الخميس، 10 سبتمبر 2009

ألف نيلة ونيلة

(مش عارفة ليه حسيت إني لازم أحط الصورة دي)

من كام يوم كده سمعت إن اليابان يعني مش الصومال ولاحاجة هتقفل المدارس علشان خايفين من أنفلونزا الخنازير وكمان عمان هتأجل الدراسة شوية لحد ماالناس تعرف راسها من رجليها
بعدها بخمس دقايق بس طب عليا سعادة الأستاذ الدكتور المهندس اللواء الوزير يسري الجمل وشكله كان واكل اكلة جامدة حبتين علشان العيار كان تقيل قوي المرة دي وطلع قالها كده ببجاحة ( الموسم الدراسي 2009 / 2010 هيبدأ في معاده يوم 26 سمتمبر) مش عارفة ليه حسيت إن بطني وجعاني كده ونفسي غامة عليا يعني اليابانيين اللي مابيفهموش جنب المصريين حاجة فهمو وهيقفلو المدارس وخايفين على البشر بتوعهم اللي مالهمش لازمة دول وإحنا نقول المدارس في معادها إحنا كده نبقى ماشيين بمبدأ التيتا في الننا والننا في التيتا يمكن علشان دي فرصة ذهبية للحكومة اللي دايما بتسعى لراحتنا انها تخلص منا ونموت موتة ربنا بقى بدل مايغرقو العبارات وياكلونا عيش مسرطن ويشربونا مية مجاري واهوه يحكمو شوية الشعب الباقي ده لو فاض يعني على رواقة ويوفروا اللي كانو بيصرفوه علينا
قلت يابت يا شوكولاتة استني اسمعي أكيد الحكومة الرشيدة بتاعت بكار عندها وجهة نظر تانية فسألت نفسي سؤال غبي كده وقلت طب ليه ياسعادة الوزير؟
رد ببلاهة كده وقال لأننا مسيطرين على المرض في مصر ( بأمارة 845 حالة اللي طلعو كلهم في 3 تشهر واقطع دراعي من لغلوغه لو ماكنش في صفرين ولاحاجة قدام الرقم ده وعلى فكرة مصر تعتبر من آخر الدول اللي ظهر فيها المرض وكان يوم 2 يونيو ) طب سؤال ضغنن كده بس محشور في زوري يكونش البعيد بقى وزير صحة وأهوه نبقى ضربنا حما... احم احم حمامتين بحجر نبقى خلصنا من وش السعد في الصحة ورحمنا التعليم شوية يعني بتوع منظمة الصحة العالمية كانو محششين لما أعلنو المرض وباء عالمي وأنه خرج عن السيطرة وأنهم متوقعين موت الملايين بسبب المرض ولما سألوه طيب إيه إجرائتكم لحماية الأطفال من المرض قال إحنا هنخصص فترات من الأسبوع الأول في الدراسة للتوعية بخطورة المرض بالإضافة إلى الاهتمام بالتهوية الجيدة والنظافة (موت ياحمار ده احنا دافنينه سوا) وطبعا قرر تخفيض الكثافة الطلابية بالفصول ل 100 طالب بس وهانعمل حجرة عزل في كل مدرسة علشان المدير لما ينعس يخش يعسل شوية

طب انا عندي اقتراح جه في دماغ أي واحد عبيط ليه مانلغيش المدارس السنة دي أو نأجلها للصيف ؟
وأهوه يبقى عندنا سنتين فراغ يونسو بعض بس لأ طبعا مش هاينفع علشان كده إحنا هنأخر دفعة العلماء اللي طالعة دي وهنسبب جزمة اقتصادية في بنوك سويسرا وهنموت المدرسين الخصوصين مشلولين

