الثلاثاء، 6 أكتوبر، 2009

مطلوب إسفنجة ++ تحديث مالوش لازمة



شباب مصر ... نوابغ العصر


اليومين اللي فاتوا دول كنت مضغوطة جدا في شغلي ويمكن علشان كده كنت مقصرة معاكم
المهم النهاردة بقى قلت أخرج أشوف البلد وأشوف الحرافيش أصحابي فقررت أتنازل وأخرج وياريتني ماخرجت العيال الحرافيش دول حكولي موضوع طير عقلي مني وخلاني عماله أغني ظلموه الموضوع بقى إن واحدة فاشلة بكل مافي الكلمة من معاني كانت معايا في دفعتي اتعينت معيدة بجامعة خاصة عندنا يالهوي وده بأمارة إيه بقا إن شاء الله بأمارة السنة اللي دبلرتها ولا بأمارة المادة اللي قعدت تعيد فيها سنتين ولا بأمارة شخصيتها الزبالة ولا كان إيه وجهة نظر الموكوس اللي عينها المهم قعدت أقلب الموضوع في دماغي يمين وشمال وقلت فكك يابت ده نصيب أول ماروحت وفتحت الجهاز لقيت بوست للبت شيمو الشعب حبيبي وشرياني بتقول مصر زعلانة ولازمن أصالحها ورديت عليها وقولتلها لو مصر زعلانة سيبيها تتفلق!!!

أيوة تتفلق مصر اللي عملت في ولادها كده يعني أنا بت الحمد لله كل اللي بيفهموا ويتعاملوا معايا بيقولوا عليا شاطرة جدا في شغلي كمترجمة ومدربة وفي حاجات تانية كتير بالإضافة إني دارسة أنجليش وشوية فرينش كده من الكلية وكومبيوتر وسوفت سكيلز وموارد بشرية قوم إيه أول ما اتخرج ربنا يكرمني بشغلانة من الهوا كده وألاقي تليفوني بيرن بعد ما اتخرجت بأسبوع وناس بيقولولي عندك إنترفيو المهم لما روحت لقيت المكان ده بعيد عنكم جمعية أهلية ممولة من السفارة الفنلندية وما اداراكم ما الجمعيات الأهلية يعني تحطوا الحزب الوطني والكوسة اللي في البلد كلها في كوم وتحطوا الجمعيات الأهلية في كوم تاني سرقة إيه على عينك ياتاجر والحجة جاهزة دول ناس فنلنديين يعني هايفرتكوا فلوسهم على الموبايلات يبقى إحنا أولى بيها قلت ياللا يابت جمعية أهلية جمعية أهلية أهي حاجة والسلام تبدأي بيها واشتغلت في أول يوم اتعرفت على مجموعة جديدة هايبدأوا شغل معايا في مشروع جديد ومن الناس اللي اتعرفت عليهم واحدة تبقى أخت مرات المدير المالي والإداري للجمعية .. كبير شيوخ المنصر .. بعدها بيومين لقيت البت دي مابتجيش ليه ياولاد قالولي أصل البت تعبانة قلت واجب برضو أكلمها وأروح أزورها كلمتها لقيتها بتقولي لأ ماتجيش قلت عادي تعبانة بقى المهم الموضوع طول تلات شهور قالولي أصلها ياحول الله تعبانة قوي بعدها لقيت سعادتها جاية تسلم علينا وتقولنا أنا هاسيب الشغل .. ياعيني ياحبيبتي صحتها مش مساعدها .. المهم بقولها أنتي شكلك لسه مرهق أوي حتى باين على وشك أنك اسمريتي قالتلي لأ أنا دلوقتي كويسة بس أنا اسمريت أصل بقالي شهرين في شرم عند خالتي .. عملت زيكم كده بالظبط تنحت في وشها .. يعني الغندورة أخت مرات الغندور كانت بتصيف ماشي أهي هاتغور وتريحنا من قرفها أحسن برضو وكملت في الجمعية الملعونة دي كمالة السنة في أبشع درجات الإهانة وقلة الأدب ووقاحة المدير بتاعي جينا في أخر يونيو كده قالولنا هانبدأ مشروع جديد وعاوزين ناس فيه اللي يحب يقدم يقدم وبغباوتي قدمت وفي الانترفيو كسحت كل البشر اللي موجودين والراجل اتكلم معايا أكني خلاص اتعينت بالفعل وإذ فجأة وبعد أسبوع ألأقيهم عاملين انترفيو تاني للوظيفة بتاعتي وتاني يوم قالولي عارفة مين اللي اشتغل مين ياولاد البت أخت مرات المالي والإداري التانية يالهوي ليه هي تكية بابي ولا إيه وأخدت على قفايا وقلت يابت دي قسم. قوم إيه في آخر سبعة ألاقي المدير بتاعي بيقولي الناس في السفارة متأثرين قوي بالأزمة المالية وقرروا تخفيض عدد الموظفين بالرغم من إننا كنا اتنين بس أصلا علشان كده قررت السفارة الاستغناء عنك وأحنا حاولنا كتير علشان نخليكي بس مانفعش لتاني مرة أقول عادي ده رزق بس اللي كان هيجنني إزاي المشروع هايمشي من غير مترجم إزاي يعني ومعرفة المدير بتاعي عن الإنجليش زي معرفته عن الأخلاق والأدب عرفت بعدها إن تاني يوم بنت خالة المدير المالي والإداري اتعينت مكاني .. قولت نفس اللي بتقولوه دلوقتي حسبي الله ونعم الوكيل .. آه نسيت أقولكم إني كنت بقبض نص القبض اللي مكتوبلي في العقد والميزانية بتاعت المشروع وإيجار مقر المشروع كان بيتخصم مننا ده غير إنهم كانوا بيخصموا تأمينات وهما مش مأمنين علينا أصلا

