين






الأربعاء، 5 أغسطس، 2009

مرايتي قوليلي يامرايتي

شفتو الصراحة



جالي سؤال من أخواتي وحبايبي ديالا وآيوشة عن أصدق عشر حاجات في حياتي وطبعا لازم أشكرهم لأنهم اعتبروني صديقة من أول مادخلت عالم التدوين بالرغم من إننا عمرنا ماشفنا بعض بس حسيت فيهم الجدعنة
ودي كانت أول مرة حد يسألني سؤال صريح قوي زي ده بس بصراحة وبيني وبينكم حسيت إن أنا محتاجة أجاوب على السؤال ده فعلا لأن دي هاتبقى أول مرة أواجه نفسي بالصراحة دي
يمكن اكون أخرت في الرد على سؤالكم ده لأني ماكنتش عارفة أقول إيه وبتكسف أتكلم عن عيوبي المتلتلة. أنا في حاجات كتير صادقة في حياتي لأني أصلا صادقة جدا وهاأحاول أعصر دماغي واتكلم عن أصدق عشر حاجات في حياتي
أولا:
أصدق حاجة في حياتي وجود ربنا ورحمته الواسعة اللي إن شاء الله هاتشملنا بالرغم من كل ذنوبنا. وطبعا عشقي لحبيبي سيدنا محمد صلى الله عليه وسلم. وأكيد الموت والعذاب والجنة والنار
ثانيا: إخلاصي في علاقتي بالناس اللي بحبهم واللي مابحبهمش لأن الناس اللي بحبهم دول كنز مقدرش أخونهم أو أعاملهم بطريقة وحشة والناس اللي مابحبهمش قمة إخلاصي معاهم إني بتجاهلهم علشان ماتعبش وماتعبهمش
ثالثا: عشقي لأهلي لأن اللي مالوش خير في أهله مالوش خير في حد

رابعا: ثقتي بنفسي واللي وصلتلها بعد سنين من العذاب وعدم الثقة بالنفس وعدم الرضا عن الذات
خامسا: إيماني بإن " من يتق الله يجعل له مخرجا ويرزقه من حيث لايحتسب"
سادسا:
بحب أكون أنا يعني بحب أعيش على طبيعتي إلى أبعد الحدود وأنسى كلام الناس اللي هدفه الوحيد يكسرني ويفقدني اعتزازي بنفسي
سابعا:
عشقى لعملي في الترجمة ويقيني بالله بأنه سيكرمني
ثامنا:
بحب اتحدى الدنيا اللي برضو مالهاش لازمة دي وأهزمها شر الهزيمة وأعرفها أنه لن يأتيها أحدا بعدي يهزمها كما كسرتها أنا
تاسعا:
حبي وإخلاصي لحياتي اللي جاية يعني أنا بخلص للشخص اللي هارتبط بيه من قبل ماأشوفه وأتمنى يكون زيي كده
عاشرا:
بحب قوي الناس المثقفين والناس اللي دماغها عالية قوي في العلالي


وعلشان أكون صريحة هاأقولكم أكترعشر حاجات بكرهها قوي


أولا:
عصبيتي هي أوحش حاجة في شخصيتي يعني سعادتك تكون قاعد مع واحدة مجنونة زي حالاتي كده وتلاقيني مرة واحدة اتعصبت ونطيت عليك وعضيتك وامشي واسيبك اتعصبت ليه بقى (والله لما أحمد نظيف يسيبنا في حالنا ماهاتعرف ولا أنا هاعرف) المشكلة إن الجنان ده طال الناس كلها حتى بابا وماما (ربنا يصبرهم عليا)
ثانيا:
كرهي الشديد للغلط بيخليني أضايق ناس كتير لأني بكون قاصدة خير بس بيكون شكله وحش قوي في الآخر
ثالثا:
بكره العيال الصايصة بتوع النو ويست والحظاظات
رابعا: بالرغم من أني طيبة قوي وبسامح كتيييييير بس لما بكره حد بكرهه أكتر من كراهية المصريين لتصريحات بطرس غالي