ولما سألو وزير الصحة عن ضرورة إغلاق المدارس قال إيه ياولاد ؟؟ إحنا لو قفلنا المدارس العيال هتلجأ للشوارع وده هيؤدي إلى انتشار المرض ده على اساس إن العيال كانو مستخبيين طول السنة ومقضينها مكتبات ومعسكرات ثكافية
وطالما الحكومة واخداها عند أنا من هذا المنزنق بنصح كل شاب وكل فيتاه لاتذهب الى الجامعة ولا للمدرسة يعني اللي اتعلمو اخدو ايه من العلام

(نموت نموت وتحيا الحكومة الإلكترونية)

في نهاية البوست أحب أقولكم نكتة تموت من الضحك

فيروس اتش وان إن وان بيعيش على العملات المعدنية لمدة أسبوووووووووعين

وسمعني سلام ماتزوقيني يا ماما قوام يا ماما ده عزرائيل جاي يشيلنا بالسلامة يا ماما

هناك 44 تعليقًا:

مي يقول...

بت يا شيكولاتة احم احم ادخل ولا ايه

مي يقول...

ههههههههه يا صلاة النبى انا اول تعليق

مي يقول...

يا لهوىىىىىىىىىىىى مش مصدقة يا اختى خدت جايزة نوفل فى التعليقات اخيرررا
لولىىىىىىىىىىى لوىىىىىىىىىى للووووووووووووولى
ترارررررررررررارتتتتتتتتتتتتتتتراراررررررررررررررررر

مي يقول...

يااااااااااااااااه عارفة احساس لما تجرى فى ملعب اهو كده احساسى هههههههههههههههههههههههه هاتى كورة بقى
ههههههههههههه

الشعب لابد له من حكومه تشكمه يقول...

ياا امى احنا المرض عمره ميأثر فينا ابسلوتلى احنا اللى بنأثر فيه اومال دحنا الفراعنه..
دحنا هنتدلع اخر دلع بس اصبرىىىى هتشى واحده وكل عام وانتم بخير هنقفل البلد ونروح ندور على مكان تانى نعيش فيه:))

مي يقول...

خلالالالالالالالالالالالالالالاص خلالالالالالالاص همشى بس متزوقيششششششششش يا بت
اولا وحشتييييييييييييينى جدا جدا جدددددددددددددددددددددددا والله
وفينك يا اختششششششى

هههههههههه ال مدارس ال ما كان ومان ده احنا عندنا اسكندرية ملغمة فتحوا المدرسة البريطانية لقوا كذا حالة قفلوها تانى مع ان المدرسة دى نظيفة جداااااااا ومستوى عالى لانهم كمان اجانب

وتعاقدوا مع دكتورة ممتازة بتبعت عربيات مخصوصة تكشف على الطلبة لو عطسوا بس مرة
كح كح كح

فما بالك بقى الحكومة واللى بنشوفوه فيها ولا الحمامات ونضافتها ولا الفصول وكثافتها حاجة فل فل

يسلملنا يسرى الجمل بصراحة اه لو تيجى انفلونزا الجمال
يبقى اشطه

هاتى بوسة يا ختى امواااااااااااااااه

"أحلام حقيقية" يقول...

هههههه ياستى تبقى جت من عند ربنا علشان نخلص من العيشة القرف دى

احساس طفلة محبة للرومانسية بس واقعية يقول...

فى نقطتين فى البوست استفزونى اولهم عدم الاهتمام بروح الانسان واهدار قيمته
و دا مش جديد ولازم ما كل يوم حد بموت بامراض وحرايق وفى قطارات ومفيش جديد وكله مستمر جت على مرض مميت يعنى وهو كمان الشعب عمل حاجة عشان الحكومة تعمل
ايوة الشعب لما قال لا للانترنت المحدود الحكومة قالت لا لان كلنا غضبنا يبقى لية مشفتش حد قال لا على فتح المدارس فى معادها كله بينتقد بس محدش قال لا مشفتهاش ولا لمستها زى ما لمست لا بتاعت تحديد النت