المهم فضلت شغالة في مركز اللغات اللعين اللي أنا بدرس فيه وأقول أهوه شغل برضو احسن من مفيش عادي أبص بعد يومين داخلة المركز كده ألقي بت صايصة كانت دفعتي بس هي أكبر مني لأن سعادتها أخدت الكلية في ست سنين إزيك ياحاجة عاملة إيه أنتي جاية تاخدي كورس إيه ؟؟ يارب تبقي معايا قالتلي لأ أنا جاية أدي كورس كونفرسيشن يالهوي أبسوليوتلي هاو كام ؟ ليه هي المشرحة ناقصة قتلة قعدت أراقبها من بعيد لبعيد كده هي بتشرح إزاي لقيتها بتتدي مجموعة برايفت وقاعدة ومقعدة المتدرب جنبها وطبعا بيبص على البدي الأحمر في أسود وبتقراله من كتاب كونفرسيشن معفن بالعربي وبخمستاشر جنيه آه والله من غير ماركر ولا وايت بورد ولا ورك بوك ولا أي ورقة طعمية حتى لما بسأل بقى بنت صاحب المركز قالتلي إن مامتها زميلة بابا .. وبابا ده عينه زايغة آخر حاجة ..
طبعا أكيد نفسكم تضربوني أنا إيه اللي مصبرني على الغلب ده أقولكوا مانا لو لقيت احسن منه ماكنتش هاعبرهم ولما لقيت اشتغلت في أكبر دار نشر وترجمة في مصر في شارع الدقي وقالولي المرتب هايبقى 600 جنيه في أول تلات شهور وبعدين هاتزيدي طيب إن شاء الله هازيد كام قالولي 100 جنيه ده على أساس إني هاعيش في القاهرة وهاكل وألبس وأسافر لأهلي خميس وجمعة بيهم طبعا رجعت تاني لشغلي الأصلي بجزمتي حنين وعلى فكرة الشغل كان من تمانية لأربعة ولما تدخل المكتب بتاعك تقفل موبايلك وماتعبرش اللي جنبك لو بيموت أو تشرب شاي أو تعمل أي حاجة غير إنك تترجم الكتاب اللي معاك على الكومبيوتر علشان مانضيعش فلوس الراجل الشقيان اللي بيأكلنا ياعيني

والمرة اللي حبيت اتفزلك فيها روحت قدمت في وظيفة اتش آر كوردينتور والراجل كان مبسوط مني بالرغم إنه من أغلس الشخصيات اللي قابلتها في حياتي ولما واحد قريبي كلمه عليا اداله حقنة بنج معتبرة وبعدين عين أخت صاحبه عادي يعني

ولما حاولت أشتغل برايفت مع واحد زميلي ترجمنا ميزاينة لشركة وفي الآخر ضحكوا علينا وكلوا علينا حقنا

على الهامش:
- جمال مبارك عين 3000 شاب في وظائف مرموقة والشرط الأساسي في تعينهم إنهم يكونوا خريجين الجامعة الأمريكية .. وولاد الغلابة اللي أهلهم دفعوا دم قلبهم علشان يعلموهم طظ فيهم
- واحد من المتفوقين في دفعتي شفته النهاردة واقف في محل حلواني
- واحد راح يقدم لوظيفة في شركة فلما دخل عندهم سألوه : متىيكون حاصل ضرب 3*3 =10؟
فقال : عندما تكون الإجابةخاطئة.
قالوا : ماهو الشي الذي له أكثر من جناح ولا يطير؟
قال : الفندق.
قالوا : ما هي الكلمة المكونة من أربع حروف إذا أكلت نصفها تموت ، وإذا أكلتهاكاملة لا يصيبك شيء؟ قال : سمسم . قالوا : من هو الرجل الذي يستطيع أن يقفعلى الأرض ورأسه فوق النجوم ؟
قال : الضابط
قالوا : ما هو أكبر عدد من المواليد يمكن أن تضعه النعامة ؟
قال : النعامة تبيض ولا تلد
قالوا : ما هو الشيء الذي بدونه لا تستطيع أن تحصل على الوظيفة في هذه الشركة؟
قال : الواسطه
قالوا : وهل هي عندك ؟
قال : لا ....
قالوا :
طيب خد الباب معاك وإنت طالع !!!!
- اللي شاف برنامج تسعين دقيقة واتحرق دمه زي الملايين اللي شافوا البيه اللي بيقبض نص مليون دولار شهريا في أحد البنوك الدولية في مصر .. لو إدينا لموظف 500جنيه يبقا هانشغل 6000 شاب من اللي بيضيعوا بسبب البطالة والسخط على البلد

