الأربعاء، 5 أغسطس 2009

مرايتي قوليلي يامرايتي

شفتو الصراحة



جالي سؤال من أخواتي وحبايبي ديالا وآيوشة عن أصدق عشر حاجات في حياتي وطبعا لازم أشكرهم لأنهم اعتبروني صديقة من أول مادخلت عالم التدوين بالرغم من إننا عمرنا ماشفنا بعض بس حسيت فيهم الجدعنة
ودي كانت أول مرة حد يسألني سؤال صريح قوي زي ده بس بصراحة وبيني وبينكم حسيت إن أنا محتاجة أجاوب على السؤال ده فعلا لأن دي هاتبقى أول مرة أواجه نفسي بالصراحة دي
يمكن اكون أخرت في الرد على سؤالكم ده لأني ماكنتش عارفة أقول إيه وبتكسف أتكلم عن عيوبي المتلتلة. أنا في حاجات كتير صادقة في حياتي لأني أصلا صادقة جدا وهاأحاول أعصر دماغي واتكلم عن أصدق عشر حاجات في حياتي
أولا:
أصدق حاجة في حياتي وجود ربنا ورحمته الواسعة اللي إن شاء الله هاتشملنا بالرغم من كل ذنوبنا. وطبعا عشقي لحبيبي سيدنا محمد صلى الله عليه وسلم. وأكيد الموت والعذاب والجنة والنار
ثانيا: إخلاصي في علاقتي بالناس اللي بحبهم واللي مابحبهمش لأن الناس اللي بحبهم دول كنز مقدرش أخونهم أو أعاملهم بطريقة وحشة والناس اللي مابحبهمش قمة إخلاصي معاهم إني بتجاهلهم علشان ماتعبش وماتعبهمش
ثالثا: عشقي لأهلي لأن اللي مالوش خير في أهله مالوش خير في حد

رابعا: ثقتي بنفسي واللي وصلتلها بعد سنين من العذاب وعدم الثقة بالنفس وعدم الرضا عن الذات
خامسا: إيماني بإن " من يتق الله يجعل له مخرجا ويرزقه من حيث لايحتسب"
سادسا:
بحب أكون أنا يعني بحب أعيش على طبيعتي إلى أبعد الحدود وأنسى كلام الناس اللي هدفه الوحيد يكسرني ويفقدني اعتزازي بنفسي
سابعا:
عشقى لعملي في الترجمة ويقيني بالله بأنه سيكرمني
ثامنا:
بحب اتحدى الدنيا اللي برضو مالهاش لازمة دي وأهزمها شر الهزيمة وأعرفها أنه لن يأتيها أحدا بعدي يهزمها كما كسرتها أنا
تاسعا:
حبي وإخلاصي لحياتي اللي جاية يعني أنا بخلص للشخص اللي هارتبط بيه من قبل ماأشوفه وأتمنى يكون زيي كده
عاشرا:
بحب قوي الناس المثقفين والناس اللي دماغها عالية قوي في العلالي


وعلشان أكون صريحة هاأقولكم أكترعشر حاجات بكرهها قوي


أولا:
عصبيتي هي أوحش حاجة في شخصيتي يعني سعادتك تكون قاعد مع واحدة مجنونة زي حالاتي كده وتلاقيني مرة واحدة اتعصبت ونطيت عليك وعضيتك وامشي واسيبك اتعصبت ليه بقى (والله لما أحمد نظيف يسيبنا في حالنا ماهاتعرف ولا أنا هاعرف) المشكلة إن الجنان ده طال الناس كلها حتى بابا وماما (ربنا يصبرهم عليا)
ثانيا:
كرهي الشديد للغلط بيخليني أضايق ناس كتير لأني بكون قاصدة خير بس بيكون شكله وحش قوي في الآخر
ثالثا:
بكره العيال الصايصة بتوع النو ويست والحظاظات
رابعا: بالرغم من أني طيبة قوي وبسامح كتيييييير بس لما بكره حد بكرهه أكتر من كراهية المصريين لتصريحات بطرس غالي

