الاثنين، 11 يناير 2010

عيد ميلاد شيكو




كل سنة وأنتو طيبين ..... لأ شوكولاتة ما اتجننتش ولاحاجة ومش بقولكم كل سنة وانتو طيبين بمناسبة السنة الجديدة لأ لأني لازم أهنيكم لأن زي النهاردة من اتنين وعشرين سنة أنا جيت ونورت الدنيا





ليلتها ميخو سنيور أخد أم شوكولاتة وميخو جونيور وكوكو وأحمودي ونزل ع البحر يصطاد وضرب السنارة في البحر وقال لو بلطية تبقى بنت ولو قرموطة يبقى ولد والسنارة طلعت بلطية نص كيلو وليلتها على الساعة ستة ونص الصبح جات شوكولاتة والشمس بتطلع وكان يوم بقى


أحكيلكم بقى على رد أفعال المواطنين واحدة صاحبة ماما بتسأل أحمودي أخويا بتقوله ماما فين قالها راحت تجيب شوكولاتة من عند لوكاس (وده كان سوبر ماركت جنب البيت عندنا) على أساس إني ربع جبنة رومي قديمة




بعدها بسنة الواد ميخو جونيور شايلني وفي البلكونة وجه أحمودي ضربه شلوت من الكتاب قوم الواد ميخو بقى يعمل إيه؟ يسيب حقه لأ طبعا لأ وألف لاااااا رماني من البلكونة في الشارع وطلع يجري ياخد تاره ومن ساعتها ........






وأنا صغيرة بقى كنت واخدة جايزة نجيب محفوظ في الفشر والتأليف روحت يوم من ذات الأيام وأقول لميخو سنيور إن المدرسة مفيهاش شبابيك ومغطيين مكان الشبابيك بستاير قوم ميخو يروح المدرسة وياشر اشتر ومسك في خناقهم وياعيني كان شكله وحش قوي لما طلع وشاف الشبابيك بنفسه بس بعد ما روق مدير المدرسة .... نيهاهااااااااااااااااا


كان عندي خمس سنين وكنت بلعب كاراتيه وراجعة انا وأحمودي من طابونة العيش وشايلة القفص فوق دماغي وصاحبي الأنتيم (اسمه صدام) ضرب أحمودي فأخويا صوعب عليا مسكته القفص وأخدت صدام تروبكيك وإديته علقة ربنا مايوريكم



بس السنة اللي فاتت دي كانت جميلة قوي قوي أجمل حاجة فيها اني عملت المدونة دي وعرفتكم يا أجدع ناس وأرق أصحاب وكمان سيبت شغلي القديم واشتغلت في مجال أحسن بكتيير


بس أوحش حاجة أن ميخو حبيبي سافر السعودية وواحشني قوي قوي وربنا يرجعه ليا بالسلامة هو ومراته حبيبتي


أقولكوا توب سيكريت بقى بس محدش يسيح أنا وميخو توأم عيد ميلاده معايا بس هو أكبر مني بتسع سنين بس ... نيهاهااااااااااااا


كل سنة وأنت طيب ياميخو كل سنة وانتي طيبة ياشيكو كل سنة وانتو طيبين يامدونين أجمل عيد ميلاد هاحتفل بيه وانا معاكم

هناك 22 تعليقًا:

موناليزا يقول...

سنة حلوة يا جميل
سنة حلوة يا جميل
كل سنة وانتِ طيبة يا شيكو وعقبال 110 سنة وأنتِ فى صحة وسعادة وهنا
هديتك نخلة فى الجنة هتلاقيها هناك لما تقولى
"سبحان الله وبحمده"

Unknown يقول...

ربنا يسعدك يارب و يكرمك و تفرحى دايماً
و عيد ميلاد جميل سعيد مشرق مبتسم عبد السلام عباس العقاد مدينة نصر التحرير عتبة عتبة
عليكى و انتى بصحة و خير و سعادة و فرح و سرور و جمال و علاء و عز و رشيد
:-)

غير معرف يقول...

ولما ميخو رماكي سكتيله عادي كده ؟... انا جايه اهدي النفوس :)

كل سنه وانتي طيبه يا جميل وعقبال 999999 سنه

حاذي باذي يويو :)

وحشاني بجد :(

تحياتي

MOHAMMED ELBANNA يقول...

كل سنه وانتى طيبه
ربنا يحقق لك كل احلامك
محمد البنا
طريق النجاح

لجين أبو الدهب يقول...

كل سنة واانتى لله قريبة
وعن النار بعيدة

يارب كل اللى جاى يبقى احلى واجمل عليكى

كل سنةوانتى طيبة ..

ليس فقيرا من يحب يقول...

يلا حالا حالا بالا

حيو ابو الفصاد

هيكون عيد ميلاده الليله اسعد الاعياد

فليحيا ابو الفصاد

هيييييييييييييييييييييييييييييييه

ليس فقيرا من يحب يقول...

