الخميس، 5 نوفمبر، 2009

غير حياتك .. حدد نمطك


بعد ماسيبتكم يومين حلوين كده تفكروا في الموضوع وبعد الإجابات الرائعة اللي قربت كتير من الموضوع أعرفكم بقى دلوقتي إيه الفرق؟؟؟
الفرق في كلمتين صغننين خالص هما الأنماط التمثيلية
إيه بقى الأنماط التمثيلية دي ؟؟؟ دي في الكيميا ولا الجغرافيا يعني ؟؟
أقولكم الأنماط التمثيلية دي نمط حياة وتفكير وكلام يعني كل واحد منا ليه نمط تمثيلي وأشهر تلات أنماط هما :
أولا: البصري:
النمط البصري ده بنشوفه كويس قوي في واحد زي جمال وواحدة زي علا كده فاكرينهم
طيب إيه أهم سمات النمط ده؟؟؟
هاقولكم:
سرعة اتخاذ القرارات حتى عندما تحتاج إلى تأمل أو تفكير
التفاعل العالي مع التغيرات السريعة
يصلح أن يكون قائد لأزمة ولأنه يضع كل المعطيات أمامه على هيئة صور هذه القدرة تجعله يضع كل المتغيرات أمامه فيتصرف بحكمة يتعامل مع الإختبارات السريعة والشفوية بشكل جيد· يرى مالا يراه الأخرون لأنه يستطيع أن يتخيل العواقب والنتائج كما أنه يتسرع في الرد على الأخرين لذا فإنه غاليا مايقع في المشاكل
صاحب النمط البصري يرى العالم من خلال الصور، لو تذكر حادثة ما , تذكر صورمنها ، تكثر في مفرداتة التعابير الصورية مثل أنا شايف تخيل تصور إلخ
كما أنه سريع في الكلام ،يتجه نظره غالباً للأعلى يميناً ويسارا لأنه دائما يمشي وهو يرجع رأسه وأكتافه للوراء فيراه الكثيرون على أنه شخص مغرور
الشخص البصري يأخذ قراراته سريعاُ لأنه يرى بسرعة نتيجة قراره
ويتعلم البصري عن طريق التكرار الكتابي , التخيل الرسم الألوان , الخريطة الذهنية, الربط الصوري والتلخيص .
كما أنه غالبا مايتحدث بصوت عالي ويقاطع الآخرين كثيرا
وأنفاسه متسارعة جدا لأنه يشغل حوالي ثلث الرئة بالهواء فقط
طاقته عالية جدا



ثانيا: السمعي وده كان بيجسده في المشاهد علي فاكرين كان بيتعامل إزاي مع جمال ومع والده
أهم سمات الشخص السمعي
عقلاني منطقي·
يمرر الكلام على عقله وفي كثير من الأحيان أكثر اتزان في اتخاذ القرارات· ينطق مايقصد ويقصد ماينطق
يتذكر أكثر مايسمعه
صاحب النمط السمعي يتميز بالبطء في الكلام ، يتقن الأستماع ولايقاطع ، يهتم إلى حد ما باختيار الألفاظ
ويغلب على كلامه مرادفات تتعلق بالسمع مثل أنا سامع كلي آذان صاغية وهكذا، يتجه بصرة إلى اليمين واليسار بمستوى أذنيه ويتعلم السمعي بالتكرار اللفظي ، الحوار المناقشة , شرح المعلومة ,السؤال والجواب , ربط الأصوات واستخدام الموسيقي ,وشرح الخريطة الذهنية .
هادئ إلى حد ما كبير لأنه يملأ حوالي ثلثي رئتيه بالهواء



ثالثا: الشخص الحسي زي محمد جوز علا اللي مكنش عارف يتفاهم معاها خالص لإختلاف أنماطهم الشديد
سمات الشخص الحسي
التفاعل مع الأحداث وعدم الجمود ولكن بعد أن يشعر بها
لايأخذ القرار حتى يتفاعل معه ولذلك هو بطيئ في اتخاذ القرار
إن صاحب النمط الحسي كلامه بطيء نوعاً ما،تكثر فيه المفردات التى تعبر عن المشاعر والأحاسيس مثل أنا حاس إحساسي بيقولي كده.
ويتعلم الحسي بالتكرار الكتابي واستخدام الحواس اللمس النظر السمع ,الربط الحسي والمشاعر, التعلم بالمرح واللعب , عمل المجسمات التنظيم والترتيب الخريطة الذهنية .
هادئ جدا لأنه يملأ رئتيه بالهواء فهو يتنفس كالأطفال من منطقة البطن.
ودود ولطيف ومحبوب.
يمشي منحنيا للأمام قليلا.