خامسا: مش مرنة خالص يعني لامؤاخذة كده دماغي زي القفل المصدي ومابحبش حد يقنعني بأي حاجة غير اللي في دماغي ومابحبش التغيير
سادسا:
بكره الناس اللي بيكدبو ويصدقو نفسهم
سابعا: بكره اللف والدوران والناس اللي بتحور وتنقل كلام
ثامنا: بكره كسلي قوي ونفسي أكون زي السحلفة اللي هي أنشط مني بكتيييير
تاسعا:
بكره السلبية عموما وسلبية المصريين خصوصا
عاشرا: أحيانا بكون حشرية ورغاية قووويييي وده بيعملي مشاكل كتيير وخاصة لما بتكلم بحسن نية وأتفهم غلط

حادي عشر: ....بكره


آه آه آآآآه خلاص خلاص كفاااية مين اللي رمى الطوبة دي ... آآآآه وكمان طماطم لأ...لأ بيض لأ
خلاص هقعد ساكتة
كانت معكم شوكولاتة من عنبر 7 بالقصر العيني بعد علقة موووت

هناك 37 تعليقًا:

مي يقول...

انتى جميلة اوىىى يا شيكولاتى
ربنا يسعدك فى حياتك
امووووه
باى ياقمر

مي يقول...

يالهوىىىىىىىىى هههههههههه انا اول تعليق لا لالالالالالالالامش مصدقة

مي يقول...

معلش كمان واااااااااااحد عشان الشيكولاتة بس
اموووووووووووووووه

Me7'o يقول...

ههههههههههههههه

يخرب عقلك يا شوكولاتة
إيه يابت الدم السايح اللى زى الشوكولاتة ده

"نفسي أكون زي السحلفة اللي هي أنشط مني بكتيييير "

"لما بكره حد بكرهه أكتر من كراهية المصريين لتصريحات بطرس غالي"

ههههههههههه

ضحكتينى قوى والله

إنتى بت جدعة

سلام يا أختى

شوكولاتة يقول...

مي
لولوولولوولولولوللللولييييييي
مي عندنا ... مي عندنا
ياسعدنا .... يافرحة قلبنا
مبروووووووووووووك أول تعليق يامستبده 3 تعليقات ورا بعض

شوكولاتة يقول...

مي
والله إنتي اللي سكر متغمس بشكولاتة جالاكسي ومحشي كراميل وفول سوداني
ربنا يسعدنا كلنا ياقمر ويسمعني عنك كل خير
أموووووووووووووووووووووووووووووه
سلاموز

شوكولاتة يقول...

Me7'o
ميخو أبو المخمخة والدماغ العالية المأنتخة
أنت طبعا نفسك تكون نشيط زيي كده مانا عارفاك لو طلبت تموت من الجوع هتموت بدل ماتقوم تطبخ
أمووووووووه
صباحك قشطة ياخويا

blue-wave يقول...

هههههههههههههههه
اجابات تحفه بصراحه
تحياتى

شوكولاتة يقول...

Blue wave
الله يخليك يادكتور عمرو كلك ذوق
تحياتي

غير معرف يقول...

لن اقول سوى ان اجاباتك رائعة وصادقة لانها دخلت قلبى فورا
وعاوزاة اقولك يابت ياشيكولاته
بعد الاجابات ديه انك مش بس شيكولاته
لا ده انتى طلعتى مارون جلاسيه كمان
حلوة ديه
تحياتى

غير معرف يقول...

كويس انك عرفتي تجاوبي

أنا موش عارفه اجاوب السؤال ده خالص من ساعه ما اتبعتلي

بس واضح انك دوغري وشفافه

سلام يا شيكو

شوكولاتة يقول...

