السبت، 22 أغسطس 2009

أمن يجيب الضطر إذا دعاه ؟؟؟




في ناس كتيرقوي سألوني أنا ليه اخترت شعار أمن يجيب المضطر إذا دعاه وفعلا السؤال ده مهم جدا لأني لما قريت في الموضوع ده حسيت إن فيه علاقة غريبة قوي بين الدعاء ورمضان علشان كده قررت أني أهتم بالدعاء جدا السنة دي.
عارفين ربنا بيقول إيه عن الدعاء قال تعالى : " وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُواْ لِي وَلْيُؤْمِنُواْ بِي لَعَلَّهُمْ يَرْشُدُونَ " صدق الله العظيم
الحاجة اللي خليتني أفكر وأهتم بموضوع الدعاء قوي في رمضان هي مكان الآية دي بالظبط في القرآن الآية دي في سورة البقرة ورقمها186 لو بصينا للآية رقم185 هنلاقي ايه قال تعالى : " شَهْرُ رَمَضَانَ الَّذِيَ أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَى وَالْفُرْقَانِ فَمَن شَهِدَ مِنكُمُ الشَّهْرَ فَلْيَصُمْهُ وَمَن كَانَ مَرِيضًا أَوْ عَلَى سَفَرٍ فَعِدَّةٌ مِّنْ أَيَّامٍ أُخَرَ يُرِيدُ اللَّهُ بِكُمُ الْيُسْرَ وَلاَ يُرِيدُ بِكُمُ الْعُسْرَ وَلِتُكْمِلُواْ الْعِدَّةَ وَلِتُكَبِّرُواْ اللَّهَ عَلَى مَا هَدَاكُمْ وَلَعَلَّكُمْ تَشْكُرُونَ " صدق الله العظيم
ودي الآية اللي ربنا فرض فيها الصيام علينا طيب عارفين ايه هي الآية رقم187 في سورة البقرة برضو قال تعالى : " أُحِلَّ لَكُمْ لَيْلَةَ الصِّيَامِ الرَّفَثُ إِلَى نِسَائِكُمْ هُنَّ لِبَاسٌ لَّكُمْ وَأَنتُمْ لِبَاسٌ لَّهُنَّ عَلِمَ اللَّهُ أَنَّكُمْ كُنتُمْ تَخْتَانُونَ أَنفُسَكُمْ فَتَابَ عَلَيْكُمْ وَعَفَا عَنكُمْ فَالآنَ بَاشِرُوهُنَّ وَابْتَغُواْ مَا كَتَبَ اللَّهُ لَكُمْ وَكُلُواْ وَاشْرَبُواْ حَتَّى يَتَبَيَّنَ لَكُمُ الْخَيْطُ الأَبْيَضُ مِنَ الْخَيْطِ الأَسْوَدِ مِنَ الْفَجْرِ ثُمَّ أَتِمُّواْ الصِّيَامَ إِلَى اللَّيْلِ وَلاَ تُبَاشِرُوهُنَّ وَأَنتُمْ عَاكِفُونَ فِي الْمَسَاجِدِ تِلْكَ حُدُودُ اللَّهِ فَلاَ تَقْرَبُوهَا كَذَلِكَ يُبَيِّنُ اللَّهُ آيَاتِهِ لِلنَّاسِ لَعَلَّهُمْ يَتَّقُون" صدق الله العظيم
َو في الآية دي ربنا بينظم لنا الصيام وقيمته أنا لما قريت التلات آيات دول حسيت إنهم رسالة مهمة جدا من ربنا بيقولنا فيها إنكم مهما تعملو في رمضان مش هتفوزو بالجنة إلا بالدعاء وإستجابتي لدعواتكم وكفاية أن الله يستحي أن يرد يد سائل في رمضان
وفي كمان قصة سمعتها في غاية الروعة عن قيمة الدعاء وحوجتنا اليه القصة دي عن صحابي وعالم حديث اسمه سفيان الثوري العالم ده كان بيصلي وحس انه مش بيصلي بقلبه فضايق قوي وخرج بعدها يتمشى في المدينة ولقي طفل أمه طردته من البيت علشان عمل حاجة غلط فالطفل قعد يبكي ويصرخ ويقول لأمه افتحيلي الباب أنا ماليش حته أروحها غير البيت وحضنك وبعدها حن قلب أمه وفتحتله الباب وفي اللحظة دي حس سفيان إن دي رسالة من ربنا إن زي ما الطفل ده مالوش غير أمه هوه كمان مالهوش غير ربه وأكيد ربنا أحن عليه من رحمة الأم بطفلها