ثانيا
اليابان بلد بتقدر قيمة الانسان
ودا طبعا شئ انا لمستة لان حتى لو فى شخص بيعبر الطريق وحصللة حاجة حتى لو هو خطاء وعدى واشارة المشاه مقفولة الفرد اللى راكب عربية هو اللى بيتحاسب لان هو الاقوى واقدر تحكم مش الشخص اللى ماشى على رجلية او راكب عجلة فى البرد او الحر تخيلى تفكير شعب بالشكل البسيط واللى بيدى الانسان اهميتة كدا
اما بخصوص قفل المدارس فى اليابان طبعا لازم يعملوا كدا لان اول حالة اكتشفت كانت لطالب وبعدها اكتشفت 200 حالة لطلبة فى المدارس واهلهم واى انسان عاقل وعارف ان التجمعات بتنقل المرض وتسارع على انتشارة هيقفل مدارسة

الشئ التانى هى كلمة اليابانين اللى مبيفهموش جنب المصريين حاجة
الكلمة ضيقتنى لانى شفت الفرق لدرجة انى تطبعت بطباع اليابانين الجيدة فى التعامل وتقدير قيمة الانسان شفت ازاى بيخترعوا روبوت وبيعرضوها على كل الناس لان الكل يقدر يستخدمها مش على انه اختراع علمى ومؤتمرات وصحافة وبس اى فرد لية الحق فى المشاركة ومعندهومش حد مش بيفهم حاجة حتى الفراء فاهمين وبيشاركوا

شفت ازاى عملوا من مكان صغير باركينج عشان بقللوا الحوادث ومحدش يركن فى الشارع
مش شفته فى التلفزيون لا حقيقى
شفت ازاى بيحترموا الاديان ومش عندهم قتل وتعصب دينى محدش بيشتم ولا حد مش بيستخدم مناديل فى الشارع محدش بيزعق ولا بيزمر بالعربية محدش بيقطع وردة لدرجة انى بقيت بتكسف بس لو فكرت ان الوردة عجبانى وعايزة اخدها

مش عارفة اية استفزنى كدا بس حبيت اقولك ان حاليا الشعب اليابانى شعب مسلم بلا اسلام ناقصهم صوم وصلاه وقول الشهادة
بس احنا عندنا دول وناقصنا اشياء كتير
لازم نعيش وسطهم عشان نتعلم منه لانه شعب حقيقى محترم وفاهمين حاجات كتير اكتر مننا

شكرا ليكى
سعيدة بزيارتة مدونتك
والتنافش وعرض الافكارمعاكى
تقبلى مرورى

غير معرف يقول...

يابان ايه يا بنتي ..... دي تيجي جنبنا ايه ؟

احنا بتوع السيطره ع الامن والفيروسات وجميع ما يلزم السيطره

انا موصيه ولاد اختي محدش يعتب المخروبه المدرسه لغايه ما نشوف حل .... وعلى رايك خدنا ايه من التعليم ... واللي خادته خالتهم يبقوا ياخدوه هما

Pink Dreams يقول...

يا بنتى ما هى البلد كلها كوسه يعنى جت على التعليم

فيه مثلا المبيدات اللى بيدخلوها البلد والاطعمه الفاسده

مجتش بقى على الانفلونزا

ايييييييييييييييييه دنيا

Me7'o يقول...

يابنتى دى الحكومة المصرية
القاهرة

قاهرة الأزمة الاقتصادية
قاهرة إنفلونزا الطيور
قاهرة التيفود
قاهرة الخنازير
قاهرة السرطانات
قاهرة الكبد الوبائى

وأخيراً

قاهرة المواطن المصرى

ده على أساس إن المواطن المصرى بيمثل أكبر أزمة بالنسبالها

سلام يا أختى
وحشتينى

حبات التوت يقول...