كل سنه وانتى طيبه وبالف خير يارب

يا شوكلاتى

عقبال 85 سنه كفايه عليكى كده

ربنا يسعدك يااااااااااااااااااارب

والسنه دى تحققى كل احلامك

وحشااااااااااااااااااااااااانى جدا

ليس فقيرا من يحب يقول...

كل سنه وانت طيب يا ميخو

وبرده عقبال 85 سنه

بت يا شوكلاته متخليش حد يمد ايده على التورتات دى لاحسن اشرحه
انا اللى هاكل الحجات دى لوحدى مليش دعوة

ليس فقيرا من يحب يقول...

(دبدووووووووب)

دى هديتك خديها من بين القوسين

هههههههههههههههههههههههه

امووووووووووووووووواه

ليس فقيرا من يحب يقول...

يلا اقعدى بالعافيه يا قمر

فى حفظ الله

حـــــروف متــبعترة " عــمرو الشــايب يقول...

كل سنة و انت طيبة
و يارب السنين الى جاية احسن بكتير من الى عدت
و شكلك طول عمرك مولفة من الطراز الاول و الاخير زي ما بيقولوا ف المفسديون
و شكلك بتحبي تاكلي فشار كتير
و ربنايزيد سعادة يارب
ارق تحياتي مع باقة ورد و نص كيلو جبنة رومي بس ولا جديدة ولا قديمة عشان بحبها ههههههههههههههه

طوبه فضه وطوبه دهب يقول...

ياصباح البونبونى والشيكولاته والكريم شانتيه ايه دا كله ايه دا كله كل دى شيكولاته الحس ولا اكل انا مدمنه يابنتى شيكولاته من يومى كل سنه وانتى بالف خير وصحه وسعاده ياقمر واحسن حال يارب مع انك كنتى شرسه وانتى صغيره بس عسل ربنا يكرمك والسنه اللى جايه تحققى كل ما تتمنى

بسمة انور يقول...

كووووووووووووووووووووول سنة واحلى شيككو بكل خخير
اموووووووووواااااااه

Lady E يقول...

happy birthday to u

والله وحشاني وبجد دايما على بالي بس انا مكنتش بزور مدونات كتير الفترة اللي فاتت

ربنا يبارك في عمرك يا حبيبتي وان شاء الله السنة دي تبقى سنة جميله

ستيتة يقول...

اه يا حبيبتي يا شيكولاتاية

عيد ميلادك تنزليه ومش يظهر عندي
يادي الفضيحة ام جلاجل

كل سنة وانت طيبة وميخو جونيور كمان
يعني انتم جدي بقى زي سوتيتة
والنعم والنعم "زي الخليجين ما بيقولوا :)

ولما رماكي من البلكونة حصل لك ايه؟
يعني انت بعد 3 صبيان
موسكينة طبعا
وطلعتي جبنة رومي كمان :)

بحبك
ربنا يهني قلبكم يارب ويجمعكم ما يفرقكم كلكم ....... يا بلطية

mony يقول...

كل سنه وانت طيبه ياشيكو واخوكى التوأم اللى اكبر منك بتسع سنين طيب

أُكتب بالرصاص يقول...

كل عام وانت بخير

Soma يقول...

كل سنه وانتي طيبه يا شيكولاته

كل سنه وانتي مبسوطه وبخير

وحشتيني قوييييي

(حلـم) يقول...

كل سنة وانتي طيبة


كل وانتي بالف خير


ودائماااا

افضل


اجمل

ابهي

عزيزة علي قلوب كل البشر


اول مرور لدنيا الشوكولاتا

انا حلم

-_- يقول...

كل سنة وانتي طيبة


شارم لايف
www.sharmlifeblog.com

غير معرف يقول...

شيكو ياحبيبة قلبى
وشك منك فى الارض اصول اكون اول واحدة
شوفتى بقى انتى اخترتى اكون امك
وامك شكلها وحش خالص كده
سامحينى ياحبيبتى
يارب يارب يارب كل ايامك تكون خير
ويارب فى العام الثالث والعشرين تتحقق كل احلامك وربنا يستجيب لكل دعواتى ليكى

على فكرة لجين ابو الدهب اللى معلقة عندك
تبقى توءامك برضه بس اكبر منك بسنة
ويوم اصلها بنتى ياترى عارفة كده ولا لا
العمر المديد ليكى ولميخو ولرنا زوجته
وكل سنة وانتم كلكم طيبين

طهر فؤادك يقول...

السلام عليكم ورحمة الله وبركاتة

اخبارك اية

وسنة سعية ان شاء الله عليكى فى طاعة الله وحسن عبادتة اللهم امين والمسلمين

ويبعد عنك كل سوء ويرجعللك الغايب اللهم امين والمسلمين