السبت، 13 مارس 2010

حسبنا الله ونعم الوكيل


بعد غياب طويل عن المدونة رجعت تاني لأن النهاردة حصلي موقف استفزني جدا جدا النهاردة لقيت مجموعة من الطلبة بيقولولي شفتي اللي حاصل على الفيس بوك؟؟؟ عرفت بعدها إن فيه واحد مجنون عامل جروب على الفيس بوك ومسمي نفسه الله وبيدعي فيها الألوهية مصدقتش الموضوع قوي بس اللي صدمني اني لقيت الطلبة دول مشتركين في الجروب ده وتفسيرهم كان عبيط بإنهم بيشتموا في الراجل ده وعاوزين يعرفوا دماغه فيها إيه ومتابعين تحركاته।




النهاردة الصبح كان عدد المشتركين في الجروب الشيطاني ده حوالي ९००० دلوقتي لقيتهم १६००० والعدد عمال يزيد بجنون دورنا ياجماعة اننا منساعدش في ان الجروب دي تنتشر وياريت محدش ينشر اللينك بتاعها ولا يروح يشتم المخلوق ده لأنه مايستحقش والله ومحدش يديله أكبر من حقه وهو أصلا حقه مايجيش "تفة لامؤاخذة" وياريت كلنا نحذر منه لأنه جزء من مخطط كبير عن الماسونية الصهيونية وهنلاقي ناس كتير هتطلع تعمل جروبات تاني زي كده ومن وقاحته عمل جروب تاني بيسخر فيه من النبي وبيدعي ان سيدنا محمد عليه أفضل الصلاة والسلام نبيه وهو اللي أرسله।



لا إله إلا الله محمد رسول الله اللهم إني وجميع من يقرأون رسالتي نشهدك وحملة عرشك وملائكتك وجميع خلقك بأنه لا إله إنت وحدك لاشريك لك وأن محمدا عبدك ورسولك

اللهم أنصر الإسلام والمسلمين اللهم أخرس ألسنتهم قبل أن يتفوهوا بهذه التفاهات اللهم شل أيديهم قبل أن يتعدوا على ذاتك الإلهية بها اللهم لاتؤاخذنا بما فعل السفهاء منا وأرنا فيهم انتقامك

طلب خاص ياجماعة لازم نعرف الناس كلها بالمصيبة دي ونساعد الناس اللي انجرفت ورا المخلوق ده انهم يرجعوا تاني والجروب ده لازم يتقفل لأنه بيتعدى على الذات الإلهية يعني الموضوع يهم كل إنسان عاقل ميهمش مسلم أو مسيحي بس موحد ولو الجروب ده متقفلش إحنا هنعلن إضراب مفتوح عن الفيس بوك من يوم الخميس الجاي إن شاء الله


حسبنا الله ونعم الوكيل

حسبنا الله ونعم الوكيل

حسبنا الله ونعم الوكيل




وعلى فكرة يوم المقاطعة هيبقى يوم الثلاثاء الجاي


هناك 15 تعليقًا:

شوكولاتة يقول...

أنا كتبت البوست ده من ساعة كان عدد الفانز 16000 بعدها بساعة وصلوا 20000 والعدد بيزيد ياجماعة دي كاااااااااااارثة

صمت المشاعر يقول...

لا حول ولا قوة الا بالله

مش هقدر اقول اكتر من كدا فعلا

رنونة حكومة ميخو يقول...

ايه ده انتى عرفتي انا لسه اخويا قايلي حااااااااااااالا مكنتش مصدقة والله ان فيه حد يجرؤ يعمل كده و المصيبة كمان ان الناس عشان تكتب تعليق لازم تدوس على ( كن معجبا ) يا جماعة مانتوا ممكن تدوسوا على ابلغ عن هذه الصفحة ( تعملوا ريبورت يعني ) وتبلغوا عنها لو العدد ده كله بلغ عنها كان زمانها اتشالت وكمان لو عايزين نكتب حاجة من reviews
برافو يا شروق انك نبهتي الناس والله ده انا دمي اتحرق من الملعون ده الهي يتشوي فى نار جهنم يارب

Lady E يقول...

لا حول ولا قوة الا بالله

انا حسيت بذهول لما قرأت الخبر عندك

العدد بيزيد ليه بالسرعة دي !!!!!!!!