أم مالك
كلك ذوق والله وقلبك ده كنز ربنا يباركلك ويباركلنا في حضرتك بس مش عاوزة حتة مارون جلاسيه؟؟
نورتيني

شوكولاتة يقول...

فتاة من الصعيد
بصي ياحبيبة شيكو انا السؤال ده جابلي انفلونزا حمير يعني دماغي قفل قدامه وماكنتش عارفة أحله بس زي ما قلت في البوست كده أنا واجهت نفسي بمنتهى الشفافية (مع تحيات الحزب الوطني)
أموووووووووه
سلام يابنت بلدي

Pink Dreams يقول...

بيض ايه بس دا اللى هنحدفه عليكى انتى تستحقى اننا نرمى عليكى ورد

ايه الجمال دا يا قمر

اجاباتك جميله ورائعه

ربنا يوفقك يا رب

وكل سنه وانتى طيبه

رمضان كريم

micheal يقول...

أحترم صراحتك يا شيوكولاتو وسعيد أني جت مدونتك هنا
تحياتي

شوكولاتة يقول...

Pink Dreams
ده من ذوقك والله ياقمرة يامنوراني دايما
وكل سنة وانتي طيبة ويارب ربنا يرزقك الرحمة والمغفرة ويكافئك بالعتق من النار ويارب دايما تفضل أحلامك وردي كده وتحققيها
وعلى فكرة تهنئتك دي اجمل تهنئة لأنها اول تهنئة تجيلي
ربنا يخليكي ليا أموووووووووووووووه
سلام ياقمر وكل سنة وأنتي طيبة

شوكولاتة يقول...

micheal
أشكرك يامايكل وبجد أنا اللي مبسوطة لأنك شرفتني في مدونتي الشوكولاتية دي ويارب ماتكونش دي آخر زيارة ودايما تشرفني كده
تحياتي

Unknown يقول...

مساء الخير
احييكي علي اول حاجة سيئة فيكي
بينا توافق رهيييييييييب في الحاجات السيئة كلها
خليها في سرك و متقوليش لحد

Ahmed Al-Sabbagh يقول...

عسسسسل
ربنا يكرمك

ادم المصرى يقول...

دمك خفيف جدا واسمك اخف منو ومدونتك جميله جدا

شوكولاتة يقول...

المعلم محمد صاحب المطعم - طعمية سخنة
لأ ماتخافش يامحمد سرك في إذاعة
إديني اتنين فول وواحد طعمية وكتر الكاتشاب والنبي
هههههه
تحياتي

شوكولاتة يقول...

أحمد الصباغ
أشكرك جدا أستاذ احمد وشرفتني زيارتك وياريت لو عندك معلومات أكتر عن نقابة المترجمين تعرفني
تحياتي

شوكولاتة يقول...

آدم المصري
كلك ذوق والله ياآدم نورت المدونة
تحياتي

funky girl يقول...

سادسا: بكره الناس اللي بيكدبو ويصدقو نفسهم
سابعا: بكره اللف والدوران والناس اللي بتحور وتنقل كلام
الحاجتين دول بجد اكتر حاجتين انا معاكي قيهم عشان بكرهم اكتر مانتي تتصوري

بس بجد انتي شخصية حلوة اوي
ربنا يكرمك :)

الحــ ــزين يقول...

الحــ ــزين

مش أكتر منى ياشيكولاتة بس احنا الاتنين بنحبها انا جيت اترازل علشان أقولك انى بحب برده الشيكولاتة

اتمنى الزيارة ويارب تغرقى..................فى الشيكولاتة

الحــ ــزين

شوكولاتة يقول...

Funky girl
العيبين دول اوحش عيب في البشر أنا لما بلاقي حد كده ببعد عنه أوتوماتيك
نورتيني ياقمر وكل سنة وانتي طيبة
أموووووه

شوكولاتة يقول...