بجد ياجماعة أنا بكتب البوست ده وأنا دمي بيغلي ليه كده يعني أنا ولا حاجة بالنسبة لناس تانية فطاحل في البلد وبيجرالي كده النهاردة في وسط كمية الضغوطات دي حسيت إني محتاجة إسفنجة تمتص كل غضبي وسخطي والقرف اللي أنا شايفاه زي الإسفنجة مابتمص المية بالظبط وأقدر أستحمل كل الشكات والصدمات وياترى الصدمات دي بتحصلي ليه علشان مش عاوزة أعمل حاجة غلط ولا دي سذاجة وهبل وعجبي !!
ليه كده يابلدي ياللي كنتي زمان مرفوعة الهامة
دلوقتي قسينا عليكي وقسيتي علينا وبنرمي عليكي كل الملامة
ونقول ليه كده يابلدي وحياتك لأخليكي عالية الهامة
وهنمسح كل اللي بيجرحوكي وونخليكي طويلة القامة
وهنمحي كل ذكرى ذلتك بعد ماكنتي زمان علامة
وحياة اللي ضحوا بروحهم علشانا لأرفع راسك وأخليكي بين الناس إمامة

هناك 68 تعليقًا:

ستيته حسب الله الحمش يقول...

لاااااااااااااااا
يا شيكوووووووووووولاتة
دي بصر بخير
اه هي بصر يا عبلة
مش عارفة ارد عليكي واقول ايه
نحن في زمن المسخ
زمن البلاء
زمن السرقة العلني وعين الحرامي باصة جوا عيوننا وناقص يدب صوابعه في حوبابي عينينا كمان

لو لقيتي فيزا بره مرات ابونا ابقى خديني معاكي :)

آيوشة يقول...

عاااااااااااااا عااااااااااااا
حرام والله حرام اللى بيعملوه فى البلد دى انا عندى اكتئاب خلقه بس بجد ياشوكولاتة اللى بتحكيه ده يحرق الدم ويخليه يضرب فى النفوخ اهئ اهئ اهئ
يارب ارحمنا من الكوسة بقى بيقولوا لو النيل فى مصر صلصة مش هيكفى الكوسة اللى فى مصر عبقرى صاحب المقولة دى
ربنا معاكى يابنتى ومكان ومع كل الشوباب الغلبان لكن مش اللى خريجين جامعة امريكية

فتاه من الصعيد يقول...

برضه مصرين ترموا بلاكم على مصر :)

يا بنتي مالها مصر بس .... دول ولادها الفاسدين .... هما كتروا بس شويه

هي يمكن بس ما عرفتش تربي صح :)

ولو نهر النيل صلصه .... ما يكفي الكوسه اللي فيكي يا مصر

تحياتي

احلام جوليا يقول...
أزال المؤلف هذا التعليق.
احلام جوليا يقول...

بجد اكتئبت حسبي الله ونعم الوكيل اللهم ارنا فيهم عظائم قدرتك كما ارونا فينا قدرتهم علينا

بدراوى يقول...

طب معلش قبل ما اقرا الموضوع
لازم اشكرك على ردك الوافى فى البوست اللى فات على اسئلتى بخصوص الإنجليزى

بس هو فيه مشكلة صغيرة انا مش باخذ كورس TOEFEl انا باخذ كورس
General
ده الحقيقة اللى فهمته لحد دلوقتى
لكن فيه كورسات تانية لل TOEFEl

و شكراً على اللينكات

و صباح الإستغلال

مع تحيات مدون رخم
هههههههههههههههه

ليس فقيرا من يحب يقول...

هههههههههههههههههههههههه

شايله كل ده فى قلبك يابت وساكته

ليس فقيرا من يحب يقول...

بينى وبينك يعنى الواحد

من كتر الاحوال اللى تشل دى

اصابه داء التناحه

ليس فقيرا من يحب يقول...

وقديما قالوا معاك واسطه تاكل بسطا

ممعكش واسطه تقعد على البسطه

دموع القمر يقول...

صباح حير طير على احلى شوكولاته

اتعينت معيدة بجامعة خاصة عندنا يالهوي وده بأمارة إيه بقا إن شاء الله بأمارة السنة اللي دبلرتها ولا بأمارة المادة اللي قعدت تعيد فيها سنتين ولا بأمارة شخصيتها الزبالة ولا كان إيه وجهة نظر الموكوس اللي عينه

بطلوا حقد بقى :) :)

انا لسية مكملتش يعنى من غير ضرب هههه

فاصل وانواصل

ليس فقيرا من يحب يقول...

وبعدين مصر لا عملت ولا خلت

العيب فى الجرادل اللى ماسكه

كل حاجه

ليس فقيرا من يحب يقول...