شكولاتة انا اول مرة ادخل عندك وادوق شكولاتة من عندك

وبما انى بعشق حاجة اسمها شكولاتة
هتلاقينى عندك كل يوم لازقة هههههههه


نيجى باه لموضوعك بتاع المدارس وانفلونزا الخنازير

فاانا بحى الحومة على الفكرة الجهنمية بتاعتها

بجد ازاى تخلص من سبعين مليون مرة واحدة يااااااااااااهو بجد فكرة تحفة بما ان فى مرضو ووباء نخليهم يبدؤا الدراسة والزحمة والقرف

بجد احمدك يارب حكومتنا ذكية اوى اوى


بس بما ان انضف مدراس وانضف ناس فى اسكندرية جالهم المرض امال يالهوى مدرسة سيدة نفسية فى ههيا هتعمل اية

ربنال يستر

شوكولاتة يقول...

بتستأذي بعد ايه بعد مااختليتي البلوج يامفترية ايه يامي عجبتك القعدة هنا ولا ايه الاستاد مقفول دلوقتي يابيضة ياللا بقى علشان هنرش ميه شكلك لسه متسحرة وفايقة عليا
هههههههه

شوكولاتة يقول...

شيما الشعب حبيبي وشرياني

بس يا ماما أنتي وهيه العبو من غير ماتتشاقو ايه هوه بلوج من غير بلوجر ولا ايه
ههههههههههههه

انتي بتقولي هيه هاتشي واحدة علشان ندلع طب اهوه هاتشو هاتشووو هاتشي
حد يلاقي دلع ومايدلعش

شوكولاتة يقول...

مي
وانتي حد قربلك ولاهي تلاكيك وخلاص
انتي وحشتيني خالص يامويتي ياحبيبتي ووجعتي قلبي حتى العيال البروبروء دول بيجيلهم انفلونزا خنازير العيال اللي متربيين على الغالي دول ياخسارة الغالي أومال العيال الغلابة اللي في المدارس أم اتنين جنيه ونص دول هايجرالهم إيه؟؟

أمووووووووووووووووووووه
سلاموز

شوكولاتة يقول...

أحلام حقيقية
بصي هي نظرية برضو بس أنا شايفة إن الحكومة دي معندهاش بعد نظر يعني بعد ما كلنا نموت وكده هما هيعكننو على مين والله ده حالتهم هتبقى صعبة خالص
ههههههه

وحشتيني مووووووووت

شوكولاتة يقول...

طفلة محبة للرومانسية بس واقعية

أولا نورتيني ياقمر في مدونتي الغلبانة دي وأكيد أنا يشرفني إني أتناقش معاكي وتهمني قوي وجهة نظرك
ثانيا أنا معاكي قلبا وقالبا في النقطة الأولانية لأن سبب أني كتبت البوست ده هو إني قريت اللي حصل في المدرسة البريطانية والمدرسة الأمريكية بالأسكندرية كنت مضايقة قوي لما الناس دي قومت الدنيا ومقعدتهاش وحللت لجميع الطلبة وقفلو المدارس طيب اشمعنى احنا مانقفلش المدارس علشان ببساطة عمر بلدنا ماقدرت حاجة اسمها إنسان ولا علشان دول بيدفعو فلوس والمدارس بتاعت الناس الغلابة مش مهم
الحاجة التانية انتي حسيتي لا بتاعت تحديد الانترنت لأن النت والتدوين جزء كبير قوي من عالمك علشان كده في ناس كتير قوي اتكلمت عن الموضوع ده لكن أزمة المدارس لسه في ناس كتير مش مقدرة حجم المصيبة اللي احنا داخلين عليها بس على فكرة في ناس كتير قوي قرروا انهم مش هيودوا أولادهم المدرسة السنة دي
النقطة التانية
بصي ياجميل أنا اليابان دي حلم من أحلامي وده يمكن جزء شدني أني اتعرف بيكي بالإضافة لشخصيتك العاقلة جدا اللي لمستها في بوستاتك واليابان دي أكتر بلد أنا بحبها وبحترمها في حياتي وأنا قلت الكلمة دي على سبيل السخرية فقط وأنا عارفة ومتأكده إن اليابانيين من أفضل شعوب العالم على الإطلاق وعمري ماقصدت المعني اللي انتي فهمتيه خالص لأن الناس دي لو ماكانوش بيفهمو حاجة فعلا ماكنوش بقوا أعظم دولة في العالم وماكنتش تكنولوجيا اليابان غزت العالم بالشكل ده وبالجودة دي واوعي تكوني زعلتي مني ياقمر
وعجبتني قوي كلمتك في الآخر وفكرتني بكلمة الإمام محمد عبده لما راح باريس