ولو عايزين تعرفوأكتر عن أكثر الأدعي المستحبة ادخلو على اللينك ده
http://majdah.maktoob.com/vb/majdah32322/

أنا لسه مستنية بوستاتكم وشكرا لكل الناس اللي سألو عليا وأنا مسافرة واعذروني لأني المفروض كنت أنشر البوست امبارح بس للأسف أنا جيت متأخر قوي وكنت مرهقة شوية واعذروني أني ماتكلمتش عن هدفي باستفاضة علشان أنا حسيت إني لازم أوضح أهمية الدعاء قبل أي حاجة ولإن في ناس كتير مابيهتموش بالدعاء قوي قد اهتمامهم بالصيام والصلاة وصلة الرحم وربنا يتقبل منا جميعا صيامنا وقيامنا وسجودنا وركوعنا ودعاءنا وسائر أعمالنا وجعلها خالصة لوجهه الكريم

هناك 34 تعليقًا:

Pink Dreams يقول...

ازيك يا شوكولاته

البوست جميل

جزاكى الله كل خير

انا عملت البوست دا وكتبت اهدافى فى رمضان

اتمنى انك تنورينى

كل سنه وانتى طيبه

رمضان كريم

تحياتى

رنونة حكومة ميخو يقول...

شيكولاتتييييييييييييييي

وحشتيني بجد قوي
حمدا لله ع السلامة
يارب يكون مصيف حلو وتفتكريه طول عمرك باحلى الذكريات يا حبي

موضوعك فى الجون
الواحد لو ماداعاش فى رمضان يبقى فاته نص عمره
فيه من الصحابة كانوا بيكتبوا 30 دعوة قبل رمضان بحيث كل يوم فى رمضان يركزوا فى دعوة واحدة كل يوم فى رمضان من اول صلاة الفجر لحد فجر اليوةم التاني يعنى اثناء الصيام و قبل الفطار وفى التراويح والتهجد
على اساس ان ربنا بيحب قوى الالحاح فى الدعاء
كمان انا بحب الاية ديه جدا والله يا شوكولاتة بترقق قلبي قوي هيه فى سورة النمل تقريبا (( أمن يجيب المضطر اذا دعاه و يكشف السوء ويجعلكم خلفاء الارض أءله مع الله قليلا ما تذكرون))
بحب كمان عتاب ربنا الاخير ده لينا لما يقول فيه اله معاه يعنى بعد كل ده وقليل قوى لما بتفتكروني
جميلة قوى الايه ديه
معلش انا طولت عليكي بس انتى بجد غيرتي حالتى 180 درجة دلوقتي مجرد انك فكرتيني بالايه ديه
ربنا يكتبلك ثواب كل حاجة هعملها فى رمضان ان شاء الله وربنا يرزقنى انا باللى اخد ثوابه برده من غير ما ينقص من اجره حاجة
بحبك يا شيكولاتي قوي

رنونة حكومة ميخو يقول...

اه عايزة اقول حاجة كمان ان زى ما سفيان الثورى ده فعلا بيقول ان الواحد يحس ان مالوش غير ربنا
ده فعلا بيفرق جدا فى دعائنا لما نحس ان ربنا هوه بس اللى ليكي وانه عارفك (( الا يعلم من خلق وهو اللطيف الخبير)) تحس ان ربنا بيطبطب عليكى كده و يقولك هوه انا مش عارفك ده انا اللى خالقك وادرى بيك منك... حتى
لما تستجمعى كل الاحاسيس ديه وانتى بتدعى هتحسي بلذة التذلل لربنا قوي وتحسي بخضوع كامل كده وانتى ساجدة فى الارض و بتطلبي من ربنا وانتى فى قمة الذل و الخشوع ... احساس رائع بجد لا يوصف .. ورمضان فرصة فعلا نحس بكل الاحاسيس ديه و ندى فرصة لقلبنا يشوف نور ربنا بقى و يرق كده بعد القسوة اللى عيشناه فيها ديه
.....
مع ان ده اول رمضان اقضيه مع جوزي حبيبي ومختلف طبعا عن اى رمضان تانى كانت ماما بتعمل الاكل فيه :) بقى فيه حد دلوقتي مستني الاكل منى انا
ربنا يستر بقى ....
معلش بقى رغيت قوي بس اصلك بجد رجعتيني لايام زمان و ظبطي مودي على رمضان
تسلميلي
وكل سنة وانتى طيبة

Me7'o يقول...

