عيد ميلاد ميخو

(كل سنة وأنت طيب ياميخو)

لا استنوا ماتروحوش هناك ده مش ميخو بتاعكم ده ميخو بتاع شوكولاتة وميخو الصغنون ده عيد ميلاد ميخو الأب
النهاردة يوم 15 سبتمبر ميخو حبيبي جه ونور الدنيا

ميخو حبيبي كان بياخدني كل يوم معاه النادي ويجيبلي إزازة شاني فاكرينه أيون هو أبو خمستاشر قرش ده ولما كنا نروح كان بيعشيني من إيده الحلوة وكان بيعملي أحلى طبق فول بطماطم في الدنيا وسندوتش الجبنة الرومي اللي أنا بحبها (آخر العنقود بقى ومدلعني) ولما كبرت شوية ودخلت المدرسة كان كل يوم يوصلني للباص بتاع المدرسة ويقولي أوعي تعيطي ياروقة (وده لحد النهاردة أكتر اسم دلع أنا بحبه) وكان كل يومين تلاتة كده كان ييجي ياخدني من المدرسة ويقعدني جنبه في العربية ويقعد يلاعبني ويجيبلي طبعا شوكولاتة وبعدين لما نروح كنا نقعد نتغدى وكان أحيانا بيأكلني هوه بنفسه وبعدين يوديني الكتاب علشان أحفظ قرآن ولما أرجع يقعد يذاكرلي ويحل معايا الواجب وكان دايما بيذاكرلي العربي والحساب وطبعا كان بيزعقلي ياما وبعد كده ينزل يروح يكمل شغله أو يقعد مع أصحابه في النادي وكان لازم ييجي حاطط لإيده ورا ضهره علشان كان لازم يجيبلي وهوه جاي باكو بسكويت رشا فاكرينه بتاع فؤاد خليل لما كان يطلع يقول أنا عايز رشا هاتولي رشا وبعدين نتعشا سوى وكنت لازم بعد كده أأنتخ على حجره ويروح ياحول الله شايلني ومدخلني أوضتي بس كنت دايما بستهبل وأروح أقوله أنا تعبانة يابابا زوري واجعني يابابا يقوم بكل حنية ياخدني في حضنه ويحكيلي حدوتة الديب وماكنش ياعيني يعرف غيرها وكان بيحكيهالي كل يوم وفاكرة لما كنت أحفظ سورة من القرآن كان لازم يجيبلي حاجة حلوة فاكرة يوم ماحفظت سورة الفيل اتصل بيا من المكتب وقالي حفظتي السورة وسمعتهاله بعدها قالي طب افتحي درج البوفيه تحتك وهتلاقي فيه حاجة حلوة كان جايبلي علبة ألوان فلوماستر علشان كان عارف إن دي أكتر حاجة بحبها

أكتر حاجة بقى بتفرحني دلوقتي أنه كان نفسه أبقى بيرفيكت في الإنجليزي والحمد لله دلوقتي بقيت مترجمة ومدربة إنجليزي كحكوحة على قدي كده بس على طول بيحب يفتخر بيا وبيسألني على طول على كلمات إنجليزي نفسه يعرفها وكمان كل يوم خميس يروح يجيبلي الأهرام ويكلي علشان أقوي لغتي

وأجمل حاجة بحبها فيه حنيته اللي مالهاش حدود يعني لما بيكون حد منا تعبان بيبقى هوه كمان تعبان وممكن يعيط عليه ولا لما أخرج واتأخر دقيقة عن معادي يقعد يرن عليا ويكلمني ولا لما أسافر أنا أو يسافر هوه بيبقى عصبي جدا ونفسه ماسافرش بأي طريقة علشان هيقلق عليا قوي ولما يزعلني بيبقى مش قادر يسيبني زعلانة وببقى صعبانة عليه قوي بصراحة عمري ماشفت حد في الدنيا دي في حنيته

أنا بس عاوزة أقوله أنا بحبك قوي يابابايا ياحبيبي وربنا يخليك ليا ويباركلي فيك وماتزعلش مني علشان أنا بزعلك كتير بس إنت عارفني مجنونة بس والله غلبانة خالص وبمووووووووت فيك
ممكن بقى كلكم تدعوله يخليه ويباركلي فيه وادعوا كمان لأبهاتكم