غير معرف يقول...

يابنتي ده واحد مجنون واللي بيتابعوه حب استطلاع موش اكتر

ربنا يرحمنا زمن فتن بقا

تحياتي

هناء محمود يقول...

أهو ده بقى إللى هم يضحك

طب كان يدعى حاجة تانية طيب ممكن تعمل جدل أو لخبطة

أنا مش عارفة إنتى خايفة من إيه
ده واحد عبيط ومحدش هيصدقه إللى هيصدقه يبقى أعبط منه

فيس بوك هههههههه الموضوة يعنى دلوقتى إن رسالات ربنا توصلنا من الفيس بوك

استغفر الله العظيم

ربنا ينجينا يارب .. بجد بجد بجد

ربنا غفور رحيم صبور على عباده

لا إله إلا الله

MOHAMMED ELBANNA يقول...

شيكولاته
الموضوع بالرغم من انه فعلاً مستفز الا انه لم يصيبني بالذهول .
فالمجانين كثيرين هذه الايام والمعتوهين منتشرين في كل مكان .
والفيس بوك مليئ بأمثال هؤلاء الملحدين والكافرين والمدعين و.....
تقبلي مروري
محمد البنا

sony2000 يقول...

المشكله فحاجه محدش واخد باله منها
المفروض اننانعمل بلاغ او ريبوت للموقع دا
فبدل مايحصل بلاغ بينضمو بطريق الخطأ
فقولو للناس اذاي يعموا بلاغ بالطريقه الصح

*البت المشمشية *حلوة بس شقية * يقول...

شيكولاتة انا هاخد بوستك كوبى عندى
لانى بجد مش قادرة اكتب اى حاجة

شاب فقرى يقول...

انا جاى من طرف المشمشية
وهكتب نفس التعليق اللى كتبته هناك :)
وإن شاء الله هتابع المدونة هنا

بصى يا مشمشية
انا عندى مبدأ
المبدأ دا ربنا قاله للنبى عليه الصلاة والسلام
إنا كفيناك المستهزئين

مهما الناس دى قالت عن ربنا وعن النبى عليه الصلاة والسلام
فهما جهلة ومتخلفين
لا مكانة الرسول عليه الصلاة والسلام هتقل
ولا ربنا هيتضر فى حاجة
ربنا قادر يخسف بيه الأرض
وفى نفس الوقت
اللى بيسمع شتيمة عالاسلام النهارده
هيحاول بكره يفسر لنفسه ليه هوا بيشتم الاسلام وهيبطل اللى بيعمله
او هيستمر وساعتها هيبقى هوا الخسران
ومش تنسى
إنك لا تهدى من أحببت ولكن الله يهدى من يشاء
يعنى لو جرينا وراهم وطلعنا لهم فى الحلم مش هيهتدوا غير لو ربنا أراد لهم الهداية
الهداية نعمة

وبالنسبة للناس المسلمين اللى بيشتركوا فى الجروبات دى
ناس بتحاول تدور على اى حاجة تشغل بيها نفسها وتحرق بيها دمها عشان مش لاقيه حرقة دم كفاية فى حياتها
فبتدور على حد يربى لهم الخفيف
لكن لا شتيمتك للشخص دا هتوقفه
ولا دخولك الجروب هيوقفه برده
ومتنسيش
الهداية نعمة
خالص التحية
شاب فقرى

كيكى عوووووو يقول...

انا لقية ان الخبر عادى
انا واحد اهطل او عنده تخلف يدعى بجد
بس الى هتجنن موضوع انك بتقولى ان الزائرين عددهم بيزيد اكتر
ربنا يشفى والله

micheal يقول...

أنا لا حعمل إضراب ولا حاجة ولا يفرق معايا الموضوع..مجرد صفحة مش مقتنع بالمادة اللي فيها فحتجاهلها..شفتي بسيطة إزاي
:)
تحياتي

موناليزا يقول...

متفقة معاكِ جدا فى عدم نشر اى موقع او جروب مسئ للاسلام

sony2000 يقول...

خلاص والحمد لله
الهاكر قامو بالواجب
قفلو الموقع

طهر فؤادك يقول...

السلام عليكم ورحمة الله وبركاتة

بارك الله فيكى

ولا الة الا الله وان محمد رسول الله