خامسا: مش مرنة خالص يعني لامؤاخذة كده دماغي زي القفل المصدي ومابحبش حد يقنعني بأي حاجة غير اللي في دماغي ومابحبش التغيير
سادسا:
بكره الناس اللي بيكدبو ويصدقو نفسهم
سابعا: بكره اللف والدوران والناس اللي بتحور وتنقل كلام
ثامنا: بكره كسلي قوي ونفسي أكون زي السحلفة اللي هي أنشط مني بكتيييير
تاسعا:
بكره السلبية عموما وسلبية المصريين خصوصا
عاشرا: أحيانا بكون حشرية ورغاية قووويييي وده بيعملي مشاكل كتيير وخاصة لما بتكلم بحسن نية وأتفهم غلط

حادي عشر: ....بكره


آه آه آآآآه خلاص خلاص كفاااية مين اللي رمى الطوبة دي ... آآآآه وكمان طماطم لأ...لأ بيض لأ
خلاص هقعد ساكتة
كانت معكم شوكولاتة من عنبر 7 بالقصر العيني بعد علقة موووت

السبت، 1 أغسطس، 2009

ياتجيبلي الشوكولاتة يابلاش ياولا


باااااااااااااس كفاية بقى ارحموني
ده انا لسه نغة ويدوب لسه مكملة 21 سنة من تمناشر شهر كده انا لحقت ... ارحمونى بقى كل شوية مش هتتجوزي مش هتتجوزي اروح اخطف واحد يعني خدنا ايه من الرجالة غير حلاقة الدقن والتسبيل
أه انا فعلا لما حد بيتقدملي يبيقى دهل كده وبصريح العبارة كده بيبقى ليهم مواسم. بيقولوا دايما ان اى بنت ليها فترة كده وأنا الموسم بتاعي كان من سنة كده.... تلاقى في الموسم بقى ماسورة عرسان ضربت فى المكان وفجأة ما تلاقيش كلب حتى يعبرك... يلا ماعلينا

المهم ان كلام الناس عملى ازمة نفسية جامدة زى ما اكون هجوز نفسي ولا اروح اخطب واحد وللاسف الازمة دي خلتني افكر بطريقة مختلفة خااااالص
فكرت في كل حاجة ممكن توقعني في عريس كده فكرت ألبس ضيق قوي و مشخلع كده ولا أكني في فيديو كليب أو ألبس بنكلون سكيني ولا سكركش وأخرج أدلع في أي نادي أو أشتغل حتى مع فرقة علشان كل يوم أروح فرح المهم اتجوز وقلت اروح كل افراح الناس اللى اعرفها واللى معرفهاش يمكن حد يمشي ورايا ولو محدش مشي اهوه يبقى خدتلى حتة جاتوه وخلاص وأخيرا لقيت ماما قاعدة كده مش على بعضها وعمالة تقدم خطوة ورا وخطوة قدام.
ماما: شوكولاته حبيبتي طنط عنايات جايبالك عريس لقطة بس إيه يابت شكله من نصيبك وهاييجي يزورنا بكرة.
شوكولاته: (قشطة) عريس ... عريس إيه بس ياماما مانتي عارفة أنا مابفكرش في الحاجات دي خااااااااالث (وطبعا أنا قلبي بيرفرف في السما السابعة دلوقتي وعمالة أفكر في الجرابيع اللي بيقولولي أنتي هتعنسي وفي أعضاء حزب المفلسعين من على السلالم واللي كانو بيقلقوا من عتبة بيتنا تكونش عتبة نايلو ومحدش هيعرف يعدي عليها)
ماما: يوه ... يوكسك ياموكوسة ماتفكريش فى ايه يا بت اخلصى ياللا ساعديني عشان ننضف البيت وبعد كده نقعد نرتب مع أبوكي إحنا هنقول إيه للعريس
شوكولاته: طالما فيها تنضيف طب مانقابله بره أحسن
ماما: ماتقرفنيش بقى إنتي شكلك هاتعنسي بجد شالله عنك مااتنيلتي خلاص نتصل بالناس نقولهم إحنا مش موافقين وخلاص مش كفايه إنك ماشية بمعدل بطئ قوي
شوكولاته: (حتى أنت يابروتوس) حاسبي بس على نفسك ياماما أنتي صاحبة مرض خلاص هانضف معاكي (قال نتصل بيه قال ده أنا كنت أولع في البيت هوه حد لاقي عريس اليومين دول .... قطيعة محدش بياكلها بالساهل )
الساعة دلوقتي 5 العصر أمي جابتني من دماغي ودخلتني الحمام وقالتلي لازم تتليفي كويس علشان نخلص بقى
شوكولاته: نعم هوه المحروس هايتشدد من أولها كده وبعدين مانا حلوه أهوه ولسه مستحمية من ساعة آخر عريس شرف حدانا أنا صحيح مش عارفة كان إمتى الكلام ده بس أنا متهيألى إنى استحميت ساعتها (ماحبيتش أطول في الكلام علشان ماما ماتتهورش)
الساعة دلوقتي 6 المغرب يامسهل يارب
جربت كل اللبس اللي عندي واخترت الحتة اللي ع الحبل اللي ممكن توقعه في دباديبي
الساعة 9 ونص تيرن تررن تررن
شوكولاته: أنا هنا هنا ياابن الحلاااااااااال لا عايزة جاه ولا كتر مال
ماما: ياللا يابت ادخلى أوضتك العريس جه
شوكولاته: (ياحلولي) انا مش هقابله يا ماما اتكسف خالث مالث
ثانية وكنت بسبق ماما على الصالون وواقفة قدام المحروس وعمالة اتفرج عليه ولا اللي أكون بتفرج على جون مصر في نهائي كاس العالم
حمايا: نتكلم بقى في التفاصيل أنتو عايزين شبكة بكام
بابا: عيب ياريس الكلام ده احنا بنشتري راجل
حمايا: خلاص يا حج وإحنا كمان شاريين إحنا هانجيبلها طقم السوليتير اللي تشاور عليه موافقة ياعروسة
شوكولاته: ماتكلفوش نفسكم ياعمي (قشطة علشان أعرف أتأنعر براحتي ع العيال ولاد اللذينة المعنسين صحابي دول)
بابا: والشقة تكون هنا جنبنا كده أيجار او تمليك على قد ماتقدر يابني
حماتي: لأ ده جيمي عنده فيلا في الزمالك جنب شغله كده
بابا: طب والمؤخر هايكو......
المحروس: لأ ياعمي ماتقلقش أنا هامضيلكم على شيك على بيا.....
شوكولاته: لولولولولولولوللولولولولووووووووووووووووووى ........ ألف مبروك علينا ياللا نقرا الفاتحة ولو مش حافظينها خلاص دي شكليات والفرح يوم الخميس الجاي إن شاء الله


