مرايتي قوليلي يامرايتي

شفتو الصراحة

جالي سؤال من أخواتي وحبايبي ديالا وآيوشة عن أصدق عشر حاجات في حياتي وطبعا لازم أشكرهم لأنهم اعتبروني صديقة من أول مادخلت عالم التدوين بالرغم من إننا عمرنا ماشفنا بعض بس حسيت فيهم الجدعنة
ودي كانت أول مرة حد يسألني سؤال صريح قوي زي ده بس بصراحة وبيني وبينكم حسيت إن أنا محتاجة أجاوب على السؤال ده فعلا لأن دي هاتبقى أول مرة أواجه نفسي بالصراحة دي
يمكن اكون أخرت في الرد على سؤالكم ده لأني ماكنتش عارفة أقول إيه وبتكسف أتكلم عن عيوبي المتلتلة. أنا في حاجات كتير صادقة في حياتي لأني أصلا صادقة جدا وهاأحاول أعصر دماغي واتكلم عن أصدق عشر حاجات في حياتي
أولا: أصدق حاجة في حياتي وجود ربنا ورحمته الواسعة اللي إن شاء الله هاتشملنا بالرغم من كل ذنوبنا. وطبعا عشقي لحبيبي سيدنا محمد صلى الله عليه وسلم. وأكيد الموت والعذاب والجنة والنار
ثانيا: إخلاصي في علاقتي بالناس اللي بحبهم واللي مابحبهمش لأن الناس اللي بحبهم دول كنز مقدرش أخونهم أو أعاملهم بطريقة وحشة والناس اللي مابحبهمش قمة إخلاصي معاهم إني بتجاهلهم علشان ماتعبش وماتعبهمش
ثالثا: عشقي لأهلي لأن اللي مالوش خير في أهله مالوش خير في حد
رابعا: ثقتي بنفسي واللي وصلتلها بعد سنين من العذاب وعدم الثقة بالنفس وعدم الرضا عن الذات
خامسا: إيماني بإن " من يتق الله يجعل له مخرجا ويرزقه من حيث لايحتسب"
سادسا: بحب أكون أنا يعني بحب أعيش على طبيعتي إلى أبعد الحدود وأنسى كلام الناس اللي هدفه الوحيد يكسرني ويفقدني اعتزازي بنفسي
سابعا: عشقى لعملي في الترجمة ويقيني بالله بأنه سيكرمني
ثامنا: بحب اتحدى الدنيا اللي برضو مالهاش لازمة دي وأهزمها شر الهزيمة وأعرفها أنه لن يأتيها أحدا بعدي يهزمها كما كسرتها أنا
تاسعا: حبي وإخلاصي لحياتي اللي جاية يعني أنا بخلص للشخص اللي هارتبط بيه من قبل ماأشوفه وأتمنى يكون زيي كده
عاشرا: بحب قوي الناس المثقفين والناس اللي دماغها عالية قوي في العلالي


وعلشان أكون صريحة هاأقولكم أكترعشر حاجات بكرهها قوي


أولا: عصبيتي هي أوحش حاجة في شخصيتي يعني سعادتك تكون قاعد مع واحدة مجنونة زي حالاتي كده وتلاقيني مرة واحدة اتعصبت ونطيت عليك وعضيتك وامشي واسيبك اتعصبت ليه بقى (والله لما أحمد نظيف يسيبنا في حالنا ماهاتعرف ولا أنا هاعرف) المشكلة إن الجنان ده طال الناس كلها حتى بابا وماما (ربنا يصبرهم عليا)
ثانيا: كرهي الشديد للغلط بيخليني أضايق ناس كتير لأني بكون قاصدة خير بس بيكون شكله وحش قوي في الآخر
ثالثا: بكره العيال الصايصة بتوع النو ويست والحظاظات
رابعا: بالرغم من أني طيبة قوي وبسامح كتيييييير بس لما بكره حد بكرهه أكتر من كراهية المصريين لتصريحات بطرس غالي
خامسا: مش مرنة خالص يعني لامؤاخذة كده دماغي زي القفل المصدي ومابحبش حد يقنعني بأي حاجة غير اللي في دماغي ومابحبش التغيير
سادسا: بكره الناس اللي بيكدبو ويصدقو نفسهم
سابعا: بكره اللف والدوران والناس اللي بتحور وتنقل كلام
ثامنا: بكره كسلي قوي ونفسي أكون زي السحلفة اللي هي أنشط مني بكتيييير
تاسعا: بكره السلبية عموما وسلبية المصريين خصوصا
عاشرا: أحيانا بكون حشرية ورغاية قووويييي وده بيعملي مشاكل كتيير وخاصة لما بتكلم بحسن نية وأتفهم غلط
حادي عشر: ....بكره

آه آه آآآآه خلاص خلاص كفاااية مين اللي رمى الطوبة دي ... آآآآه وكمان طماطم لأ...لأ بيض لأ
خلاص هقعد ساكتة
كانت معكم شوكولاتة من عنبر 7 بالقصر العيني بعد علقة موووت