الخميس، 1 أكتوبر 2009

علشان من حقهم يعيشوا



براءه ينهشها المرض والألم ويحييها الامل فنجدهـم مـن احشـائهـا يـولدون
بمخاض عسير يسبق قدومه ليأتي زينة الدنيا الى هذه الدنيا . فتفرح العائـله
وتزغرد الجده . وتبدأ رحلة الغد الطويله ... انها قصة حياتهم انهم اطفالنا
الذين غالبا ما تُرسم الحياة لهم بقسوةٍ وتعب . بمرضٍ وألم . عمراً مزهـواً
بطفولتهِ . مسيجاً بشوكِ مرضٍ خبيث ... فتتحول زينـة الدنيـا الى مـأسـاه
ونظرة الحب الى دموع شفقه . والغد الى شبحٍ أسـود يلبس المـوت ثوبـاً
ويحوم فوق رؤوس فلذات اكبادٍ صغار لم يعرفوا من العمر بعد الا طراوته
وبراءته . وفكرةً مخيفةً اسمها [ السرطان ] تقتل ضحكاتهم الصافية . وتحولهم
الى صغارٍ - كبار . بهموهم وحزنهم ..

جاتلي دعوة من الأخ الكريم طهر فؤادك صاحب مدونة رسول الله وشرحلي فيها فكرة حملة مدونتك هاتنقذ طفلك اللي بيقوم بيها وربنا يجازيه خير الجزاء


لما قريت الموضوع حسيت إني مش مخيرة أكتب أو ما أكتبش بس أتأكدت إني لازم أكتب لازم أساعد أطفال كنا وإحنا في عمرهم بنلعب ونضحك ونجري ماكناش نعرف في حياتنا غير اللعب ودول أطفال مايعرفوش في حياتهم غير الحقن والكيماوي والشاش والقطن


الحمد لله إني ماعايشتش التجربة دي عن قرب وأتمني من ربنا إني ما أعيشهاش وربنا يعين كل مريض بالمرض ده او ليه عزيز مصاب بيه بس أنا مرة عشت موقف لايمكن أنساه أبدا ماحييت كنت مرة مسافرة في اتوبيس من القاهرة لقيت أم وأب ومعاهم طفل عمره حوالي 6 سنين وكانوا قاعدين قدامي وجنبي كان فيه سيدة معاها طفلين حوالي 3 سنين و9 سنين فالأطفال دول قعدوا يلعبوا مع بعض ويجروا في الأتوبيس ولما الطفل الأول شافهم نزل يلعب معاهم وهوه بيلعب الكاب بتاعه وقع وعرفت على طول وقتها إنه طفل مريض بالمرض اللعين ده بعد شوية قليلين قوي الطفل ده جه سند على رجلي وكان نفسه عالي قوي بطريقة ملفتة للنظر جدا وبعدين طلع يجري على أمه وقالها أنا تعبان قوي ياماما أنا عاوز أروح المستشفى علشان أخد حقنة البروفين علشان أنا تعبت قوي تخيلوا طفل عمره 6 سنين مايعرفش حاجة في الدنيا غير حقنة البروفين اللي بتسكنه علشان يعرف يلعب مع أصحابه


الطفل ده عمره ماعمل حاجة نفسه فيها في الدنيا وإحنا لو ماساعدناهوش هيبقى محكوم عليه بالإعدام وإحنا ممكن نشيل الحكم ده عنه لو قدرنا نساعده بفلوسنا ولو قدرنا نروح نزوره ونخفف عنه ونحسسه إنه ممكن يعيش حياته كطفل سوي
أنا معنديش كلام تاني أقوله غير إننا الأطفال دول بني آدميين زينا يعني بيحسوا وبيفرحوا وبيزعلوا زينا بالظبط وأنت لما بيبقى عندك دور برد واللي حواليك ما بيسألوش عليك بتتعب اكتر وبتضايق أكتر مابالكم بأطفال مصابين بمرض لعين سرق منهم طفولتهم وأحلى أيام عمرهم وسرق الضحكة من على وشوشهم وقلوب أهلهم ياريت اللي يقرا البوست ده يروح على مدونة رسول الله علشان يعرف أكتر ويحاول يتكلم عن الموضوع أو على الأقل يحط الصورة


ودي ياجماعة بعض طرق التبرع واللي عاوز يعرف أكتر عن التبرعات يدوس على الصورة اللي على اليمين


