السبت، 17 أكتوبر 2009

صوتك ..... أمانة




ياجماعة اعذروني إني ماكنتش بزور ناس كتير وماكنتش متابعة ونادرا لما كنت بعلق على بوستاتكم بس أنا اليومين دول أنا عندي حالة ملل رهيبة مخلياني زهقانة جدا من المدونة لدرجة إني فكرت إني أقفلها شوية كده مش عارفة مالي علشان كده كان فيه موضوع عاوزة أخد رأيكم فيه أنا عاوزة أجدد حبي للمدونة وللكتابة بس نظرا لحالة الفلس الشديد اللي عندي انا قررت أخد رأيكم عاوزين تشوفوا مدونة شوكولاتة إزاي الفترة الجاية دي وتعليقاتكم على البوست ده هي اللي هاتحسسني إن فيه ناس عاوزة المدونة دي وهاتديني دفعة وتخليني أكمل.

في ناس كتير سألوني عن موضوع التنمية البشرية أنا بس عاوزة أوضح إني مش متخصصة في الموضوع ده قوي بس درست فيه شوية وبحب أقرا فيه كتير قوي وفي ناس اقترحوا عليا أنزل دروس تنمية بشرية وشوية مهارات إدارية بشكل منتظم فأنتوا إيه رأيكم؟

وفي ناس طلبوا مني إني أنزل شوية كورسات إنجليش وأفتح المجال للأسئلة وأجاوب عليها.

وممكن أنزل خواطر وأشعار بس الحاجات دي كلها هاتبقى منقولة لأن معنديش الموهبة إني أكتب أشعار أو خواطر.

ياريت ياجماعة كل اللي يدخل المدونة يديني رأيه في المدونة بشكلها الحالي وياريت يعرفني إيه الحاجات اللي هو شايفها حلوة أو وحشة سواء فيا أو في المدونة ويديني اقتراحاته ويفهمني هو عاوز الحاجة دي ليه وأنا أكيد هاخد بأرئكم في الآخر لأن أكيد رأيكم يهمني وياريت كلكم تدعولي قوي اليومين دول لأني محتاجة دعواتكم معايا.


هناك 79 تعليقًا:

غير معرف يقول...

اولا الف سلامه عليكي

ثانيا حلوه حكايه الموارد البشريه او كورسات الانجليش

اما الشعر فممكن لو قصيده عجبتك لواحد من العظماء تنقليها :)


بالنسبه لرأيي في مدونتك ..... فهي جميله وفيها من روحك كتير

تحياتي يا شيكو

ستيتة يقول...

بعد الشر عليكي من الملل يا قمرايا

اديها شيكولاتة تعلي لك السيروتونين على طول
خدي من ابلتك سوتيتة ربنا يخلي كل مصانع الشيكولاتة

وليه تحددي المدونة فتملي ونمل
مرة تنمية بشرية
مرة خواطر جت لك
مرة تصوتي فينا بمكنونات صدرك
ولما تتكلمي في المدونة متحطيش اي قناع
صوتي باللي جواكي وبس ومتحاوليش ابدا ترضي حد

المدونة ما هي الا ورقة بيضاء في اجندة حياتنا وبنطلع عليها ذكرياتنا وخططنا واحلامنا وبعضا من مواهبنا المدفوسة :)

اياك تقفلي
خدي بالك انا كمان بمر بحالة من الأنتخة المصحوبة بملل ونكد داخلي مزدوج
بس على مين
حتى لو موضوع منقول يكون في ميزان حسناتك
اديها ميه تديكي طراوة

تحياتي

صبرني يارب يقول...

اولا انا عايزه حته شيكولاته هاموت عليها من المغرب مش عارفه ليه يا اختي

لا مش باتوحم عيب كده


المهم اكتبي كل الى انتى قلتي عليه ده

ايه المشكله اعملي تبويبات واكتبي كل الى تحبيه

اكتبي تنميه بشريه واشعار وانجلش

صدعينا براحتك عاااااادي
ههههههههههههه

يلا بسرعه

الشعب لابد له من حكومه تشكمه يقول...