تحياتي ليكي ويارب دايما متواصلين

شوكولاتة يقول...

فتاة من الصعيد
على رأيك إحنا بتوع الأمن والنظام والسيطرة على الفيروسات والمبيدات المسرطنة والقمح المغشوش والذي منه

سؤال بس صغنن كده هوه أنتي درستي حاجة في المدرسة أصل أنا مادرستش حاجة خالص

وحشتيني موووووووت

شوكولاتة يقول...

pink dreams
إزيك ياشوشو وحشاني خالص والله
هي البلد كلها بقت كوسة طيب على كده الكوسة رخصت ولا لسه معلقة على تلاته جنيه
هههههههه

ماتفكرنيش والنبي بالبلاوي التانية دي خلاص انا مابقتش قادرة استحمل خالص

سلام ياقمر

شوكولاتة يقول...

ميخو حليب هارتي السكرة
عجبتني كلمتك قوي ياواد ياميخو وفعلا حكومتنا الرشيدة بتبذل كل مافي وسعها للقضاء على ظاهرة المواطن المصري

وحشتني خالص ياابن اللذيذة

شوكولاتة يقول...

wella
أنا طول عمري بقول الحكومة الذكية دي هي اللي هتنجينا وتريحنا آآآآخر راحة راحة ومش جاية

نورتيني ياقمر وشرفتيني بزيارتك

blue-wave يقول...

احنا مبتفرقش معانا

شوكولاتة يقول...

blue wave

ده احنا اللي هنموت الفيروس مشلول

نورتني

رنونة حكومة ميخو يقول...

يا ستي يعني لو اجلوا الدراسة ولا لغوها حتى ... ده هيحمينا من الفيرس...ده نص اطفال مصر قاعد فى السيبرات والنص تاني داير فى الشوارع يلعب كورة وبيعملوا كل انواع القرف فى الشوارع ... وغلاوتك عندي هما اللى هيموتوا الفيرس ..واديهم كده كده متجمعين ع الخيبة ..يبقى يتجمعوا على حاجة عدلة احسن ..يلا مانا كده كده ميت..وكمان فى العملات المعدنيه ..بالسلامة
يالهوي ده انا مزكمة خالص
اوعي

اه حلوة قوي التيتا فى الننا والننا فى التيتا
هههههههههههه

غير معرف يقول...

السلام عليكم
ههههههههههههههههه
اليابان طول عمرها دوله متقدمه جدا
دوله بتقدر المواطنين
شفتي برنامج خواطر 5؟
اناببقي قاعده في حالة ذهووووووووووول
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
ربنا يخليهم _والعكس اصح _
في رعاية الله
السلام عليكم

micheal يقول...

ههههههههههههههه..ده أنتي لازم تبقي رئيسة وزراء يا شوكولاتة
علي رأيك هما اللي إتعملوا خدوا إيه غير الإنترفيوهات
:)

noon kiko يقول...

بصى يا حتة الشكولاته اللى محليه المدونات
لا انفلونزا طيور ولا خنازير ولا طاعون ولا يحزنزن يقدر يأثر ف شعب قهر الاسرائيليين
شعب الفول المدمس
والعيش ابو مسامير
اللى يبلع الرغيف ابو مسامير من هنا ويتكرع ويقول كمااااااااان
فلا تقلقى
شعبنا حديد
وانا ركبى حديد
:)

المعتصم يقول...

