الثلاثاء، 15 سبتمبر 2009

عيد ميلاد ميخو

(كل سنة وأنت طيب ياميخو)



لا استنوا ماتروحوش هناك ده مش ميخو بتاعكم ده ميخو بتاع شوكولاتة وميخو الصغنون ده عيد ميلاد ميخو الأب
النهاردة يوم 15 سبتمبر ميخو حبيبي جه ونور الدنيا



ميخو حبيبي كان بياخدني كل يوم معاه النادي ويجيبلي إزازة شاني فاكرينه أيون هو أبو خمستاشر قرش ده ولما كنا نروح كان بيعشيني من إيده الحلوة وكان بيعملي أحلى طبق فول بطماطم في الدنيا وسندوتش الجبنة الرومي اللي أنا بحبها (آخر العنقود بقى ومدلعني) ولما كبرت شوية ودخلت المدرسة كان كل يوم يوصلني للباص بتاع المدرسة ويقولي أوعي تعيطي ياروقة (وده لحد النهاردة أكتر اسم دلع أنا بحبه) وكان كل يومين تلاتة كده كان ييجي ياخدني من المدرسة ويقعدني جنبه في العربية ويقعد يلاعبني ويجيبلي طبعا شوكولاتة وبعدين لما نروح كنا نقعد نتغدى وكان أحيانا بيأكلني هوه بنفسه وبعدين يوديني الكتاب علشان أحفظ قرآن ولما أرجع يقعد يذاكرلي ويحل معايا الواجب وكان دايما بيذاكرلي العربي والحساب وطبعا كان بيزعقلي ياما وبعد كده ينزل يروح يكمل شغله أو يقعد مع أصحابه في النادي وكان لازم ييجي حاطط لإيده ورا ضهره علشان كان لازم يجيبلي وهوه جاي باكو بسكويت رشا فاكرينه بتاع فؤاد خليل لما كان يطلع يقول أنا عايز رشا هاتولي رشا وبعدين نتعشا سوى وكنت لازم بعد كده أأنتخ على حجره ويروح ياحول الله شايلني ومدخلني أوضتي بس كنت دايما بستهبل وأروح أقوله أنا تعبانة يابابا زوري واجعني يابابا يقوم بكل حنية ياخدني في حضنه ويحكيلي حدوتة الديب وماكنش ياعيني يعرف غيرها وكان بيحكيهالي كل يوم وفاكرة لما كنت أحفظ سورة من القرآن كان لازم يجيبلي حاجة حلوة فاكرة يوم ماحفظت سورة الفيل اتصل بيا من المكتب وقالي حفظتي السورة وسمعتهاله بعدها قالي طب افتحي درج البوفيه تحتك وهتلاقي فيه حاجة حلوة كان جايبلي علبة ألوان فلوماستر علشان كان عارف إن دي أكتر حاجة بحبها



أكتر حاجة بقى بتفرحني دلوقتي أنه كان نفسه أبقى بيرفيكت في الإنجليزي والحمد لله دلوقتي بقيت مترجمة ومدربة إنجليزي كحكوحة على قدي كده بس على طول بيحب يفتخر بيا وبيسألني على طول على كلمات إنجليزي نفسه يعرفها وكمان كل يوم خميس يروح يجيبلي الأهرام ويكلي علشان أقوي لغتي



وأجمل حاجة بحبها فيه حنيته اللي مالهاش حدود يعني لما بيكون حد منا تعبان بيبقى هوه كمان تعبان وممكن يعيط عليه ولا لما أخرج واتأخر دقيقة عن معادي يقعد يرن عليا ويكلمني ولا لما أسافر أنا أو يسافر هوه بيبقى عصبي جدا ونفسه ماسافرش بأي طريقة علشان هيقلق عليا قوي ولما يزعلني بيبقى مش قادر يسيبني زعلانة وببقى صعبانة عليه قوي بصراحة عمري ماشفت حد في الدنيا دي في حنيته



أنا بس عاوزة أقوله أنا بحبك قوي يابابايا ياحبيبي وربنا يخليك ليا ويباركلي فيك وماتزعلش مني علشان أنا بزعلك كتير بس إنت عارفني مجنونة بس والله غلبانة خالص وبمووووووووت فيك
ممكن بقى كلكم تدعوله يخليه ويباركلي فيه وادعوا كمان لأبهاتكم

هناك 58 تعليقًا:

the giving river يقول...

اول تعليق للجميله شوكولاته وكل سنه وميخو طيب ودمتم فى سعاده دائما
تحياتى لكى
محمد

the giving river يقول...