وبعد\ين هتركبينا الغلط ليه يا اختى

انا هامشى احسن

اقعدى بالعافيه يا قمر

بدراوى يقول...

معلش بخصوص اللينك بتاع
new interchange

هو انا ححمل كل اللينكات اللى فى الصفحة باللى فيها
و لا ايه لأنهم كثييييير اووووى؟

صبرني يارب يقول...

قطعتى قلبي يا بت

ام الجمعيات فى الارض يا شيخه

انا باتدرب فى جمعيه بس مش عارفه ليه عندي احساس انهم مش حراميه اوي

بس فى واحد هناك انا بابقى عايزه اهفه باي حاجه فى وشه الحقيقه

بس اعتقد ان رئيس الجمعيه نفسه محترم وهى تبع منحه كنديه برضه

ام هند
بالنسبه للشغل معلش اصبري
واتعلمي على اد ما تقدري من اي شغل من الشغل الى بتروحيه

وان شاء الله يوما ما هاتلاقي فرصه كويسه

والاخ المتفوق الى بيشتغل فى محل حلواني
تحياتي العظيمه له

لان بالنسبه للشباب الى يرضى يقعد فى بيتهم جمب امه لحد لما يلاقي شغل منااااااسب لشهادته الى ما لهاش قيمه اصلا فى العالم

يبقى حمار كبير

وهى دي مصر يا عبله

صبرني يارب يقول...
أزال المؤلف هذا التعليق.
romansy يقول...

وشرفك يا بلدى
سحابة وتعدى
وبرضة أنتى بلدى

مهما عملوا يا بلدى فيكى
أحنا ليكى
احنا بيكى
دا أحنا ياما خدنا منك ... فيها أية لو يوم نديكى

romansy يقول...

احنا اتخلقنا صحيح علشان نقدر ونحاول نعمل اللى علينا صحيح فيه ناس كتير بتعمل ومش بتلاقى
بس لينا رب اسمه الكررررررررريم

بدراوى يقول...

بوست يجيب اكتئاب زى ما حد قال
خصوصاً اخر فقرة اللى على الهامش

بصى متقلقيش انتى شاطرة و موهوبة و مجتهدة و حتلاقى كل الخير بس متضايقيش نفسك
و مهما حصل احمدى ربنا على اى نعمة انتى فيها ، و بخبراتك و تفوقك اكيد حتلاقى كل خير

بدراوى يقول...

اه صحيح الصورة اللى مع البوست
صعبة اوووووووووى
انا داخل فى سنتين من غير شغل
بس بحاول افتح سكك قبل ما اخش فى اكتئاب تانى

دموع القمر يقول...

انا جييييييييييت

وقريته حته حته

نو كومينت

يبقى انت اكيد فى مصر ولا ايييه

جمهورية شومبونجو العربية يقول...

السلام عليكم

يابنتى انتى ليكى الجنة

وبعدين انتى مستنية اية اكتر من كدة
دة انتى كدة لسة مشفتيش حاجة
دة انا مرة شوفت واحد
بكالوريوس هندسة
شغال بتاع لمون وطماطم فى السوق
احنا لينا الجنة
.............
تحياتى

رئيس الجمهورية

شوكولاتة يقول...

دكتورة ستوتة
أنا تعبت قوي والله يادكتورة واحترت في الزمن دي والبلد دي كل ما ألاقي حاجة حلوة تطلع في الآخر وحشة بس عارفة أنا مرة كنت قلت لأستاذ فشكول مصر دي أنا بعاملها زي بنتي بالظبط يعني تغلط أتخنق منها بس أرجعها تاني لحضني ومصر بقت تقسى عليا قوي ولساني مايطاوعنيش أدعي عليها
بس احيانا الواحد لازم يبعبع لحسن ينفجر

تحياتي

شوكولاتة يقول...

دكتورة ستيتة
أنا نسيت اقولك إن أنا طول عمري نفسي يبقى معايا فيزا لبلد تانية بس دلوقتي لأ أنا نفسي يبقى ليا مملكتي اخد فيها خلاصة الشعب المصري واخليهم يبدأوا حياة جديدة

شوكولاتة يقول...

آيوشة
أنا عارفة أني خنقتكم والبوست خنقة وغلس بس الكلام ده كل واحد منكم نفسه يقوله في حاجة منه
وفعلا المقولة دي عبقرية دا الكوسة اللي في بلد هاتفيض وهانضطر نعملها مسلوقة ولا ببشاميل
ههههههههههه

ربنا يزيح عنا الهم والغم

شوكولاتة يقول...

دكتورة مروة
عندك حق يامروة مصر دي حقها تجيبلنا مربية فلبينية تربينا من الأول وجديد

تحياتي

شوكولاتة يقول...

أحلام جوليا
ربنا يرفع عنا البلاء والظلم ويكفينا شره

نورتي المدونة
تحياتي

شوكولاتة يقول...

بدراوي المدون اللي مش رخم
ياسيدي لاشكر على واجب وحتى لو أنت بتاخد كورس جينيرال المفروض إنك تاخد فيه كل حاجة يعني اكيد هاتبدأ تكتسب خبرات جديدة مع الوقت

شوكولاتة يقول...