السلام عليكم
ارتحتى يااختى
اهم اجلوا المدارس اسبوع بحاله
يارب بقى تكونى ارتحتى
واعتقد انه كده الوضع هيبقى زى الفل
ولا تقوليلى فيرس ولا مش عارف ايه
العيال هيقعدوا فى البيوت اسبوع كامل اهه من غير دراسه وهتكون الحكومه خلال الاسبوع ده سيطرت وظبطت الدنيا كلها
ولا تقولى فيرس اتش وان وان ولا اى كلام فاضى
ســــــــــــــلام

غير معرف يقول...

انا بقالي فترة مش بقرا احصائيات ولا عارفة المرض وصل لفين

فعشان كدا انا مش حاسة بوجود المرض اساسا :]

بس المفرووض الحكومة تاخد كل الاحتياطات وتحافظ على الطلاب لو المرض منتشر عندكم فعلا بالناقص من المدارس محدش بيموت من قلة التعليم :]

بس بيني وبينك حكومتكم احب ما على قلبها تخلص من الشعب كله هههههههههه

عندنا بغزة الحمد لله مفيش مرض على حسب علمي لكن و بدأت المدارس بتاريخ 21 اغسطس وعاااااتي :]
لكن المرض منتشر في داخل الاراضي المحتلة

واهو معتصم بيقول انها اتاجلت اسبووع ^_* وبرأيي كل عائلة خايفة على اولادها متبعتهمش عالمدرسة وتريح دماغها

ربنا يبعد عنكم وعنا جميع الامراض

كل سنة وانتي طيبة يا قمر

ستيتة يقول...

والله يا شيكولاتي منه لله الجمل والجمال وكل واحد ليه مربض او حظيرة او زريبة

هم عاوزين يدخلوا العيال
ولما يبقى فيه حالات يقفلوها
وبالطريقة دي يضمنوا عدد كويس يروح في الوبا
ومصر توسع شوية
منهم للي اكلت دراع جوزها يا اوختشي

شوكولاتة يقول...

Rannona
بصي يارنونتي إحنا مش عايزين نقول كلام مش واقعي العيال بتروح المدارس بتتعلم سلوكيات وعادات وحشة جدا غير إنهم بيدمروا نفسيا وبيتعرضوا لمواقف كتير بتأثر في نفسيتهم بشكل سئ جدا وبعدين صحة الطفل أهم من أي حاجة تانية يعني على الأقل يأجلو المدارس لحد شهر مارس ولا حاجة تكون الأزمة انكسرت ونتعلم من أخطاء الآخرين لكن مش نأجلها أسبوع هوه يعني أسبوع هيعمل إيه

وحشتيني خاااالص يارنونتي

شوكولاتة يقول...

بنوتة
الواحد بس صعبان عليه حاله اشمعنى الإنسان في بلد زي اليابان بيتقدر بالطريقة دي وإحنا بلدنا تهينا بالأسلوب ده شفتي مكتوب إيه في التعليق بتاع طفلة رومانسية

شكرا جدا على زيارتك الحلوة دي ويارب دايما متواصلين
تحياتي

شوكولاتة يقول...

واحدة من الناس
عندك حق يانورا الشعب اللي مستحمل الحكومة دي مايأثرش فيه انفلونزا خنازير ولايحزنون

وحشتيني مووووووووت
سلاموز

شوكولاتة يقول...

المعتصم
بصراحة يأستاذ مصطفى لا ارتاحت ولايحزنون أنت فاكر يعني إنهم هايعملو حاجة في الأسبوع ده الموضوع ده محتاج دراسة مش قرارات غير مدروسة يسكتو بيهم الشعب

أسعدتني جدا زيارتك
تحياتي

شوكولاتة يقول...