واليانى عشان اخود حتة شيكولاته ممكن ولا هتبخلى عليه ى
هههههههههههههههههههه

مي يقول...

كل سنة وميخو طيب وعقبال مليون سنة يابابا
وربنا يخليهولك ويفرح بيكى يابت يا شيكولاتة
عقبال مليووووووووووووووووووووون سنة فى صحة وسعادة

Unknown يقول...

جميل الكلام ده
الواحد إتأثر بجد
اصل طريقة سردك جميلة
ربنا يبارك لك فيه
و يباركله فيكى
و يحفظه ليكى
و عقبال مليون سنة يا عمو ميخوووو
يا جميل
:-)

الا صحيح هو الإنجليزى صعب دراسته
اصل كنت بحبه شوية و انا صغير
و دلوقتى خلاص انتهى بلارجعة اتنسى خالص
اصلى كنت مدارس لغات لحد ابتدائى
و فى الإعدادى بقى كملت عربى عشان شافوا ان دراسة الإعدادى بالإنجليزى صعبة

و بعد العيد ححجز كورس انجليزى

معلش لو استغليت جزئية الإنجليزى فى السؤال
---
تحياتى ليكى و لوالدك

بسمة انور يقول...

ربنها يخليهولك يارب ويفرحك بيك ياااااااااارب
ومتتحرميش منه ابدا خالص مالص طول العمر
وكل سنة وباباكى طيب وبصحه وخير دايما

Yusuf يقول...

كل سنة وهو طيب
مدونتك جميلة أوي

تحياتي

شوكولاتة يقول...

The giving river
وأنت طيب وربنا يخليلك كل اللي بتحبهم
ومبروك عليك ياباشا اول تعليق ومعلش والله أكلت الشوكولاتة نفضت المدونة استنى بعد العيد هاجيبلك كحك بالشوكولاتة
ههههههههههههههه

سلام وعيد سعيد عليك إن شاء الله

شوكولاتة يقول...

ميويا حبيبتشي
يارب يا أوختشي يارب
وأنتي طيبة ياقمراية أنتي ويخليكي ليا

وحشتيني يابت ياأمورة أنتي
كل سنة وأنتي طيبة والعيد الجاي أنتي عارفة بقى في بيت عدلك إن شاء الله

شوكولاتة يقول...

بدراوي
وأنت طيب يا أحمد وميرسي قوي على دعواتك الجميلة دي

وياسيدي بخصوص الإنجليزي هوه مش صعب خااالص للي يحبه ويدرسه علشان بيحبه أنت عارف أنا دايما بقول للدارسين عيش بالإنجليش ونصيحة مني ليك عاوز تتعلم إنجليش حلو اسمع النايل تي في وأنت أكيد عندك قاعدة كويسة لأن بداية دراستك كانت بالإنجليش وربنا يوفقك وأشوفك برابند أنجليزي
وياسيدي لاخرجت عن الموضوع ولا حاجة ولو احتجت أنا يشرفني إني أساعدك

كل سنة وأنت طيب وعيد سعيد عليك

شوكولاتة يقول...

بسمة أنور
الله يخليكي ياقمر كلك ذوق والله وربنا يستجيب دعواتك الحلوة دي ويخيليلك كل حبايبك

كل سنة وأنتي طيبة يابسومة

شوكولاتة يقول...

Yusuf
وأنت طيب يايوسف وميرسي على المجاملة الرقيقة
أسعدتني جدا زيارتك شكرا ليك

تحياتي

غير معرف يقول...

ربنا يبارك لك فيه
ويطول فى عمره ويفرح بيكى عروسة ويشوف
ولادك وولاد ولادك
كنتى شقية ياشيكولاته
وليه كنتى انا حاسة انك شقية لغاية دلوقتى مش كده ولا ايه
اوعى تنسينى من الدعاء وانا والله مانسيتك سلامى للوالد
وكل سنة وهو بالف خير
تحياتى

شوكولاتة يقول...

أمي الغالية أم مالك
الله يسلمك وحشتيني جدا ياحبيبتي معلش كنت مقصرة معاكي اليويمن اللي فاتو بس كنت مشغولة شوية
ومين قالك إني كنت شقية أنا كنت مفترية وعفريتة كنت وش بلاوي
أنا والله مانسيتك من دعايا أبدا لأن ربنا بس هو اللي يعلم مكانتك الغالية في قلبي

كل سنة وحضرتك طيبة والعيد الجاي إن شاء الله نبقا كلنا في العمرة كده
بحبك قوي

لا تـــشـــتــــاق يقول...