دي ببساطة أشهر صفات الأنماط التمثيلية الثلاثة الأشهر ولازم كل واحد يعرف يحدد نمطه ونمط الشخص اللي بيتعامل معاه علشان يوصل معاه لنقطة تفاهم زي ماشفنا كده مع كريم والمدير لأن المدير عرف يحدد نمط كريم وتعامل معاه على الأساس ده وقدر يقنعه بهدوء لكن في حالة الزوجين محمد كان شخص حسي وعلا كانت بصرية وهما الاتنين مش فاهمين بعض علشان كده ماوصلوش لنقطة تفاهم واحدة ونفس الموقف تكرر بين جمال وعلي فجمال شخص بصري وعلي شخص سمعي وطبعا ماوصلوش لحل


هاه كل واحد بقى يحدد نمطه ويقولي وممكن الواحد يجمع بين أكتر من نمط وقولولي بقى؟؟؟

لكن السؤال إيه هو أفضل نمط في الأنماط التلاتة؟؟؟


السؤال د يبقى سؤال المشاهدين قصدي الناس اللي بتقرا عاوزة اعرف توقعاتكم وهارد على السؤال ده في البوست اللي جاي وهاشرح فيه إزاي نتعامل مع كل نمط



ملحوظة صغنونة على جنب كده : الموضوع ده كله مبني علي أساس كورس انا درسته من سنتين كده وهاحاول أنزلكم أكبر قدر منه


هناك 41 تعليقًا:

شوكولاتة يقول...

صبح صبح ياعم الحاج أنت وهوه وهي
يافتاح ياعليم يارزاق يا كريم

شوكولاتة يقول...

مدونتي واحتلها براحتي بقى
نيهااااااهااااا

شوكولاتة يقول...

أروح أشرب كوباية شاي ونررررررررجع مرررررررررة تانية

بســـمة انور يقول...

انا كييييييييييييييت

بســـمة انور يقول...

ازيك يا قمرة ياللى وحشانى خااااااااالص مالص

بســـمة انور يقول...

اعتقد والله اعلم يعنى نا النم الثالث اللى هو الحسى
مش عارفه هو صح ولا لاء
بس انا خليط بين البصرى والحسى

بســـمة انور يقول...

شوكلاتتايه ي قمر لينك مدونتى اتغير على فكرة

http://basma-2010.blogspot.com/

ضيفيه عندك بقى
سلاموز يا قمرة

ستيته حسب الله الحمش يقول...

حلو جدا الكورس ده
فهمني ناس كتير حواليا
طبعا مقدرش احدد انا مين في دول
لكن اظن والله اعلم ان مفيش فروق حادة كده في البشر
يعني مونكن اي بوني ادم يحمل اكثر من نمط
وبرضه منقدرش نقول اي نمط احسن
لو وضع صاحب النمط الصحيح في الموقع الصحيح ها نلاقي عندنا شخص ناجح
والا ايه؟
تحياتي على الموضوع المفيد جدا جدا جدا

بدراوى يقول...

انا اعتقد انى حسى

عاشق الجنة من الإخوان صلى على النبى يقول...

جزاكم الله خيراً
بجد معلومات رائعة
في انتظار زيارتك عشان تنور مدونتي
صلي علي النبي

ليس فقيرا من يحب يقول...