نوارة
الإحصائيات بصراحة مرعبة جدا يانوارة وممكن ماتكونش حقيقية والحمد لله إن المرض مش منتشر عندكم
إحنا أملنا دلوقتي إن الناس تقدر خطورة المرض ومايودوش عيالهم المدارس بس زي ماقلت لمعتصم الأسبوع ده مش هايغير حاجة خالص

تحياتي ياقمر

شوكولاتة يقول...

دكتورة ستيتة
أنا مش قادرة أتخيل إن في حد بيفكر بالطريقة اللي هما بيفكرو بيها دي يعني هما مش عارفين إن لو طفل مريض في الفصل هايعدي المدرسو بحالها والطلبة هايروحو يعدو أهاليهم في البيوت وساعتها بس هيبدأو يفكروا يقفلو المدارس اللي خلانا قللنا أعداد الحجاج والمعتمرين وتقريبا لغينا الحج مش قادرين ناخد قرار نقفل بيه المدارس

ربنا يسترها علينا يا دكتورة

المعتصم يقول...

هو احنا كده
كتر خير الحكومه معانا
يعنى يفتحوا المدارس مش عاجب
يأجلوا المدارس برضو مش عاجب
طب الناس تعمل ايه بس
حرام عليكم بطلوا افترى بقى
وبعدين ماانتِ قلتى اهه الموضوع عاوز دراسه
يعنى يفتحوا المدارس بقى ويبقوا يدرسوا الموضوع براحتهم كده ويطلعولنا النتيجه المحترمه ولا ايه ؟؟؟
هههههههههههههههه
الله يكون فى عونك ياحكومه

شوكولاتة يقول...

المعتصم
تقول إيه يقى شعب لمض ومش عاجبه العجب يعني الحكومة قايدالنا صوابعها العشرة شمع وإحنا كمان مش عاجبنا
أنا حاسة إن الغلاسة على الحكومة بقى شئ في دمنا ربنا يعينها على مابلاها
ههههههه
سلام

Unknown يقول...

هههههههههههه
انا شخصياً نفسى ارجع المدرسة تانى
عشان اتعلم
نفسى اخش كلية من جديد
عشان الحق مستقبلى اللى ضاع
يمكن تيجى هناك و ألقط عدوى
و اخلص اوام اوام

هههههه
بخصوص اليابان
انتى مقرتيش ان الحزب الحاكم هناك انهى سيطرته على الحكم بعد 54 سنة
و سقط فى الإنتخابات
و المعارضة مسكت الحكم
:-)

شوفى التفاصيل

‮»‬التحدي الاساسي سيكون في تحويل هذا الانتصار الي انتصار للشعب‮«.. ‬هكذا عبر زعيم الحزب الديمقراطي الياباني يوكيو هاتوياما عن شكره للناخبين الذين مكنوا حزبه من تحقيق فوز تاريخي والوصول الي السلطة بعد حوالي ‮٤٥ ‬عاما تقريبا من هيمنة الحزب الديمقراطي الليبرالي علي ثاني اكبر اقتصاديات‮ ‬العالم‮. ‬وفي مؤتمر صحفي اعقب النتائج شبه النهائية التي اكدت الفوز الكاسح لحزبه قال يوكيو هاتوياما‮. »‬ان كل شيء يبدأ الآن‮.. ‬انه التغير من السياسة القديمة الي السياسة الجديدة‮.. ‬اي الي حكومة جديدة اساسها الشعب الذي استعاد حقوقه‮.. ‬لقد استغرق الوقت طويلا‮.. ‬لكننا وصلنا اخيرا الي خط البداية‮.‬