كل سنه وبابا بألف صحه وسلام
وربنا يخليهولك يارب
حافظى عليه وخدى بالك منه واتمتعى بكل ذره حنيه فيه وليه ومنه

------ يقول...

كل سنة وهو طيب ياحبيبتى

ربنا يخليه ليكى وميحرمكوش من بعض

هو فيه احلى ولا اغلى من الاب دا بنكون من غيره زى التايهيين

كلامك حلو اوى

بس لو سمحتى بقى

انا عايزة حته شوكولاته مينفعش تاكلى لوحدك كدا

تحياتى لكى

وكل سنة وانت طيبة

غير معرف يقول...

ربنا يطول في عمره ويخليكي ليه يا رب

وكل سنه وهو بألف صحه وسلامه

noon kiko يقول...

ربنا يارب يخليهولك ويكفيكم شر العين
ويجعل ايامكم معاه كلها سعاده
ويديله الصحه يارب ويشوف ولاد ولادكم
ويفرح قلبه بيكم ويفرح قلبكم بيه ومايحرمكم من دخلته عليكم ولا يحرمكم من وجوده يارب
ويارب زى الايام دى يكون معاكم وتفتكروا البوست ده وتضحكوا

بوستك جميل يا شكولاته
بس كان الواجب عليكى تحطى المعوذتين ف اول البوست
ههههههههههه
محدش ضامن
مايحسد الاب الا بنته
هههههههههههه
كل سنه وانتو دايما بخير ياقمر ويجعل كل ايامكم فرحه وخير وعيد على طول
:)

Empress appy يقول...

كل سنه وهو وانتى طيبين وبخير يا رب

Me7'o يقول...

فاكرة يا بت يا شوكولاتة

لما بابا كان بيدلعك أكتر واحدة فينا

وكان لما واحد فينا يزعقلك يبقى يومه مش فايت

ومكنتيش بتحبى تخرجى مع أى حد فينا غير معاه هو علشان طبعاً احنا كنا مقشفرين ومكانش معانا شوكولاتة
هههههههههه

وكله كوم واللبس اللى كان بيجبهولك كوم تانى ... كنت بتغاظ منك قوى

هههههههههههه

ربنا يحفظه ويخلهولنا يا رب

وحشتينى يا قمر

Pink Dreams يقول...

كل سنه وهو طيب يا قمرى

ربنا يخليهولك يا رب وميحرمكوش من بعض ابدا

بس اقولك على سر بابا بردو زى باباكى كدا

ربنا يخليهولى يا رب

وكل سنه وباباكى طيب يا شوكولاتايه

احساس طفلة محبة للرومانسية بس واقعية يقول...

روقة يا قمر ينفع نقول كدا ولا دا لبابا بس

كل سنة وهو طيب وعقبال لما يشوف اولاد اولادك يارب ويلاعبهم ويجبلهم ساعتها كادبورى وكوكا
او يمكن يكون طلع حاجة جديدة :)

ربنا يخليهولك يارب ويباركله فيكى

تقبلى مرورى

ستيتة يقول...

شيكولاتة يا شيكولاتة
كل سنة وميخو سينيور بخير وجونيور كمان بالمرة والعيلة كلها
ربنا ما يحرمكم من صحبته ابدا ويبارك له في صحته ويجيب لك شيكولاتة كمان وكمان
وربنا يفرحه بجواز حضرتك وعيال حضرتك ويقعد يحكي لهم الحدوتة اليتيمة الوحيدة ههههههههههههههههه

شوكولاتة يقول...

لاتشتاق
وأنت طيب وربنا يقدرني أني أقدر أبره

كل سنة وأنت طيب وعيد سعيد عليك وعلى الأسرة كلها
سلام

شوكولاتة يقول...

دموع القمر

عندك حق فعلا بابا ده أحلى حاجة في حياتي لأني عمري مالقيت حد في حنيته خاااالص
المرة الجاية ابقي كبري خطك شوية أصلي ماعرفتش أنتي كنتي عاوزة أيه(وش بيغمز)
هههههههههههههه

كل سنة وأنتي طيبة ياقمر وعيد سعيد عليكي يارب

شوكولاتة يقول...

فتاة من الصعيد
وأنتي طيبة ياحبي
وحشتيني موووووووووووت يامروة يارب تكوني بخير وياريت تطمنيني عليكي باستمرار

كل سنة وأنتي طيبة وعيد مبارك عليكي

شوكولاتة يقول...

واحدة من الناس
ايه ياقمر الكلام الحلو ده بس ربنا يستجيب منك
وأنا اللي بقول بابا بيكح ليه من امبارح أتاريني قريت عليه أروح أرقيه بقى

عيد سعيد عليكي يانونا

شوكولاتة يقول...

