الأربعاء، 14 سبتمبر 2011


النهاردة قضيت يوم جميل اوي مع زمايلي في الشغل كان عندنا تدريب حلو في احد فروع المؤسسة اللي بشتغل فيها بالرغم من اني تعبت واليوم كان مجهد جدا والسفر متعب اكيد والباص كان مقرف جداااا. ياللا المهم اني اتبسطت :)).

بتعجبني اوي المؤسسات اللي بتحب دايما تقوي أفراد المؤسسة دي وترفع مستواهم وخاصة اذا كانت المؤسسة دي مؤسسة خدمية. اللي عجبني اكتر النهاردة ان احنا شغالين كويس اوي في مشروع ضمان الجودة والاعتماد والنهاردة بس فهمت يعني ايه جودة واعتماد. واتبسطت اوي ان مؤسستي هتكون الاولى من نوعها اللي هتاخد شهادة الجودة. الأجمل لما تبقى مؤسسة كاملة فيها حوالي عشر مؤسسات أصغر ليها رؤية واحدة ومش رؤية شخصية لأصحاب المؤسسة لأ رؤية وطنية شوية يمكن كنت بعترض لفترة على بعض السياسات الادارية في مؤسستي وجايز اكون مبسوطة والسكينة سارقاني من كلام النهاردة، الحقيقة مش عارفة بالظبط بس احدد احساسي اللي اعرفة كويس اوي اني حاسة فعلا اني جزء من المكان ده وحاسة أكتر ان لو تم تنفيذ المشروع باتقان حقيقي هحس اني حققت حاجة كبيرة اوي في حياتي واكيد هتبقى نقلة كبيرة جدا في حياتي.

لكن النهاردة انا حطيت ايدي على مشكلة كبيرة جدا في مجتمعنا وللأسف ليها تأثير مباشر على كل حاجة في حياتنا وهو النظام. حد ممكن يقولي ان احنا بينقصنا النظام بالعكس انا شايفة انا احنا عندنا انظمة كتير ويمكن من كترها مبقاش حد بيحترمها.
العيب مش في عدم وجود نظام العيب في عدم الايمان بالنظام من الكلام اللي اتقال النهاردة عرفت ان مؤسستي مخطط ليها بشكل كويس جدا لكن للأسف في "استهياف للنظام" مش من الافراد بس لكن من أصحاب المؤسسة نفسهم. يعني ايه يبقى معادك في التدريب الساعة ೯ واللي بيحاضرلك يبقى رئيس مجلس ادارة المؤسسة كاملة وانت تيجي الساعة ೧೧ وعاوز تدخل. وطبعا الموضوع ده انتقد بشكل كبير جدا والمفاجئ ان بعد البريك الاول الناس بردو دخلت متأخرة عن الجلسة بحوالي تلت ساعة.!!!!!


للأسف لازم كل واحد يبدأ من جواه ويعرف ان النظام لمصلحته مش ضده وان احترامه وتصديقه للنظام معناه احترامه لذاته. اتمنى تكون رسالتي وصلت بوضوح.


خبر فرحني اوي النهاردة:
المستشار أحمد رفعت اتهم المخلوع بالتمارض واهانة المحكمة بتوجيه حذائه في اتجاه هيئة المحكمة وأمره بأنه يحضر المحاكمات على كرسي متحرك :))




هناك 3 تعليقات:

sony2000 يقول...

ربنا معاكي يارب
وكل حاجه تكون ليكي كويسه ياشوكلاتا

نيللي علي يقول...

سعيده انى دخلت مدونه على اسمى اكتر حاجه بحبها فى الوجود ياشيكولاته وخاصه كيت كات ..

اما بالنسبه للنظام .لو كل انسان بقى منظم هتتغير حاجات كتير اوووووى فى حياتنا منها مش هيبقى فى مشكله مرور وله تلاقى واحد فجاه كسر عليكى ولو فى نظام المصالح الحكوميه هتبقى عال عال.
ولو فى نظام كانت هتبقى حياتنا احنا نفسنا حلوه ..بدايه من تنظيم وقتنا الى تنظيم تصرفتنا

مدونتك رائعه
والبوست اروع

نيللى

ميشو فيشو يقول...

عندك حق ي شوكلاتاية