الحزين
شرفت المدونة ومفيش رزالة ولا حاجة ياسيدي
بس على فكرة أنا محدش ينافسني في الشوكولاتة
ههههههه
سلام

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته

ما هذا الجو الملبد بالشوكولاته

كل دي شوكولاته ايه ده كله ايه ده كله ايه الشيكولاته دي كلها

بجد مدونة رائعة واجابات اكثر من رائعة بارك الله فيكم ورزقكم الفردوس الاعلى ويكون فيها شوكولاته

شوكولاتة يقول...

أبو صهيب
شكرا جدا ياأبو صهيب على رأيك الغالي في مدونتي المتشكلتة دي
ورزقنا وإياكم الفردوس الأعلى بلا حساب ولا سابقة عذاب
كل سنة وأنت طيب
تحياتي

Asmaa mahaba يقول...

ربنا يسترك يا شوكلاته يا اختى قوليلى انت وصلتى للنقطه دى ازاى
(ثقتي بنفسي واللي وصلتلها بعد سنين من العذاب وعدم الثقة بالنفس وعدم الرضا عن الذات)
عشان مش عارفه اوصلها خالص ولو حاولت اوصلها بتقلب بدبش وظلط وطوله لسان

شوكولاتة يقول...

سومة .. محنونة في بلد عاقل
أولا ياست البنات نورتي المدونة وشرفتيني ويارب ماتكونش دي آحر زيارة
وثانيا أنا وصلت للنفطة دي أولا بفضل الله عز وجل ونصيحة ليكي دايما إدي لنفسك إحساس بالثقة وبعد كده هتلاقي الثقة بقت جزء من شخصيتك وتالت حاجة انا كنت بعملها كتييير هي إني كنت لما بهش ناموسة من قدام وشي كنت بعتذرلها يعني ماتعتذريش غير لما تكوني متأكده إنك فعلا غلطانة وتالت حاجة خليكي دايما مقتنعة انك شخص كويس بالرغم من عيوبك وإن الناس مش شايفينك وحشة زي ماأنتي متخيلة كده وأخر حاجة لازم تعمليها لما تكوني مع ناس بيتكلمو في موضوع انتي عارفاه لازم تشاركي لأن ده هيعود الناس إنها تسمع كلامك وتهتم بوجه نظرك ودي اكتر حاجة هتديكي ثقة في نفسك ويارب اكون قدرت أساعدك
وكل سنة وانتي طيبة ياقمر
سلاااام

Soma يقول...

مبرووووووووووووووووووووووك


انا عارفه انها متاخره قوي
بس برضو مبروك علي المدونه الحلوه دي اللي كلها شوكولاته

ربنا يوفقك يا شيري انا مكنتش اعرف انك موهوبه كده ودمك خفيف كده


انتي شوكولاته وعسل

ديالا يقول...

بجد ياشيكولاته اجاباتك حلوه اوي

وبعدين فعلا انتي حد يستحق يكون صاحبنا كلنا دمك خفيف اويب وشخصيه رائعه ربنا يوفقك

بجد هو ميخو فين ؟ياريت تطمنينا عليه

شوكولاتة يقول...

سومة
الله يبارك فيكي ياقمر ويخليكي ليا ياحبيبتي وكلك ذوق ومستنية بوستاتك الجديدة
كل سنة وأنتي طيبة
أموووووووه

شوكولاتة يقول...

ديالا
الله يخليكي ياسكر انتي وانا اتشرف إني أكون صاحبتك بجد انتي شخصية جميلة قوي
والواد ميخو بخير بس مراته لسه مسافرة فمشغول شوية وإن شاء الله هيرجع قريب قوي
وكل سنة وأنتي طيبة ياقمراية
أمووووووووه

*البت المشمشية *حلوة بس شقية * يقول...

انا بحبك عشان اسمك

شوكولاتة يقول...

البت المشمشية حلوة بس شقية
والله كلك ذوق ياقمر وبمناسبة الشهر الكريم إديني كيلو مشمشية والنبي
مل سنة وأنتي طيبة
نورتي