Appy
وأنتي طيبة ياسكر وكل حبايبك بخير وبصحة دايما

كل سنة وأنتي طيبة وعيد سعيد عليكي

شوكولاتة يقول...

ميخو حبيب هارتي السكرة

بصراحة ياميخو أنا مش فاكرة قوي أصلي كنت مقضياها شوكولاتة أكيد أنت فاكر أحسن مني برضو شكلك أكلتك كام علقة محترمين بسببي ياحول الله
هههههههههههه
بس أنا فاكرة كويس وأنت في ثانوي كنت أنا فسلة صغنونة كده كنت لازم تجيبلي الملبس اللي بطعم الكولا معاك من المدرسة

كل سنة وأنت طيب ياميخو جونيور على رأي دكتورة ستوتة

شوكولاتة يقول...

Pink Dreams
وأنتي طيبة ياشوشو ياحبيبتي والله كل الأبهات حلوين قوي وبيحبونا أكتر حاجة
ربنا يخليلك باباكي ويباركلكم فيه ويشوفك عروسة زي القمر كده
أمووووووووووووووووووووووووه
كل سنة وأنتي طيبة وباباكي ومامتك وحبايبك كلهم طيبين

شوكولاتة يقول...

طفلة رومانسية
طبعا ياقلبي ممكن تقولي روقة ده اكتر اسم انا بحبه في الدنيا كلها
وبعد كده عيال عيالي مين دول اللي يجيبلهم شوكولاتة أمال أنا هاكون رحت فين؟؟ أمبوسيبل خالص

كوتي بكاكا مومو لالا
كل سنة وأنتي طيبة بالياباني

شوكولاتة يقول...

دكتورة ستوتة
آمين يادكتورة ربنا يخليهولي ويخليلك الوالدة
وبعدين سيبك من ميخو جونيور أصل عيد ميلاده ده مفاجأة
آه ع الحدوتة دي كان نفسي أحكيهالكم بس بلاش علشان ماتخافوش
هههههههههه

كل سنة وحضرتك طيبة يانوارتنا

رحلتنا في الحياة يقول...

كل سنة وهو طيب وبالصحة والسلامة وربنا يخليهولكم يارب

رنونة حكومة ميخو يقول...

كل سنة وحمايا حبيب قلبي بخير
لما ميخو الابن قالى ان عيد ميلاد ميخو الاب النهاردة فرحت قوي
ولما كلمته كان فرحان جدا ...
باباكي ده عسووووووووووووول جدا وطيب قوي
اجمل تورتاية لاجمل اب و احن حما فى الدنيا
وديه تورتاية منى نصها كريمة و نصها التاني شوكولاتة عشان خاطر روقة(( كاتبالك موضوع برده))http://4.bp.blogspot.com/_Vz8nOtMcsN4/R3xwvuF_hvI/AAAAAAAAAFg/nk-RSEKFfRE/s320/%D8%AA%D9%88%D8%B1%D8%AA%D8%A9.jpg

ربنا يخليلك بابتك وبابتي انا كمان ياختي
kol sana w 2nte tayba ya ro2te والعيد الجاي تكوني فى بيت جوزك
قولى انشالله

غير معرف يقول...

كل سنة وميخو طيب وعقبال الميت سنة

يابختك بيه نادر تلاقي اخ بالمواصفات دي

ربنا يخلهولك وميحرمكوش من بعض

بالتوفيق يالغلا

مسدس صغير يقول...

كل سنة وباباكى طيب
وربنا يبارك فيه
ويخليهولك ويخليكى ليه
ويبارك فى صحته وفى عمره

شوكولاتة يقول...

آيوشة
وأنتي طيبة ياعسل ده أنا كل يوم لازم أدعيله الدعوة دي ده دينامو البيت

عيد سعيد عليكي
وحشتيني موووووووووووووووووت
ياريت تطمنينا عليكي

شوكولاتة يقول...

رنونتي
وأنتي طيبة يارنوناياقمر وأنتي كمان بابا بيموت فيكي
وربنا يخليلك باباكي ومامتك وإخواتك يارب
حلوة قوي صورة التورتة دي

كل سنة وأنتي طيبة يارنونتي ياعسل والعيد الجاي يبقى معاكم روقة الصغيرة إن شاء الله

شوكولاتة يقول...

نوارتنا
وأنتي طيبة يانور بس على فكرة ده ميخو الأب مش ميخو الابن ميخو الابن لسه عيدميلاده ماجاش

ربنا يباركلك في كل اللي بتحبيهم
تحياتي ليكي ياقمر

شوكولاتة يقول...