ليس فقيرا من يحب
عندك حق يا روني مصر مالهاش دعوة بس شرذمة قليلون هما اللي خربوها ونشروا فيها الكوسة

تحياتي

شوكولاتة يقول...

دموع القمر
بذمتك لو مكاني هاتعملي إيه؟؟
هوه أنا اتشليت من شوية ماهي دي القشة التي قسمت ظهر البعير

وحشتيني مش باينة على الميل ليه

شوكولاتة يقول...

بدراوي
بص هوه اللينك ده في حاجات كتير قوي حلوة ومهمة نزل منه على قد ماتقدر بجد لو نزلت الماتريال دي هاتعجبك وهاتفيدك قوي قوي

شوكولاتة يقول...

صبرني يارب
عاوزة نصيحة من اختك الصغيرة فكك أنا كنت بقول كده في الأول واكتشفت إنهم حرامية نوريين قوي بس خلاص احترفوا السرقة والنصب وبعدين دي منحة اجنبية برضو يعني نفس المصيبة

هي مين أم هند دي بقا والست عبلة إيه حكايتها دكتورة ستيتة تقولي عبلة وانتي تقوليلي عبلة ؟؟؟
بس عموما والله كلام حلو قوي الواد فعلا كبر في نظري قوي قوي

شوكولاتة يقول...

رومانسي
والله مالينا غير الكريم ده حتى اللي بيجيبوا واسطة مالهمش غير الكريم برضو هما فاكرين نفسهم كده ناصحين لكن هما كده جهنم وبئس المصير

منورني

شوكولاتة يقول...

بدراوي
أنا حاسة الكلام ده خلاص مابقاش بيأكل عيش يعني لحد إمتى هاقعد أقول انا شاطرة وبتقي ربنا في شغلي وأقف محلك سر
ربنا يديك ويدينا جميعا باللي نستاهلوه وأكتر

تحياتي

شوكولاتة يقول...

دموع القمر

لأ دي مش مصر اللي كانت مصر من 36 سنة
دي بلد تانية احنا مانعرفهاش

شوكولاتة يقول...

جمهورية شومبونجو بتاعت الريس متقال

يالهوي ده كده اللي يشوف بلاوي الناس تهون عليه بلوته بس ده مصيبته إنه برط يعني مايطلع ويدور أكيد هيلاقي البلد دلوقتي ماشية على الهندسة حتى لو مااشتغلش مهندس يشتغل أي حاجة تانية مش بياع ليمون في السوق يعني هوه اللي استسلم وباع نفسه

منور ياريس

المعتصم يقول...

ههههههههههههههههههههههههههههههههه
يابنتى ضحكتينى وماكنش لازمنى والله
خدى عندك بقى
......
كنت بتدرب فى البنك الاهلى وقعدت سنه ونص هناك هما اللى يجددولى التدريب نظرا للكفاءة فى العمل وحاجة العمل اليه
وفيه واحد جه اتدرب معايا كام شهر كده ومكنش بيعمل اى حاجه وتقديره مقبول واخد الكلية فى سبع سنين
قوووووووم ايييييييييه
هو يتعين وانا اخد شلوووووووووووووت
علشان هو يبقى خاله مساعد وزير الدفاع واخوه ظابط امن دوله
.........
خدى التانيه بتاعة الجمعيه
........
جمعية زى جمعية رجال الاعمال كده ومقرها فى العجوزة
طالبين محاسب
قعدت اذاكر قبل الانتر فيو 4 ايام
وروحنا الانتر فيو
دخلت الدكتور بتاع المحاسبه قاعد وجنبه اتنين مدير الجمعيه ودكتور فى الاقتصاد (عشان كانو عاوزين واحد محاسبه وواحد اقتصاد)
والدكتور ابتدى يسأل واخوكى يرد عليه بكل ثقه الراجل ابتدى يتبسط ويبان على وشه الانشكاح
لقيت مدير الجمعيه راح مدخل الدكتور بتاع الاقتصاد فى الموضوع
*وهوب قالى الاسفنج بيستخرج منين ؟؟
*قلتله من البحر
*قالى وايه اكرت بلد بتنتج اسفنج على مستوى العالم
*قلتله مش عارف الحقيقه
*قالى دى اخدتها فى الموارد الاقتصاديه فى سنه اول جامعه ومش عارفها
*رديت معلش يادكتور السن له حكم برضو
*سألنى طب ايه اكرت ميناء فى العالم بيتصدر منها قمح
*نعم؟؟ يعنى هو الاتوبيس معدى وبدل ماسيادتك تسألنى هو بيروح فين ولا هو نمرته كام بتقولى هو اسم الكمسرى ايه؟؟
*ايه ده احرتم نفسك
*والله انا محترم
اتدخل الدكتور بتاع المحاسبه بعد مكالمه بسيطه كده مع مدير الجمعيه
وابتدى يسأل تانى وانا اجاوب
ولقيته مرة واحده راح معدول عليهم وقالهم انا عاوز الواد معايا فى الشغل ده احسن من ابن اختك يامحمد بيه(مدير الجمعيه)
ودار نقاش غريب الشكل والمضمون لمدة نص ساعه وانا قاعد اتفرج عليهم من غير ماياخدوا بالهم منى وبعدين اكتشفوا انى لسه قاعد من صوت ضحكتى اللى ابتدى يعلا
وفى الاخر طبعا اخدت الصابونه المحترمه
.......
على الهامش
*ليا صديق واخد ماجستير مع مرتبة الشرف وبرضو بيشتغل فى محل حلوانى وهو على وشك الانتهاء من رسالة الدكتوراة
*واحد حاصل على تقدير جيد جدا وبيشتغل فى شركة نظافه