السلام عليكم

ازيك يا روقه يا حبيبتى

وازى اخبارك

البوست ده فكرنى بموضوع كنت درسته

ايام الدبلومه اسمه انماط التعلم

وكانت تقريبا متقسمه بالشكل

وكان فى اختبار فى موقع على النت

وطبقته علشان اعرف انا اى نمط من دولا

لقيت انى عندى الانماط التلاته بنسب

مختلفه ومعتقدش ان فى نمط افضل من

التانى وممكن كمان لو حد نمطه بصرى مثلا

انه يقوى الانماط التانيه عنده ويحسن

طريقه تعلمه وتناوله للمشكلات

ما علينا وسيبك من الهلس ده

انتى اخبارك ايه

هههههههههههههههههههههههههه

رنونة حكومة ميخو يقول...

أهلين وسهلين شيكولاتة الناتة كوناتة
الموضوع ده هااااااااايل بجد خصوصا انى بموت فى حاجة اسمها تنمية بشرية
حضرت كورس من سنة لدكتور كان برده بيتكلم عن انماط الشخصية وعملنا التست معاه وطلعت حسي كان بيقعد يتريق ع الحسي ده تريقة هههههههه وحضرت كمان لابراهيم الفقي كورس لما جه بس انا شايفة ان الحسي هوه افضل الشخصيات مش عشانى طبعا هههههه بس بجد بحس ان الحسي الوحيد اللى يقدر يتعامل مع البصري والسمعي يعنى يريحهم فى التعامل بس للاسف هوه برده النمط الوحيد اللى مش اى حد يعرف يتعامل معاه

هقولك حاجة الدكتور اللى عطانى الكورس كان بيقول الشخص البصري ده لو انت بتتناقش معاه ممكن تلاقيه باصص على كوباية على حرف الترابيزة مثلا وهيتجنن عشان يعدلها وخايف احسن تقع
تخيلي بقى يا روقة ان اخوكي واحنا مخطوبين كنت بكلمه ولقيته بيقولى رنا شيلي الكوباية دي احسن هتقع ...على طول عرفت انه بصري وسالته قالي انه فعلا بصري
شوفى بقى حسي عايش مع بصري الدنيا هتولع

رنونة حكومة ميخو يقول...

روقاااااااااااااااااا
روقااااااااااااااا
روقااااااااا

مبترديش ليه
روقاااا



















عن جد كتير اشتقتلك

*البت المشمشية *حلوة بس شقية * يقول...

قمر
انتى بجد قمر
ليه بقه مش عارفه بأيدك اللى متلحوسة شيكولاتة دى

احساس طفلة محبة للرومانسية بس واقعية يقول...

ينفع الثلالثة مع بعض
اصل فى كل نمط فى حاجة شبهى
يعنى ساعات كدا وشوية كدا واحيانا كدا :)
حقيقى مش كل الوقت بمشى بنمط واحد والموقف والشخص اللى قدامى اكيد بيفرق معايا فى اسلوب الحوار
اما انهى افضل بقى فمعرفش بس بتهيألى ان الافضل مش النمط وطريقة النظر او السمع او التأثر المهم طريقة التفكير تكون ثابتة فى كل المواقف ونقدر نسيطر على الاحداث والتفكير بمبدائ واحد مهما كان فى متغيرات

دمتى بكل خير
تقبلى مرورى

ليس فقيرا من يحب يقول...

شوكلاااتى

خير قلقتينى انا موجوده اهه

انتى موجوده طيب

فتاه من الصعيد يقول...

اعتقد اني من النمط البصري

اصلي بحب اصور وامثل كلامي بصور وامثله وحكايات

حلو البوستات دي ..... تسلم ايدك

هي دي بقا التنميه البشريه :)

تحياتي

شوكولاتة يقول...

بسومة الأمورة
نورتي المدونة ياسكر انتي
وألف مبروك ياستي النيولوك الجديد للمدونة
برافو عليكي إنك عرفتي تحددي نمطك

وحشتيني موووووووووووووت
أموواااااااه

شوكولاتة يقول...

دكتورة ستوتة
الأنماط دي فعلا بتخلينا نفهم الناس اللي حوالينا كويس قوي وبتخلينا نعرف نتعامل معاهم أحسن
بس حاولي يا دكتورة تحددي نمطك لأن ده هيريحك أكتر هايخليكي تفهمي أكتر الحاجات اللي حضرتك بتحبيها والحاجات اللي بتكرهيها
وعلى فكرة الفروق دي لو دققتي فيها هتلاحظيها كويس قوي بس يمكن علشان بتشوفي ناس بتخلط بين أكثر من نمط

شكرا جدا على رأيك في الموضوع
تحياتي

شوكولاتة يقول...