مسدس صغير
وأنت طيب ياصلاح
وشكرا جدا على الدعوتين الحلوين دول وربنا يستجيب منك

كل سن وأنت طيب والسنة الجاية في صحة وسعادة إن شاء الله

فشكووول يقول...

عيد ميلاد مع عيد صغير

السلام عليكم ورحمة الله وبركاته

صوما مقبولا وافطارا شهيا

عيد سعيد اعاده الله عليكم بالخير واليمن والبركات

كل عام وانتم بخير

شوكولاتة يقول...

فشكول
كل سنة وحضرتك طيب ياعمو فشكول ويارب يكون عيد سعيد عليك كده وربنا يبلغك رمضان القادم

تحياتي

romansy يقول...

عيد ميلاد سعيد

اجمل التهاني وارق الاماني بحلول عيد الفطر المبارك
اعاده الله عليكم وعلينا بالخير واليمن والبركات
راجين من الله ان يديم علينا الاعياد والايام السعيدة
وان تستمر اعيادنا لابد

كل عام وانتم بخير

غير معرف يقول...

كل سنة وبابا طيب وعقبال ميت مليون سنة كلهم فرح وسعادة وربنا يخليهولك ويبارك لك فيه ويفرحه دايما بيكي بس انت حاولي ماتزعليهوش منك
وكل سنة وانت طيبة بمناسبة عيد الكحك قصدي عيد الفطر وعيد سعيد عليكي وعلى المسلمين كلهم يا رب
سلام

حنين القلب يقول...

كل سنه وميخو الصغير طيب
وميخو الكبير كمان

كل سنه وانتك بخير
وعيد سعيد عليكم

micheal يقول...

كل سنة وميخو طيب وبألف صحة وسلامة
ويخليكوا لبعض دايما
عيد سعيد عليكي وع الجميع
كل سنة وأنتي طيبة
تحياتي

حروف يقول...

كل سنة وانت طيبة وبباكي طيب
دمتي بالف خير

قيس بن الملووووح يقول...

عيد سعيد
وعمر مديد

ليس فقيرا من يحب يقول...

السلام عليكم

كل سنه وانتى طيبه ياحبيبتى

عيد سعيد عليكى وعلى كل حبايبك يارب

عمرو يقول...

كل سنه و أنت و الأسره بصحه و خير و سعاده و سلام ..
بارك الله فيك و تقبل تحياتى و تقديرى ..

شوكولاتة يقول...

رومانسي

وانت طيب يا أستاذ أحمد وربنا يعيد علينا وعليكم الأيام بكل خير

أسعدتني جدا زيارتك
تحياتي

شوكولاتة يقول...

أنا كده
وأنت طيب وعيد سعيد عليك إن شاء الله
ربنا يتقبل منك الدعوتين الحلوين دول وأنا والله بحاول كتير إني مزعلهوش مني

شرفتني بزيارتك الحلوة دي
تحياتي

شوكولاتة يقول...

حنين القلب

وأنتي طيبة ياقمر وعيد سعيد عليكي وعلى كل حبايبك أن شاء الله

نورتي المدونة
تحياتي

شوكولاتة يقول...

مايكليتو العميد

وأنت طيب يامايكل ويارب السنة الجاية أشوفك كده بتعمل برامج اجدع من برامج شوبير المملة دي
هههههههههههههه

شوكولاتة يقول...

حروووف

وأنتي طيبة ياجميل
وعيد سعيد عليكي وعلى كل حبايبك

شرفتيني بالزيارة الحلوة دي
سلام

شوكولاتة يقول...

قيس بن الملوح
عيد سعيد عليك وعلى كل المدونين يارب

أسعدتني جدا بزيارتك
تحياتي

شوكولاتة يقول...

ليس فقيرا من يحب

وأنتي طيبة ياروني ياحتة السكر وعيد سعيد عليكي بإذن الله

أموووووووووووه

شوكولاتة يقول...

عمرو

كل سنة وحضرتك طيب يا أستاذ عمرو
وده شرف ليا إن حضرتك تزور مدونتي الغلبانة دي ويارب ماتكون آخر زيارة

تحياتي

sab7al5air يقول...

الله يخلي ليك ابوك وابهاتنا كلنا ويمتعه بالصحه و العافيه يا ربي
تقبلي مروري
عُلا
علي فكره عجبتين المدونة وكمان الني بعشق الشوكلاته لها قدره عجيبه علي انها تنسيني الدنيا