اللى انا عاوز اعرفه ايه علاقة محلات الحلوانى بالتفوق؟؟؟؟؟؟ سؤال يطرح نفسه
انا عندى حكايات كتيييييييييييير جدا زى دى وانيل منها
بس كفاية عليكم اكتتتتتتتتاب
ههههههههههههه
ســـــــــــــــلام

طوبه فضه وطوبه دهب يقول...

يابنتى اللى انتى شوفتيه دا واحد على عشره من الواقع والطبيعه كنا فى كليتنا شايفين الدنيا والاحلام ورديه خرجنا عشان نتصدم بافظع واقع بكل مافى ذى ماقلتى ناس بتقبض ملايين وناس بتترمى لها الملاليم مش انتى لوحدك اللى مطحونه بلاش تيأسى وتفكرى كتير فى حاجات مافيهاش تفكيرى بس افتكرى ذى ما بقول لنفسى ديما ربنا كبير وكبير اوى كمان تحياتى يا اجمل شوكولاتايه

شوكولاتة يقول...

المعتصم
تصدق يا أستاذ مصطفى إنك ضحكتني وانا أصلا قاعدة مبقوقة وبخانق في دبان وشي
يعني ياحول الله الهم طايلني وطايلك بص الجمعيات دي فيها كوسة والله مالهاش حل أنا عندي ورق وحاجات من شغلي في الجمعية الملعونة دي ممكن أنشرهلكم في بوست كامل واتفرج ياسلام والله العظيم عجب يخليك تكره نفسك وانت بتحكيلي على الانترفيو فكرتني بعلاء ولي الدين في فيلم الناظر أهو أنت عملت زي أذكر اسم مقاول السيراميك اللي شطب اسكندرية سوبر لوكس

بصراحة مش عارفة إيه العلاقة بين التفوق ومحلات الحلوانية ممكن تكون حلاوة روح مش أكتر

هههههههههههههههه
تحياتي وياريت تكتبلنا عن القصص دي في بوست منفرد

شوكولاتة يقول...

طوبة دهب وطوبة فضة
مانا عارفة إن ده حال الجميع يعني الدكتور بقى زي المهندس زي المدرس زي المحامي كله ضايع بس الموضوع بقى خنقة وصعب قوي فعلا

ربنا يكرمنا بكرمه

مي يقول...

شيكولاتى انا جاية اسلم بس مش هتكلم اصلى ربنا عالم بيا فى حكاية الشغل ده نفسى اكمل شهر يا اوختشىىىىى مش عندى صبر لازم اتنرفز على مديرى او اى حد يلا بلا نيلة
المهم انت وحشتينى يا بت واصبرى على القرف بقى هنعمل ايه
ههههههههههه
قطيعة محدش بياكلها بالساهل
امووووواه

شوكولاتة يقول...

ميوية القمر
أنتي فين من زمان ياسكورة أنتي ؟؟؟
يعني اشتغلنا مخنوقين مااشتغلناش مش طايقين نعمل إيه بقى أنا قرفت

ربنا يكرمك بشغلانة حلوة زيك كده ومايبقاش فيها مدير غلس

مسدس صغير يقول...

اضحك الله سنك
ضحكتينى
حاجة بصراحة مش عارفين اخرتها
ربنا يستر
فعلا لو النيل صلصة مش هيكفى الكوسة
عجبنى اوى الاسئلة
وفى نهايتها خد الباب فى ايدك
ههههههههههههههههه
احييكى على البوست

موناليزا يقول...

مش عارفة اقول ايه بجد
بس ماتزعليش

عمرو يقول...

لا كده كش كويس على صحتك :)
Take it easy
و ما الجديد يا اٍبنتى الفاضله ؟؟
الواسطه من متلازمات التراث المصرى الخايب الخالد رغم تحدى الزمن و كثرة المحن ..
لبجهله و التافهين و أصحاب الثقافات الضحله يجدون دوما مكانا لهم و هم بردائتهم و وكستهم يزيحون عن جد أصحاب المواهب الحقيقيه ..
فرجه قريب ..

فتاه من الصعيد يقول...

شيكو حبيبتي

انا امبارح نمت ومش شفت ردك معلش

بقولك ايه ..... عايزه الميل خديه ..... بس امسحيه اول ما تقريه .... مش عايزه مصر كلها تضيفني :)

هحطوهولك في بوست قديم .... علشان محدش يشوفه :))

تحياتي

3mr wa2el يقول...