‬وبالرغم من ان اليابانيين منحوا الحزب الديمقراطي فوزا كاسحا فان المحللين يرون انهم أرادوا في الحقيقة معاقبة الحزب الديمقراطي الليبرالي الحاكم منذ حوالي ‮٤٥ ‬عاما بسبب عدم رضاهم عن سياساته في الآونة الاخيرة والتي ادت في نظرهم الي تفاقم التفاوت الاجتماعي والبطالة‮. ‬وهذه هي المرة الاولي التي يصل فيها الحزب الديمقراطي الي الحكم‮.. ‬وهو يتسلم زمام الامور في دولة خرجت لتوها من اسوأ مرحلة كساد منذ الحرب العالمية الثانية‮.‬
----
معلش لو خرجت عن الموضوع
بس بخصوص اتش ان وان ان
هو لو حصل
بعد الشر و حد من كبار البلد لقط
الفيرس
ممكن يحصل ايه

اخف شىء فى الموضوع
اننا دبحنا الخنازير عشان متجيش
انفلونزا الخنازير
ههههههه

هو بخصوص العملات المعدنية
هو ايه الحكاية
الحكومة بتقول ان الفلوس الورق بتنقل العدوى اسرع
:-(

the giving river يقول...

هاى ازيك ياشيكولاته عامله ايه
دى اول زياره ليه وانشاء الله هضيفك عندى واتابع بوستاتك انشاء الله والبوست ده كتير دمه خفيف جد بس انشاء الله ماما مش هتزوقنا عشان عزرائيل
مستنى تعليقك عندى عشان اكيد تعليقك يهمنى كتير هستنى تعليقك متكسفينيش ياجميل
اه وعلى فكره انا بعشق الشيكولاته اخر حاجه

شوكولاتة يقول...

the giving river
شكرا على الكلام الجامد ده
نفسي والله ماما ماتزوقناش وربنا يعافينا ويرفع عنا البلاء

نورت المدونة
كل سنة وأنت طيب

شوكولاتة يقول...

بدراوي
صدقني والله يا أستاذ أحمد إنت لو رجعت المدرسة تاني هاتنسى أي حاجة ممكن تكون اتعلمتها وأنت في المدرسة ده المدارس دلوقتي بقى حالها يغم والله ليا واحدة صحبتي ابنها بقى مدمن مخدرات الواد ده في رابعة ابتدائي فكرك يعني اتعلم الإدمان من فين يعني ياراجل ده احنا اتعلمنا في الرخص

أما بقى موضوع اليابان ده فعجبني قوي لأن عرفت يعني إيه ديموقراطية وعرفت إن المضروبة الديمقراطية اللي عندنا دي اسمها ديكتاتورطية

وطبعا لو واحد من كبارات البلد بعد الشر يعني هايعملو فينا نفس اللي عملوه مع الخنازير أول مالمرض انتشر أكيد هايقضو علينا لأننا كده بقينا مسببن للمرض

وعلى فكرة موضوع العملات المعدنية ده حقيقي ميه في الميه يعني استخدمت ورق استخدمت عملة الفيروس قاعد على العملة أصله فيروس مادي شوية
هههههه

سلام وكل سنة وأنت طيب

بسمة انور يقول...

اول زيارة ليا تقريبا بس انا بقرئلك كتير على فكرة
وبمووووت فى كتاباتك وبموت اكتر فى الشكولاتة يا شكولاتة انتى

انت فى مصر اذاً لاتعجب فانت فى بلد العجائب
ولسه يا ما هنشوف
هما اجلو الدراسه اسبوع واحد ليه يا اوختى هيلحقوا يعملوا حاجه ولا ايه ؟؟؟

بس بينى وبيينك انا مش عايزاها تتاجل اصلى مستعجله على اول يوم فى الجامعه بقى ههههههههههههههه

يلا بقى ربنا يسترها علينا وعلى الغلابه اللى زينا
ويبعد عننا ايد ماما لححسن تزوقنا ولا حاجه

سعيده جدا بزيارتى ليك

شوكولاتة يقول...

بسمة أنور
كده والله أنتي تعجبيني كده أنتي من أنصار الرابطة الشوكولاتية
وياستي ماتستعجليش ولاحاجة بكرة تزهقي من الجامعة

ربنا يوفقك ياقمر وشكرا على زيارتك الحلوة دي
سلاموز