شوكولاتة

والله برافو عليكى
الموضوع ده فى الجون وأنا أول مرة آخد لبالى من تسلسل الآيات ده

حقيقى برافو عليكى
وأنا هادعى كتير قوى فى رمضان ده وهادعيلك إنتى كمان
وإنتى عارفة أنا هادعى بإيه بالظبط
(وش بيطلع لسانه)
ههههههههههه

تحياتى يا قمر
وكل سنة وإنتى طيبة وحمد لله على السلامة ورمضان كريم ووحشتينى و و و و ....

Me7'o يقول...

Rannona

لما نشوف أكلك ولا أكل حماتى

هههههههههه
تحياتى

سمسم/سما يقول...

السلام عليكم
كل سنة وانتي طيبه
وربنا يجعلنا ممن يغفر له
ويعتق من النار
ويعيده علينا بالخير
اللهم اميــــــــن

غير معرف يقول...

اكيد الدعاء من اهم العبادات ..... وربنا بيحب اننا نسأله

حمد الله ع السلامه ..... وجازاك الله خيرا

النسر المهاجر يقول...

البوست رائع وجميل
بارك الله فيك

ورمضان كريم

شوكولاتة يقول...

Pink Dreams
أنا الحمد لله كويسة جدا يابينكي ياعسل وبجد إنتي وحشتيني قوي قوي وشكرا جدا على ذوقك وأنا دخلت فعلا على البلوج بتاعك وقريت البوست الجميل ده
منوراني دايما

شوكولاتة يقول...

Rannona
وحشتيني موت والله ياحبي ويارب تكوني مبسوطة أنتي والواد ميخو حبيبي العسل ده وكل سنة وأنتو طيبين ويارب يارنونتي تحققي كل اللي نفسك فيه وتعيشي في سعادة وحب على طول
أموووووووووووه

شوكولاتة يقول...

Me7'o
ميخو حبيب هارتي السكرة وحشتيني خالص ياحبيبي ورمضان ولايسوى من غيرك ومن غير كلامك الحلو ودمك الخفيف وطبعا لو لفيت الدنيا كلها مش هتلاقي أحلى من أكلي مش تقولي أكل رنونا

مي يقول...

يا احلى شيكولالالالاتة
ايه يابنتى الغيبة الطويلة دى ؟ حرام عليكى جالى فقر دم شيكولالالالاتى
كده تروحى المصيف وتسيبينى
عاااااااااااا
كل سنة وانتى طيبة يا حبيبى وحشتينىىىى اوىىىىىىىىىى
جزاكى الله كل خير يا قمر ورمضان كريم
امووووووووووووه بالشيكولاتة

شوكولاتة يقول...

سمسم / سما
وأنتي طيبة ياقمر وربنا يعيد عليكي الأيام بخير ويسعدك ويتقبل منك رمضان
نورتيني وخطوة عزيزة

شوكولاتة يقول...

فتاة من الصعيد
وأنتي طيبة ياجميل ولو أني زعلانة منك قوي ومش قادرة أصدق أني مش هاقرالك بوستات تانية بس لو فعلا مش هاترجعي تاني للتدوين ياريت ماتغيبيش بتعليقاتك الجميلة عن مدونتي
منوراني دايما

شوكولاتة يقول...

المهاجر
كل سنة وأنت طيب ونورتني في أول زيارة لمدونتي المتواضعة وياريت تشرفني دايما
تحياتي

شوكولاتة يقول...

مي
وحشتينييييييييييييييييي قويييييييي
ياقمر عاملة إيه؟ ده أنا كنت هاتجنن عليكي وأنا مسافرة ؟ ووحشتني بوستاتك اللي تجنن وشكرا على سؤالك عني وانا مسافرة وكل سنة وأنتي طيبة ويارب السنة الجاية تبقي في بيت عدلك ياأوختي
بحبك ياميوية
أمووووووووووووووووه

ديالا يقول...

حمد الله علي السلامه

وكل سنه وانتي طيبه وبالف خير

وفعلا الايات دي اول مابسمعها بحس انها بتلمسني اوي وبحس فعلا ان ربنا بيكلمني

وبيقولي ادعيني وانا هجيب دعوتك

ربنا فعلا احن علي الواحد من امه
رمضان كريم

hasona يقول...