البنوك :- (ودى متركز عليها كتير فى وسائل الاعلام ومش هنخوض فيها ) .
انترنت الخير (هنركز اكتر عليها ):-يمكنك التبرع من خلال أستخدام ارقام انترنت الخير : 07775757 أو 07075757 بنفس سعر المكالمة العادية كما انه يمكنك حساب صافي قيمة ما تبرعت به بأستخدام عداد الخير ...
التليفون (هنركز اكتر عليها ):- يمكنك الاتصال برقم 1468 أو 2357 من اي تليفون محمول او برقم 09009555 أو 09000957 و التبرع لصالح المستشفى اثناء استماعك للرسالة الصوتية . سعر الدقيقة جنيهان
بطاقة الائتمان (هنركز اكتر عليها ):- خدمة جديدة تقوم بها مستشفى 57357 لتسهيل التبرع بالتعاون مع بنك مصر و شركه Verisign العالمية لتأمين المواقع على الانترنت. يمكنك التبرع بأي عملة صدرت بها بطاقتك الائتمانية في أي بلد في العالم بما يعادلها من الدولار و ستقوم مؤسسه فيزا و ماستر كارد بتحويلها إلى دولار .فقط اضغط على اختيار دولار ,فنحن بحاجة إلى العمله الصعبة لتمويل عملية استيراد الأجهزة و المعدات الطبية .
البريد المصرى (هنركز اكتر عليها ):- يمكن التبرع فى اى فرع من فروع مكاتب البريد المصرى لحساب رقم 26386
**** حملتنا على ال facebook ( ودى اهداء من مدونة قطرات ندى . جزاها الله خيرا ) :-) http://www.facebook.com/group.php?gid=139959994897&ref=search&sid=100000133813777.2100342868..1



وفي الأخر ها أقولكم بس حديث الرسول الشريف " مثل المؤمنين في توادهم وتراحمهم كالجسد الواحد إذا اشتكى منه عضو دعا له سائر الأعضاء بالسهر والحمى"

هناك 13 تعليقًا:

رنونة حكومة ميخو يقول...

قطعتى قلبي يا شيخة
ايه الكلام الكبير والمؤثر ده
والله الواحد حزن وعرف نعمة ربنا عليه
ربنا يعافينا م المرض ده ويعافي كل الناس..كفاية اعلانات المستشفى..تبكي ..ونظرة الاطفال تتعب قوي ..ربنا يشفيهم ويعافيناانا استعملت قبل كده عداد الخير ده ايام ما كنت بادخل بالمودم ((الله لا يرجعها ايام))
بس كان لذيذ بيحسب اتبرعتى باد ايه تقريبا ...

ربنا يزيد حبك للخير يا شيكولاتي

شوكولاتة يقول...

رنونة حكومة ميخو
اللاااااااااه ايه الاسم الجديد ده خلاص ننسى رنونا الطيوبة ونتعرف بقى على رنونة حكومة ميخو اللي ماسكاله النشابة في إيد والمقشة في إيد تانية
ربنا يخليكو لبعض ياحبيبتي

ياللا بقى شد حيلك معانا

وحشتيني يانور عيني
أمووووووووووووووووووه

طهر فؤادك يقول...

السلام عليكم ورحمة الله وبركاتة ,,,
ربنا يكرمك يارب والمسلمين ... ويجعل بوستك الجميل الرائع دة فى ميزان حسناتك اللهم امين والمسلمين ... وربنا يتقبل منك ومنا والمسلمين صالح الاعمال اللهم امين .

شوكولاتة يقول...

طهر فؤداك
ربنا يكرمك ويكرمنا جميعا ويوفقك دايما للخير وصالحات الأعمال

تحياتي

فشكووول يقول...

هايل يا شيكولاته.

ربنا يجعله فى ميزان حسناتك

بس عايزين تعملوا حمله للمستشفى الام اللى هى مستشفى المعهد القومى للاورام لان هذا المعهد يقوم برسالته خير قيام فى مكافحة المرض اللعين ولا تقل رسالته عن رسالة مستشفى سرطان الاطفال لانه يستقبل يوميا حوالى 500 حاله وربنا يشفى الجميع ويقينا ويقع الجميع شر هذا المرض اللعين

تحياتى

ليس فقيرا من يحب يقول...

ربنا يكرمك يارب يا شوكلاته

ويجعله فى ميزان حسناتك

بدراوى يقول...

ازيك يا شيكولاته
كنت عاوز أسألك سؤال كدة بخصوص الإنجليزى ، معلش بدوشك

هو انا حضرتك عملت اختبار تحديد مستوى و الحمد لله طلعت فى المرحلة المتوسطة اللى هيا مستوى 12 من 18
ده طبعاً شىء كان غير متوقع بالنسبة لى خالص

بس فى النتيجة بيكتبوا
independant 6
يعنى فى المرحلة المتوسطة

دلوقتى انا بدأت او محاضرتين فى الكورس و الاولى كانت تعارف و الثانية بقى كان شوية تدريبات ظريفة كدة و لسة يعتبر مبدأناش فى المنهج

المشكلة بقى هيا انى مهتم اوووووووى
بانى اقدر اقرا انجليزى كويس بحيث لو مسكت جرنان او موقع اخبارى انجليزى اقدر اترجم و افهمه صح بدون الحاجة لمترجم جوجل او غيره بحيث ابقى فاهم
و مهتم بالقدرة على الكتابة بالإنجليزى

