السبت، 31 أكتوبر 2009

إيه الفرق ؟؟؟

شكرا جدا لكل الناس اللي ساعدوني ونصحوني في البوست اللي فات وأنا حاسة فعلا إني ارتحت لما قريت ردودكم عندي وده اللي أنا متوقعاه من أصحاب زيكم وبعتذر مرة تانية إني مكنتش متابعاكم الفترة اللي فاتت بس انا خلاص هارجع وأزهقكم أكتر من الأول نيهاااهاااااااااااااااااا

نيجي بقى لبوست النهاردة هو بوست غريب حبتين بس لما يكمل أكيد هايعجبكم

المشهد الأول:

محمد : بقولك إيه أنا حاسس إني عاوز أغير جو ماتيجي كده نخرج نتعشى بره ولا إن شا الله حتى نتمشى ع الكورنيش شوية
علا: ياخويا ده انت فايق ورايق ده بدل ماتشوف عيالك وتذاكرلهم وتلمهم بدل ما الواحد منهم يبجيبلنا ملحق ع الاخر كده
محمد: يا بابا العيال مش هيسقطوا ولا حاجة طول ما احنا بنحبهم ومعيشينهم سعدا هما هيذاكروا وهاينجحوا
علا: والنبي يا محمد أنا مليش دماغ للروقان بتاعك إنت ده إنت مروق طول النهار وجاي تكمل روقانك عليا وأنا العيال قارفني فوق كده وشوف الهم اللي ورانا


المشهد الثاني:

جمال: عملت إيه ياعلي في مشكلتك مع أهلك
على: أنا تعبت قوي معاهم ده أبويا طردني من البيت أول إمب...
جمال: ليه يابني ؟؟
على: قال إيه كان بيكلمني وأنا مابصتلوش وهو بيتكلم
جمال: طالما إنت مش عاوز تتكلم طيب تعالى نتفرج على فيلم أحمد حلمي الجديد نفسي أشوفه من زمان
على: هوه نزل فيلم جديد أنا ماسمعتش عنه ولا حتى سمعت أغنيته
جمال: طيب طالما مش عاوز تشوف الفيلم ده تعالي نروح نشوف العيال أصحابنا فين ونقعد معاهم أنا أصلي شايفك مخنوق وقرفان فقلت أطلعك من المود ده
علي: .......................
جمال: لاااا ده أبوك ليه حق يابني مش بكلمك يا عم إنت ماتعبرني ولا تبص في وشي حتى
على: ما أنا سامعك كويس بس مش حابب أتكلم
جمال: خلاص ياعم مش هاتهبب أكلمك تاني طالما مش طايق تبص في خلقتي



المشهد الثالث:

المدير: أنا سمعت إنك ناوي تقدم استقالتك ياكريم الكلام ده مظبوط
كريم: اللي حضرتك سمعته مظبوط فعلا
المدير: بس أنا حاسس إن فيه حاجة مضايقاك بخصوص الشغل
كريم: أنا بس بدأت أفقد حماسي وإحساسي بحبي للشغل
المدير: طيب ليه ماتبصش للناس اللي حصلهم كده قبلك وتحاول تشوف هما عملوا إيه
كريم: بصراحة أنا مااهتمتش قوي باللي حواليا
المدير: لو بصيت لتجارب غيرك هاتعرف غلطتك وهاتحاول تصلحها إنت شخص كويس وأوعدني إنك تفكر تاني
كريم: خلاص يافندم أوعدك

دي مش مسرحية التلات مشاهد دول بيحصلوا في حياتنا كل يوم وزي ماشوفتوا المشهدين الأول والتاني انتهوا بخناقة يعني ماوصلوش لحل والتالت وصل لحل طيب إيه الفرق؟؟؟

الفرق ده بقى هو اللي أنا عاوزاكم تفكروا فيه كويس قوي عاوزة أعرف توقعاتكم للموضوع ده يعني أنتو شايفينه بيعبر عن إيه ؟؟؟ وبعد كده أنا هنزل بوست جديد هاشرح فيه المشاهد دي

هناك 17 تعليقًا:

Me7'o يقول...

شوكولاااااااااااااااااااااااااتة

أولاً حمدلله على السلامة
إيه يا بنتى الغيبة الطويلة دى

أنا سمعت أمى بتشتكى وبتقولى إلحق يا ميخو أختك نفسيتها تعبانة خالص وما أكلتش غير اتنين طن شوكولاتة بس

نفسها مسدودة يا حسرة عين أمها

هههههههههههههههههههههه

__________________________________

ثانياً
طبعاً وبنباهتى المعهودة
أنا مش فاهم حاجة من البوست ده غير إن المشهد الأول والتانى كان الطرف القرفان مش قادر يتكلم ولا حتى يعبر عن اللى جواه

أما المشهد التالت فالطرف القرفان بيتكلم وبيسمع وبيفكر وشايف إن الدنيا ما إنتهتش

سلام ياختى

شوكولاتة يقول...

