ألف نيلة ونيلة

(مش عارفة ليه حسيت إني لازم أحط الصورة دي)

من كام يوم كده سمعت إن اليابان يعني مش الصومال ولاحاجة هتقفل المدارس علشان خايفين من أنفلونزا الخنازير وكمان عمان هتأجل الدراسة شوية لحد ماالناس تعرف راسها من رجليها
بعدها بخمس دقايق بس طب عليا سعادة الأستاذ الدكتور المهندس اللواء الوزير يسري الجمل وشكله كان واكل اكلة جامدة حبتين علشان العيار كان تقيل قوي المرة دي وطلع قالها كده ببجاحة ( الموسم الدراسي 2009 / 2010 هيبدأ في معاده يوم 26 سمتمبر) مش عارفة ليه حسيت إن بطني وجعاني كده ونفسي غامة عليا يعني اليابانيين اللي مابيفهموش جنب المصريين حاجة فهمو وهيقفلو المدارس وخايفين على البشر بتوعهم اللي مالهمش لازمة دول وإحنا نقول المدارس في معادها إحنا كده نبقى ماشيين بمبدأ التيتا في الننا والننا في التيتا يمكن علشان دي فرصة ذهبية للحكومة اللي دايما بتسعى لراحتنا انها تخلص منا ونموت موتة ربنا بقى بدل مايغرقو العبارات وياكلونا عيش مسرطن ويشربونا مية مجاري واهوه يحكمو شوية الشعب الباقي ده لو فاض يعني على رواقة ويوفروا اللي كانو بيصرفوه علينا

قلت يابت يا شوكولاتة استني اسمعي أكيد الحكومة الرشيدة بتاعت بكار عندها وجهة نظر تانية فسألت نفسي سؤال غبي كده وقلت طب ليه ياسعادة الوزير؟
رد ببلاهة كده وقال لأننا مسيطرين على المرض في مصر ( بأمارة 845 حالة اللي طلعو كلهم في 3 تشهر واقطع دراعي من لغلوغه لو ماكنش في صفرين ولاحاجة قدام الرقم ده وعلى فكرة مصر تعتبر من آخر الدول اللي ظهر فيها المرض وكان يوم 2 يونيو ) طب سؤال ضغنن كده بس محشور في زوري يكونش البعيد بقى وزير صحة وأهوه نبقى ضربنا حما... احم احم حمامتين بحجر نبقى خلصنا من وش السعد في الصحة ورحمنا التعليم شوية يعني بتوع منظمة الصحة العالمية كانو محششين لما أعلنو المرض وباء عالمي وأنه خرج عن السيطرة وأنهم متوقعين موت الملايين بسبب المرض ولما سألوه طيب إيه إجرائتكم لحماية الأطفال من المرض قال إحنا هنخصص فترات من الأسبوع الأول في الدراسة للتوعية بخطورة المرض بالإضافة إلى الاهتمام بالتهوية الجيدة والنظافة (موت ياحمار ده احنا دافنينه سوا) وطبعا قرر تخفيض الكثافة الطلابية بالفصول ل 100 طالب بس وهانعمل حجرة عزل في كل مدرسة علشان المدير لما ينعس يخش يعسل شوية

طب انا عندي اقتراح جه في دماغ أي واحد عبيط ليه مانلغيش المدارس السنة دي أو نأجلها للصيف ؟
وأهوه يبقى عندنا سنتين فراغ يونسو بعض بس لأ طبعا مش هاينفع علشان كده إحنا هنأخر دفعة العلماء اللي طالعة دي وهنسبب جزمة اقتصادية في بنوك سويسرا وهنموت المدرسين الخصوصين مشلولين

ولما سألو وزير الصحة عن ضرورة إغلاق المدارس قال إيه ياولاد ؟؟ إحنا لو قفلنا المدارس العيال هتلجأ للشوارع وده هيؤدي إلى انتشار المرض ده على اساس إن العيال كانو مستخبيين طول السنة ومقضينها مكتبات ومعسكرات ثكافية

وطالما الحكومة واخداها عند أنا من هذا المنزنق بنصح كل شاب وكل فيتاه لاتذهب الى الجامعة ولا للمدرسة يعني اللي اتعلمو اخدو ايه من العلام

(نموت نموت وتحيا الحكومة الإلكترونية)

في نهاية البوست أحب أقولكم نكتة تموت من الضحك

فيروس اتش وان إن وان بيعيش على العملات المعدنية لمدة أسبوووووووووعين

وسمعني سلام ماتزوقيني يا ماما قوام يا ماما ده عزرائيل جاي يشيلنا بالسلامة يا ماما