شوكلاتة عاملة وطنية ف يوم 6 اكتوبر مش ملاحظة التاريخ ولا اية

بتفضحي مصر علني

يا بنتي احنا بلد الكوسة يعني تشيلي مواد و تاخدى شهادة نوفمبر او ممكن انك تاخدي سنة كمان زيادة و يقولللك الدكتورة مصر كلها الوقتي بقت بتدى دروس افشل واحد ف الدنيا بقى بيي دروس لاننها مش محتاجة اى حاجة

الى لية ظهر مش بيضرب على بطنة مثل واضح و صريح عني اكيد عشان بنت اخت المدير ايا كان مدير اية ان شاء الله مدير قسم المشروبات الساخنة و البردة هيعوينها اساسي ع طول

الدنيا بتقوللك ان الشهادات و الكورسات بتعين الناس وش زى ما بنقول عشان الى بياخد دة بيكون معاه كارت صغنتوت كدة فية اسم من الناس الحلوة

لو قدمت ف وظيفة لوحدك من غير ما تقولي يارب مش هتاخدها

سبيها لله و قولي يارب عوضني و ان شاء الله هيعوضك ممكن تشتغلي ف اتصالات او فودافون بس مش تنسينا بالله عليكي ههههههههههههه

شوكولاتة يقول...

مسدس صغير
جديدة قوي أضحك الله سنك دي يعني إيه ؟؟

بس عمرك ماحصلتلك إن حد قعد يقولك كام سؤال رخمين كده وفي الآخر كده قالك خد الباب في إيدك

تحياتي

شوكولاتة يقول...

موناليزا
قولي الله يجازي اللي وصلنا لكده
والله يجازي اللي دمر الشباب واللي خلاهم يوصلوا لكده

أنا بحاول أكبر دماغي ومازعلش بس الموضوع بيبقى أكبر من إني استحمل

منورة ياجميل

شوكولاتة يقول...

أستاذ عمرو
إيزي بس إزاي يا أستاذ عمرو عاوزني أشوف حقي بيتاخد قدامي كل مرة بالطريقة دي وأسكت وناس ولا تستاهل بتاخده وتصدق إنهم ناس محترمة ويستاهلواا يعني كدبوا الكدبة وصدقوا روحهم

ربنا يصبرنا
شرفت المدونة

شوكولاتة يقول...

ميرو الصعيدية
ولايهمك ياقمر انا عمالة أدور عليه بس بصراحة مش لاقياه هاأحاول أدور عليه تاني

وجعتلك دماغك ياقمراية

شوكولاتة يقول...

عمرو وائل
والله اهلي ناس غلابة معندناش وزير ولامحافظ علشان اشتغل في فودافون ولا اتصالات بس صدقني لما المشمش يطلع ويقبلوني هناك هاخدك معايا

ياراجل ده انت خليتني افكر ارجع للكلية واشيل مادتين واتطلع استهبل واعمل فيها علامة وانا هاترستق في أجدعها حته في البلد

ضحكتني والله

أحــوال الهـوي يقول...

طبعا ما فيش رد
و كل اللي اقدر اقوله ان شاء الله في وسط هذا الزخم سوف تجدي من يؤمن بقدراتك و ماهلاتك العاليه
و هناك اكيد من يريدمن يتقن العمل و يقدرك حق قدرك فصبر جميل و الله المستعان عما يصفون

شوكولاته
تحياتي

عمرو امام يقول...

اولا انت مشرفتنيش بقاليك كتير
لعل المانع خير

وثانياااااااااااا

يا ستى ريحى نفسك فكرى وانتجى فى حدود شغلك
ديى عزبة واحنا مجرد سكان وغير اصلين كمان
مع فائق احترامى
وفى انتظارك

micheal يقول...

هههههههههههههههههههههه
عااااااااااااااااااااا
معلش مش عارف أضحك ولا أعيط فعلا
أولا الصورة تحفة بالذات الواد العاطل أبو 5 سنين اللي جتله عقد نفسية..بيفكرني بواحد عزيز عليا خريج سياسة 2005
هع هع
الجمعيات الأهلية فعلا للأسف معظمها أصبح نموذج لإهدار المال العام وسوء إستغلال السلطة مع أن المفروض نظريا طبعا أن دورها التوعية
بقى بتعملي إنترفيوهات من ورايا يا لئييمة
:)
بس بجد أحيي فيكي صبرك وصمودك
جمال مبارك مش حعلق ع الخبر بتاعه عشانمش عاوز أطلع كلام قبيح
عجبني أوي سؤال حاصل الضرب
:)
ملحوظة بعيدة عن البوست:بلززز متحذفيش أي تعليق تاني ليكي عندي لأن فعلا مكنش فيه أي حاجة خالص وانا بتقبل كل الاراء اللي بتتقال وأنتي شخصية محترمة فعلا..بييس يعني
:)
تحياتي

شوكولاتة يقول...