ميخو أخويا حليب هارتي
هههههههههه انت دمك سكر والله

الله يسلمك ياحمودي ياعسل وأديني ياسيدي رجعت تاني أهوه

وبعدين ياأنصح إخواتك عادي جداإنك مش فاهم ليه مستغرب المرة دي يومين كده وأفهمك الموضوع

أمووووووووه
سلام يا أخويا

ستيته حسب الله الحمش يقول...

حمد الله على سلامة الوصول لأرض بلوج سبوت :)
تعالي نحلل المواقف
الموقف الأولاني راجل ايده في المية الساقعة
وهي مخنوقة منه ومن عياله
وناوية تلتهمه زي أم اربعة واربعين
ودي علشان يتحاور معاها لازم اولا يبدأ بمساعدتها ولو قليلا
على قدر وقته
ثانيا يسيب جسمها يرتاح من الأشغال الشاقة
بسسسسسسسسسسسسس
ساعتها ها تخرج وتضحك وتقدر تكمل حياة التعب
الموقف التاني
أظن يا أوختشي فيه ناس طبيعتهم فعلا لما يبقوا متضايقين مش بيعرفوا يتواصلوا
بيبقوا مخنوقين وخانقين في ذات الوقت
وبالمناسبة دي طبيعة
نوع من الإنغلاق والقوقعة الذاتية
وللحق يا احلى شيكولاتاية
للأسف دول مينفعهومش نصائح
بتبقى طبيعة شخصية
بيحلوا امورهم بشكل افضل لما ياخدوا ويدوا مع نفسهم
الموقف التالت شخص منطقي بيحب ساعة العسر ياخد ويدي
ومثاله الأعلى "لا خاب من استشار"
تحياتي

مي يقول...

اهلالالالالالالالالالا بالشيكولاتة كلها فينك ياختى وفين مكسراتك كده كل ده يابايخة يخونك البندق
ههههههههههه
وحشتيييييييييييييننىىىىىىى جداااااااااا

الموضوع حلو اوووووووووى
انا مش هتكلم باستفاضه
بس كل واحد فينا بيبقى عايز نفسه وبس مش بيدور على راحة التانى مش بيقدر ظروفه المهم حاجته تتعمل وتخلص وبسسسسسسسسسسس
انعدمت لغى الحوار والاحترام مبقاش فى وقت نناقش كله تيك اواى حتى فى علاقتنا مع اهلنا وعلاقتنا مع حياتنا كله عايزينه بسرعة وجاهز
الحوار التالت يعتبر اعقلهم لانه بياخد ويدى فى الكلام بيبص للامر من كذا منظور مش بياخد رايه من دماغه او بيسمع من هنا ويخرج من هنا لا

ووووبجد وحشتيييييينى ياشيكولاتى
وتسلم ايديكى ياقمر
بوسة البوست هتتباسى يعنى هتتباسى ههههههههه
اموووواه

فتاه من الصعيد يقول...

ازيك يا شيكو

كل ابطال قصتك مش لاقيين حد يفهمهم ويحس بمشاكلهم ...... مع انهم لو دوروا على اللي يفهمهم هيلاقوه قريب قوي

صاحب او زوج او زوجه او رئيس عمل

تحياتي

احساس طفلة محبة للرومانسية بس واقعية يقول...

المشهد الاول والتانى
مكنش فى مجال حوار مشترك بين الطرفين كل واحد بيتكلم من وجهة نظرة وحالتة النفسية
والاتنين مش منسجمين لان كل واحد مش مقدر حالة التانى او خلينا نقول الاتنين اللى عايزين يخرجوا مش مقدرين حالة الاكتئاب او الارهاق اللى عند الطرفين اصحاب المشكلة

بس فى المشهد التالت فى حوار مشترك وعقل واعى بيستوعب واذا كان قرر يسيب شغلة بس لانه فقد حماسة فأكيد هيقبل وهيتأقلم مع نقاش واعى وهادئ بالشكل دا

دمتى بكل خير
نورتى المدونة :)
تقبلى مرورى

أميرة علي كوكب مهجور يقول...

لا تجبلي فراخ بانيه لا بلاش يا ولاه :)
اه فراخ بانيه اصل الشوكولاته راحت عليها وش بيطلع لسانه :)

بصي اللي فهمته اننا لو حوالنا نوصل افكارنا للناس اللي حوالينا بطريقة هادية ونتنقاش يعني في هات وخد وكل واحد بيعبر عن اللي جواه بطريقة كويسه وبتكلم بهدوء بنفهم بعض اكتر بنفكر مع بعض احسن وبنوصل لحل يرضي الكل

اه ده اللي فهمته والله ع ما اقول شهيد

سجود يقول...