يوم الجمعة بقى

شوكولاته: ياه وأخيرا اتجوزت وماعدش ناقصني حاجة محدش له كلمة عليا ولاحد له عندي حاجة

وعلشان طبعا سعادتكم دلوقتي مزبهلين أدي صورتى لما السعد جانى



شوفتونى وسط صحباتى
ملحوظة أنا المتعوسة الأولانية على اليمين




وآدي صور الألبوم



يعني بعقلكو كده هوه فيه عريس في مصر يقدر ع الطلبات دي إلا جيمي











الخميس، 23 يوليو، 2009

نأسف على الإزعاج


عشان في الآلآف زيي مش عارفين يعبروا عن رأيهم
بصراحة هما مش ألاف هما ملايين من شبابنا العربي

عشان أنا محتاجة لكم ولرأيكم اكتر من حاجتكم لكلامي
عشان بيمر علينا أوقات كتير مابنعرفش نعمل ايه أو نكلم مين
يمكن لما تقرا المدونة دي نرتااااااااح
عشان أنا لحد النهارده مش قادرة اتكلم بصراحة وأكيد في ناس كتييير منكم زي
عشان قررت أتحدى نفسي وأتحدى الدنيا اللي مالهاش لازمة دي وأعرفها أني أقدر أعمل أي حاجة

لو حاسس إنك محتاج أي حاجة من الكلام الكبير اللي فوق ده تابع المدونة دي وافهم أنا عايزة أقولك إيه

وأخيرا بشكرأخويا الكبير
ميخو لأن هوه واحد من الناس اللي شكلوا شخصيتي وربنا يرجعهولي بالسلامة

وكمان بشكر كل المدونيين اللي ميعرفونيش بس ساعدوني كتير قوي لما قريت مدوناتهم
وتحياتى وأمنياتى للجميع بالتوفيق