بدراوي
كويس قوي يا أستاذ بدراوي بس تابع البوست اللي جاي هتتعرف أكتر على سمات النمط ده

تحياتي

شوكولاتة يقول...

عاشق الجنة
جزانا الله وإياكم أحسن الجزاء
وشكرا جدا على رأي حضرتك في مدونتي المتواضعة دي
ومدونتك عجبتني جدا جدا

تحياتي

شوكولاتة يقول...

روني اللي بتحب ومش فقيرة
أنا الحمد لله كويسة طول ما أنتي كويسة ياقمر بس انتي وحشاني جدا

عندك حق فعلا كويس قوي إن الواحد يمزج بين التلات أنماط لأن ده هيريحه أكتر بكتير

وياريت ياقمر تجيبيلي الإختبار ده علشان ده مهم جدا

ومتقلقيش ياستي ولا حاجة أنا بس كنت عاوزة أطمن عليكي

سلاموز

شوكولاتة يقول...

رنونة شاويش ميخو
أنا هناااااااااااا ياستي بس أنتي عارفة الظروف بتاعت اليومين دول إدعيلي كده ربنا يسترها معايا

والبوست الجاي هااقولك ياستي إذا كان النم
ط الحسي هو أفضل الأنماط ولا لأ

هاتي بوسة يابت
أمووووووووووااه

شوكولاتة يقول...

مشمشية
والله ده أنتي اللي قمر بس هو إيه بالظبط اللي مش عارفاه ده

تحياتي

شوكولاتة يقول...

الطفلة الرومانسية
أنا كده متهيألي إنك شخصية رائعة بتعرف تتعامل مع أي حد وفي أي موقف وفي أي وقت كويس قوي وأكيد ده بيريحك كتير قوي

تحياتي وبوسيلي سومة الأمورة

شوكولاتة يقول...

ست الداكتورة ميرو
والله طول عمري بقول إن دماغك دي متكلفة وعالية قوي عرفتي على طول تحددي نمطك وأهم سماته

المهم إنتي أخبارك إيه؟؟
وحشتيني قوي

سلااااام

لا تـــشـــتــــاق يقول...

طيب والى واخد من الانواع التلاته صفات كتير
يعمل ايه

همســات عــلى ضــوء الــقمر يقول...

بصى بقى يااحلى شوكولاته

الاول وحشاااااااااانى موووووووووت

وكويس انك تراجعتى عن قرار التنحى وبتحطى حاجات حلوة ااهه

همســات عــلى ضــوء الــقمر يقول...

هو انا كوكتيل والله

كله على كله

بس مفيش حاجة اسمها ايه الاحسن

لان دى اختلاف شخصيات

يعنى مش اكون انا سمعى وانت تقوليلى لا البصرى احسن فادوس على الزرار اتحول بصرى

لا

هو المنطق فى ايه
فى المذاكرة مثلا
الحسى هتلاقيه بيجيب الوان فسفورية وبيخطط ويلون وكدا
السمعى عمال يسمع لنفسوا طول النهار
البصرى بيحفظ ويكتب

وفى الاخر النتيجة واحدى انهم بيذاكروا
فهمانى حبيبتى

المهم ان الواحد يشوف هو ايه
ويمشى على كدا

رنونة حكومة ميخو يقول...

تصدقي يا شيكولاتة فعلا زى ما قالت همسات على ضوء القمر وانا بذاكر كنت بجيب كل الالوان الفسفورية واقعد الون تقريبا مكنتش بذاكر...

بس انا لازات مصممة ان النمط الحسي افضل الانماط ولو ان الاحسن اللى يقدر يستعمل كل حواسه بتوازن
يعني نستعمل السمع والبصر والفؤاد
يااااااه ده ربنا قال ( إن السمع والبصر والفؤاد كل أولئك كان عنه مسئولاً) والله ما اخدت بالي غير دلوقتي
يبقى فعلا احسن حاجة اننا نجمع التلاتة
وفعلا لما حضرت الكورس الدكتور قال كده قال مينفعش حد يكون عنده حاجة غالبة ع التانية هيتعب جدا
المفروض تكون متوازن

Pink Dreams يقول...