يعنى مهتم بال
reading و writing

المشكلة فى ايه بقى
المشكلة انهم شكلهم حيركزوا فى ال
listening
معانا اكثر من الباقى

و طبعاً انا فى ال
listening
ابيض يا ورد لأن طبعاً نظام التعليم المصرى معملناش الجزئية ديه خااااالص

عارف انك قولتيلى انه عشان تحسن لغتك تسمع النايل تى فى الدولية كثير
حعمل ده

بس انا مهتم اوووى بفكرة الكتابة و القراية اكثر من السماع

و نفسى اتأسس فيهم اكثر

اتمنى يكون كلامى اتفهم ووصل
و ميكونش ملخبط

اه حاجة اخيرة هو ال
advanced بيركز عادة فى ايه
لأن انا فاضلى مستوى يخلص و اخش فى
advanced

و شكراً مقدماً على ردك
و معلش على الدوشة
تحياتى

micheal يقول...

عجباني الحملة دي المنتشرة في كذا مدونة بالفترة الأخيرة
سؤال:ليه حذفتي كومنتك عندي؟؟
:)

شوكولاتة يقول...

فشكول
أستاذي فشكول هاحاول على قد ما أقدر إني أقرا عن المعهد وأكتب حاجة عنه علشان ماينفعش كل التبرعات تروح لمكان واحد هايبقى أحسن لو وزعناها فعلا

تحياتي أستاذي

شوكولاتة يقول...

ليس فقيرا من يحب
إيانا وإياكم يارب ياروني
وربنا يقدرك على فعل الخير

تحياتي ياقمر

شوكولاتة يقول...

بدراوي
أولا مفيش اي دوشة أنا يشرفني أساعدك وثانيا لو احتجت أي حاجة أؤمرني

واضح كده إن مستواك كويس قوي وسهل تتعل الحاجات الجديدة
بس هو الطبيعي إنك طالما بتاخد كورس TOEFEl متكامل يبقى لازم تاخد كل حاجة مش Listening بس يعني أكيد المدرب بتاعك بيدربكم الأول إزاي تسمعوا إنجليش علشان بعد كده يعرف يكلمكم إنجليش وتبقوا فاهمينه كويس قوي وأكيد بعد كده هايركز على الفروع التانية
وبعدين حضرتك لازم تهتم جدا Listening علشان هوه اللي هايخليك تفهم اللي قدامك بيقول إيه علشان تعرف ترد عليه كويس يعني من وجهة نظري انه اهم من Writing بس لو عاوز تعرف تقرا احسن ممكن تقرا حاجات انجليش زي الجرايد أو القصص أو المواقع اللي بالإنجليش بس في الأول مش لازم تهتم إنك تترجم كل كلمة بتقراها لأنك هاتزهق بسرعة يعني ترجم كلمة وحاول تخمن معنى كلمة تانية وطنش كلمة تالتة لو مش مؤثرة قوي شوية بشوية هتلاقي اتكون عندك حصيلة كلمات معقولة جدا
ولما تحب تكتب حاجة بالإنجليش استخدم أبسط الجمل لأن الأجانب نفسهم دلوقتي بيعملوا كده يعني مش بيزروطوا الجملة وبعدين لما تلاقي جملة كبيرة قسمها لمجموعة جمل صغيرة تعرف تعبر عنها ببساطة

advanced يعني المستوى المتقدم يعني هايبدأ يدرسلك حاجات أعلى من المستوى اللي انت فيه

http://dvd4arab.maktoob.com/search.php?do=process&query=new%20interchange&mfs_type=forum&utm_source=related-search-dvd4arab&utm_medium=related-search-links&utm_campaign=dvd4arab-related-search&highlight

اللينك ده في كتب new interchange كلها وهيه الماتريال المستخدمة في الجامعة الأمريكية ودي هاتساعدك جدا حملها وصدقني هاتفيدك

واللينك ده برضو هايعجبك قوي
http://www.ikhwan.net/vb/showthread.php?t=51303

ادخل عليهم وقولي رأيك ويارب أكون قدرت أفيدك

تحياتي

شوكولاتة يقول...

مايكل
لما تقرا البوست الجديد ياعميد هاتفهم كل حاجة بس كان لازم امسحه صوعبت عليا قلت هابقى انا والانترفيوهات عليك حرام برضو

تحياتي

طهر فؤادك يقول...

السلام عليكم ورحمة الله وبركاتة
ربنا يكرمك يارب والمسلمين ..ودة شكر واجب لازم اقدمة من حملة "مدونتك هتنقذ طفلك".. وجزاكم الله خيرا والمسلمين ودة موضوع الشكر فى اللينك دة ادخل وخد هديتك من هنا :-
http://rasoulallah1.blogspot.com/