السلام عليكم

في البداية حمد لله علي السلامة

،،،
حضرتك اختارت الدعاء وخصصتي دعاء المضطر
وهو يختلف عن دعاء شهر رمضان

هو الدعاء من ضمن منظومة الروحانيات التي تنبعث في رمضان
والاحساس بأن دعائك مستجاب باذن الله في رمضان

،،،،
والقصة حضرتك اختصرتيها جدا

لأني قرأتها أطول من اللي حضرتك وضحتيه هنا

أن الطفل في بداية الأمر ذهب وجال في المدينة ولم يجد مؤي غير بيته وفي حضن حبيبته امه

فعاد مسرعا الي البيت وقد نشر الليل ستائره
ومن هنا طرق البا وجعل يتحدث الي امه ويندم علي الخطأ ويقول لها ليس لي سواك ولا ليس لي مكان غير هذا البيت

فلما تعب نام يبكي علي عتبة البيت

ومن هنا تأتي فائدة القصة وهي أن لابد لكل انسان أن يطرق باب ربه وان لم يفتح طرق مرة أخري وبقي وتاب وأناب الي ربه لأن الله هو رب كريم رحيم وهو الوحيد القادر علي انقاذه مما هو فيه


ربنا يتقبل منا صالح الاعمال
ويقوينا علي فعل لاخير
والعمل بسنة الحبيب المصطفي رضي الله عنه وعنا

شوكولاتة يقول...

ديالا
الله يسلمك يادودي وأنتي وحشتيني أكتر والله ياقمر وجميل قوي إحساسك بالقرآن ده ربنا يعينك على الصيام والقيام ويهديكي لصالح الأعمال
أمووووووووووه

شوكولاتة يقول...

hasona
شكرا على تعليقك وكل سنة وأنت طيب

لا تـــشـــتــــاق يقول...

عزيزتى شوكولاته
جميل اوى البوست
الدعاء حاجه جميله جدا هو مخ العباده
وفيه حديث بيقول ولايرد القدر الا الدعاء
نفعنا والله بكم واياكم
كل سنه وحضرتك طيبه
ونورتى المداونه بجد

ليس فقيرا من يحب يقول...

السلام عليكم

ربنا يجازيكى خير يارب على

كلماتك ويجعلها فى ميزان حسناتك

يارب ويعتق رقابنا من النار

كل سنه وانتى طيبه يارب

فى حفظ الله

شوكولاتة يقول...

لاتشتاق

وحضرتك طيب يا أستاذ أحمد وشرفتني في مدونتي المتواضعة
وعندك حق فعلا في كلماتك الرائعة عن الدعاء والقدر فالدعاء والقدر يتعاركان حتى يوم القيامة

رمضان كريم

شوكولاتة يقول...

ليس فقيرا من يحب

وأنتي طيبة يارانيا ونورتي المدونة اللي على قد حالها دي وطبعا دايما متواصلين

سلام ياقمر

غير معرف يقول...

انا جيييييييت و جايبالك معايا علبة شيكولا كوفرتينا
يالا رمضان كريم و بلاش تاكلي كتير
باي

غير معرف يقول...

رمضان كريم عليكى

شوكولاتة يقول...

Sally
لولولووليييييي جاية وجايبالي علبة كوفرتينا يافرحة قلبي بيكم أنتو الاتنين أنا قلبي مش قادر يستحمل سالي ومعاها شوكولاتة في مدونتي

نورتيني ياسالي ويارب دايما منوراني كده

شوكولاتة يقول...

بنوتة مصرية

الله أكرم ونورتيني والله يا آنوش ويارب نفضل دايما متواصلين

شكرا للزيارة الكريمة

لبنــــــــــى يقول...

حمد الله على السلامة يا حلو
و تقبل الله منا و منك الصيامو والدعا
( بس مش تدعي علي :(...)
انا مرة سمعت انو الدعاء بغير القدر و انو منجي من المصائب
يا رب تقبل صالح الدعاء منا

تحية

شوكولاتة يقول...

Jafra
الله يسلمك ياجفرة وأنا مقدرش ياعمري
أدعي عليكي أنا بس أدعيلك بكل خير
وعندك حق فعلا في كلامنك لأن في حديث صحيح عن الرسول بيقول أن الدعاء والقدر يتعاركان حتى يوم القيامة

منوراني دايما

micheal يقول...

كل سنة وأنتي طيبة

شوكولاتة يقول...

micheal
وأنت طيب يا مايكليتو
تسلم

blue-wave يقول...

فعلا
وكأن ربنا حطها وسط ايات الصيام علشان يوصلنا الرساله دى
جزاكى الله كل الخير

bumedian يقول...

السلام عليكم ورحمة الله وبركاته

نعم الشعار و نعم الرجاء ...

اهنئك .. على الاختيار ..

جمعنا الله و اياكم في جناته على سرر متقابلين ...


مبارك رمضانكم بارك الله لكم وفيكم

واعانكم على الدعاء ...

اعجبني دعاء للشيخ الشعراوي رحمه الله

الحمد لله الذي رحمنا بان لم يستجب لسوء دعائنا ... فان الانسان يدعو بالسوء دعائه بالخير ...

احمد لله على انه هو الله


خالص تحياتي