اممممممممممم
متهيالى ان كل واحد مننا ممكن يبقى التلاته دول بنسب مختلفه على حسب الموقف

بس بجد تسلم ايدك على البوست

امووووووووووووووووواه

أميرة علي كوكب مهجور يقول...

ازيك يا قمر يارب تكوني بخير ليكي تاج عندي تروحي تستلميه :)

micheal يقول...

سرعة اتخاذ القرارات حتى عندما تحتاج إلى تأمل أو تفكير
التفاعل العالي مع التغيرات السريعة

يمرر الكلام على عقله وفي كثير من الأحيان أكثر اتزان في اتخاذ القرارات• ينطق مايقصد ويقصد ماينطق
يتذكر أكثر مايسمعه
صاحب النمط السمعي يتميز بالبطء في الكلام ، يتقن الأستماع ولايقاطع ، يهتم إلى حد ما باختيار الألفاظ

هادئ جدا لأنه يملأ رئتيه بالهواء فهو يتنفس كالأطفال من منطقة البطن.
ودود ولطيف ومحبوب.

يا سلام لو فيه ميسكس من الثلاثة دول
بس الواضح في إختياراتي أني بميل أكتر للسمعي
:)
بوست هايل يا شوكولاتة وحتخليني أطمع وأقول كملي بقية الدراسة في البوستات الجاية
:)
تحياتي

شوكولاتة يقول...

لاتشتاق
يستنى للبوست الجاي
هههههههههه

تحياتي

شوكولاتة يقول...

الهمسات الحونينة
وأنتي وحشاني أكتر والنبي يا توتا وأنا طبعا مقدرش أتخلى عن صفوف الشعب
ههههههههههههههه

كلامك مظبوط جدا دي أنماط بس الواحد لازم يعرف يوازن يعني مايستسلمش لأ لازم يطور من نفسه

تحياتي

شوكولاتة يقول...

رنونة شاويش ميخو
عندك حق والنبي يا أوختشي أحسن حاجة التوازن

وحشتيني ياحبي
أموووووووووووواه

شوكولاتة يقول...

شوشو البمبي
وحشاني موووووووت ياشوشو منورة والله أخبارك إييييييييه؟؟

سلاموز

شوكولاتة يقول...

أميرة الكوكو الوحدانية
تاج إيه هاتمسكيني ملكة الكوكو طيب وأنتي رايحة فين؟؟
أوعي يكون لسه عليكي اقساط وعاوزة تدبسيني فيها
هههههههههههههه

مية تاج وسؤال ياقمر

منورة البلوج

شوكولاتة يقول...

مايكل
وأنا كمان سمعية إلى حد ما كبير
ولا طمع ولا حاجة أنا فعلا هكمل

تحياتي

أبو العريف يقول...

ازيك يا شوكولاته

موضوع جميل جدااا

وانا بس في الفتره الاخيره بدأت اهتم

بالتنميه البشريه

من حوالي اسبوع كده

رحت اتفرجت علي شوية كتب لابراهيم الفقي

وما اششترتش حاجه

شايفه الاهتمام

بالنسبه للانماط

انا مقدرش اقول مين فيهم الافضل

بس بالطبع البصري مش الافضل اصلي اعرف واحد فيه الصفات دي

وغالبا هييجي يوم وارتكب فيه جنايه


اما بالنسبه لنمطي

معرفش برضك بس حاجه كده تدي علي بمبي

قصدي يدي علي حسسسسسسسسسي

متابع واهو اوفر من كتب ابراهيم الفقي

تحياتي

شوكولاتة يقول...

أبو العريف
أنا الحمد لله كويسة جدا

التنمية البشرية مجال لذيذ جدا بس الألذ إنك تتطبقه في حياتك علشان تستفيد منه بجد والموضوع ميبقاش مجرد قراية للقراية وخلاص وإن شاء الله هكمل في البوست

تحياتي