أحوال الهوى
عجبتني قوي كلمة حضرتك وحسيت إنها زي البلسم على قلبي
أنا مؤمنة جدا بالكلام ده وعارفة إنه هايحصل في يوم من الأيام وإن طال الصبر

شرفتني بزيارتك الكريمة

شوكولاتة يقول...

عمرو إمام
أنا بس الفترة الأخيرة زي ماقريت في البوست كده كنت مشغولة شوية في شغلي أنا آسفة على التقصير

ثانيا
عجبني جدا تشبيه حضرتك بس إحنا بقى مش السكان الغير اصليين إحنا خدم العزبة

تحياتي

شوكولاتة يقول...

مايكليتو العميد
وده برضه العشم ياعمدة نقابتنا أنا بس ماحبتش اضايقك وخاصة بعد ما أنا اضحك عليا وأكلت المقلب اللي هوه وتاني مرة بكرر أسفي

انا حاسه اني هابقى خليفتك في الملاعب ياعميد ألا قولي كنت بتعمل إيه بقا لما بتغاظ قوي بالشكل ده أحسن أنا مبؤئة على الآخر
نيهااااااااااا

شفقة هانم واحسان بك يقول...

هى دى بلدنا والا مش هتكون مصر
للاسف احنا عايشين فيها وحاسين اننا اغراب وعلى راى واحد كان فى البرنامج سالوه.... يعنى لو جاتلك فرصة للعمل خارج مصر تروح
رد قال اتعامل بره بلدى ككلب احسن من العيشه والشغل هنا .....وقال بيقولوا مشربتش من نيلها..... لا شربت وجالى تيفود
ربنا يصلح حالنا
شفقة

شوكولاتة يقول...

شفقة وإحسان
واسمي الكلام ده بقى ايه شفقة ولا إحسان
ههههههههههههههههه


بس أنا مقدرش اسيب مصر واخد جنسية تانية بس اعيش في بلد غيرها امنية حياتي

تحياتي

رضوى يقول...

بعد التحية اية بقي موضوع الشكولاتة دة وانا اصلا مش بحبها

شوكولاتة يقول...

رضوى
يارب المدونة تخليكي تحبيها

تحياتي

احساس طفلة محبة للرومانسية بس واقعية يقول...

مفيش كلام اقولوا
بس خلينى اقولك السؤال اللى ظهر فى دماغى بعد قراية البوست على طول

هو لية بيكون امتى فين يعنى ازاى ؟
بالضبط كدا حاجة غير مفهومة من كل النواحى
ربنا يصبرك كويس انك صابرة وبتحاولى
وطول ما عندك امل ومملتيش زى ما هم عايزين اكيد هتوصلى

ربنا يوفقك
تقبلى مرورى

MOHAMMED ELBANNA يقول...

شيكولاتة
اولاً احييكي على مدونتك الجميلة ودي اول زيارة ليا .وانا سعدت كتير لما عرفت انك تخصص موارد بشرية .
ثانياً كفاية كدة بصراحة انتى قلبتي فينا المواجع .
تقبلي تحياتي
محمد البنا
طريق النجاح

شوكولاتة يقول...

طفلة رومانسية
عندك حق فعلا الموضوع غير موزون بالمرة مالهوش قاعدة يعني اللي بيتحط في مكان مايستحقهوش بالواسطة مابيتقبلش في مكان تاني علشان مالهوش واسطة

دمتي بخير

شوكولاتة يقول...

محمد البنا
أنا أسعد إني مدونتي شرفت بإعجاب حضرتك بما إن حضرتك مدرب تنمية بشرية وهو مجال أنا بحبه جدا بس بصراحة أنا مابشتغلش فيه بس نفسي أتعلم فيه حاجات كتير قوي

تحياتي

طهر فؤادك يقول...

السلام عليكم ورحمة الله وبركاتة ,,,
موضوع جميل ومعبرا جدااااا
وياريت تشاركى معانا فى حملة نصرة الاقصى والموضوع بسيط جدا وياريت تشوفى موضوعى على مدونتى وتقوليلى رأيك.. رأيك يهمنى اكيدددد ..

مهندس مصري يقول...

ياه يا شوكلاتة
الكوسة في مصر بقت من ثوابتها خلاص
طيب أنا ليا واحد صاحبي خريج آداب قسم إجتماع بتقدير جيد جداً و بدل ما يعينوه في الكلية و لا حتى أخصائي إجتماعي في أي مدرسة ملقاش أي تعيين و شغال من كذا سنة عامل في فورم الجبس و إشتغل فكهاني بعض الوقت
أنا قعدت بعد التخرج سنة بحالها من غير شغل و أنا مهندس مدني
هو الناس بتهج بره مصر من شوية
هو أخوكي ميخو سافر بره مصر من شوية ؟
إييييييييييه قلبتي علينا المواجع
ربنا يرحمنا برحمته

شوكولاتة يقول...

مهندس مصري
الكوسة بقت الهرم الرابع في مصر بقت شامخة شموخ الاهرامات

بلاش حكاية ميخو ده ده كان من حقه يولع في البلد قبل مايسافر من اللي شافه

تحياتي