السلام عليكم
انا شايفه ان المدي ادي ثقه لكريم وكلمه بهدوء وحاول يحل المشكله
اما جمال اتسرع علي علي من غير ما يشوف هو بيعمل ليه كده
وعلا برده اتسرعت علي محمد كانت المفروض تنزل تتمشي
انا نفسي الناس تحاول تحل مشاكل الناس اللي ادامهم وتحلها حل ايجابي مش سلبي

ঔღঔ نـــوارة ঔღঔ يقول...

ازيييك ياقمررررر

وحشاني والله

منورة البلوجر كله

الموقف الاول

الزوجة نكدية حبتين الراجل حاول يخفف عنها ويطمنها انه مفيش داعي للخنقة الي هي فيها مفيهاش حاجة لو نزلت تتمشى .. كان المفروض تهدي اعصابها ومفيش داعي للخناق

الموقف التاني

علي مش بيفهم خالص بلغة الحوار صاحبه عمال يجيله يمين وشمال وهو قافل ودا غلط طبعا يعمل ايه اكتر من كدا عشان يخفف عنه المفروض كان يروق شوية ويفضفض لصاحبه ..


الموقف التالت

الموظف نشيط ومخلص بعمله ومش عاوز يقتله الركود والروتين ومع ذلك تناقش ووضح وجه نظره للمدير واقتنع بفكرته وقال هيفكر

ممممممممممم

منتظرين رايك ياقمر

اموووووووواه

MOHAMMED ELBANNA يقول...

شوكولاتة
حمدا لله على السلامة
وفعلاً مواقف في حياتنا متكررة .
تقبلي تحياتي
محمد البنا

micheal يقول...

هو فين المدير ده
ربنا يكتر من أمثاله
:)
يا سلام لو تبقى المناقشة البسيطة العقلانية هي أساس حياتنا
حلو يا شوكولاتة
كملي واحنا وراكي
تحياتي

Pink Dreams يقول...

ايه دا مش معقول


نورتى مدونتك من تانى يا قمرايه

بجدب جد وحشاااااااانى موووووووووووت

ووحشنى قوى الكلام معاكى

Pink Dreams يقول...

فعلا دى مواقف متكرره فى حياتنا

يعنى مثلا الزوجه اللى مش مهتمه بزوجها وتيجى فى الاخر وتقول يا ريت اللى جرى ما كان

والتانى اللى حتى مش بيفكر يسمع صاحبه

بجد البوست جميل قوى

وبانتظار البوست الجاى ان شاء الله

امووووووووووووووووووووواه

لا تـــشـــتــــاق يقول...

والله انا شايف هو مش فرق بالعكس هو تشابه ان ال3 شخصيات مبيسمعوش سمعهم تقيل او بيسمعوا الى على مزاجهم والى مش
مبيسمعهوش

ليس فقيرا من يحب يقول...

شوكلااااااااااااااااااااااااااااتى

وحشاااااااااااااااااااااااااانى

ازيك يابت يا روقه وازى اخبارك

فينك مختفيه كده ليه

بثى القاسم المشترك ههههههههههههههههه

ايه ده دا انا باتكلم بالنحوى

ما علينا القاسم المشترك فى التلات

مواقف هو لغه الحوار مهو اصل الحوار

ده فن ومحتاج تكاتيك ههههه معينه

علشان تقدرى توصلى لحل او حتى توضحى

للى قدامك وجهه نظرك يبقى طريقه

ثقافه الحوار والصبر هما اللى بيوصلونا

لحل المشكله
مليش نفس ارغى مستنيه توضيحك

طهر فؤادك يقول...

السلام عليكم ورحمة الله وبركاتة

ربنا يكرمك يارب والمسلمين ... وبوست جميل جداااا ... وفية توضيح كامل ... وحمد الله على سلامة كتاباتك المتميزة ..

اخوكى فى الله

العيسوى الصغير يقول...

المشهد الاول شكله(محمد ) مختارش الوقت المناسب

اما المشهد الثانى
جمال هو مش عاوز يسمع اصلا

لان على رد عليه وقال :
قال إيه كان بيكلمني وأنا مابصتلوش وهو بيتكلم

يعنى فتح باب انه يحكى بس (جمال) هو اللى قفل الموضوع و دخل فى موضوع تانى وقال :
طالما إنت مش عاوز تتكلم طيب تعالى نتفرج على فيلم أحمد حلمي الجديد نفسي أشوفه من زمان

(على) مرفضش ولا قال لا دا سال وقال:
هوه نزل فيلم جديد أنا ماسمعتش عنه ولا حتى سمعت أغنيته

مستنى يكلمه عن الفيلم
يقوم يغير الموضوع تانى ارف منه مردتش عليه وعنده حق


المشهد الثالث

الموضوع محدد والكلام كامل لأخره مفيش (...)يعنى مفيش حد قطع كلام التانى