يالهوى يالهوى يالهوى,المرض وصلك ياباتعه:(
ياااااااااااادى الخيبه حتى انتى:(

فى ايه اخوانا دا فيرس دا ولا ايه؟:(
وانتى ياهانم اكتبى اللى انتى عاوزاه ,اللى نفسك جيباكى ليه,شوفى عاوزه تتكلمى فى ايه اوتكلمى

Unknown يقول...

اوعى تقفليها
ابعدى عنى احسنلك
لحسن العدوى على رأى شيما
وصلك ولا ايه

اكتبى اللى انتى حساه و عايزاه
بس كدة

بخصوص الكورسات ياريت انجليش
استغلال بقى
ههههههههههههههه

اصل الأخت اللى بتدرسلنا مش كويسة
مقضياها بالمعنى
هههههههههه

ربنا يسعدك و يكرمك
اوعى تقفلى المدونة

و الا حنحرمك من الشيكولاته
:-)

المعتصم يقول...

انا بقى هقولك حاجه
فكرت انى اقفل المدونة كتير جدا
وكل مرة الاقى نفسى متضايق اروح فاتح المدونة واكتب اى كلام فى اى كلام
وممكن اكتب عن الحاجه اللى مضايقانى
وتخيلى بقى الراحه اللى برتاحها بعد مابكتب
انا زيك مش موهوب فى الشعر والخواطر
بس شوفى بوستات الشعر اللى منزلها هتلاقيها اكتر بوستات جه عليها تعليقات على الرغم من انها منقوله
(ابقى شوفى قصيدة الفشحاط دى رهيبه)

ماتحجميش المدونة فى شكل معين
خليكى حره كده
مرة تنقلى موضوع دينى مفيد
ومرة تكتبى عن قضيه معينه وتقولى رأيك فيها (زى مابتعملى كده)
ومرة موضوع عن اخر حدث حاصل على الساحه وشاغل الناس(ومااكترها)
ومرة عن ومرة عن ........الخ
وبالشكل ده مش هتلاحقى على الموضوعات
(بس يعنى بلاش موضوع كل يوم احنا مش قاعدين قصادك انتِ بس)
ههههههههههههههههههههههه
المدونة على فكرة جميلة والله ومش مجامله ده كلام بجد

فكرى فى كلامى كويس
وهتلاقى ان كلامنا انا وكل الناس اللى علقت عندك صح

يلا بقى سلام عشان عندى مدرسه الصبح
تصبحى على خير

موناليزا يقول...

اللى تحسيه اكتبيه وهو يوصل للناس لوحده:)

رحلتنا في الحياة يقول...

ايه ياشوكولاتة بس موضوع الملل والزهق ده معلش ياجميل كلنا بنمر بالمرحلة دى
عارفة انا فضلت فترة كبيرة محتارة اكتب ايه فى مدونتى لغاية ما فى الاخر استقريت انى هكتب اللى بحس بيه باى اسلوب وباى طريقة لانى شايفة ان المدونة فرصة اعبر بيها عن اللى جوايا ولازم اتكلم بصراحة ومن غير خوف علشان اقدر اشعر بتحسن
وانتى شوفى ايه المواضيع اللى بتريحك واكتبى فيها ومش تخافى

اكتبى اى حاجة حتى لو صورة تعبر عن اللى جواكى المهم تكونى فى وسطنا

------ يقول...

لووووووووولووووولى

لى لى لى لى لى

البت شوكولاااته حاطت بوست جدييد

نرووووووح نشوف ونييجى

امووووووووووووه

كدا على السريع واجى

------ يقول...

ملللللللللللللللللل

ليه يابنتى كدا

لا لا
ماانا قولتلك ماتتهبليش زى
خليكى انت العاقلة اللى فينا

بصراحة انا نفسى فى حاجة كدا زى فرفش معانا

اصل المدونات اليومين دول زى مايكون حد ماتلهم اى والله كلها كابه

انا كنت عايزة اقولك على موضوع التنمية البشرية داوكنت عارفة ان هيكون دا ردك

بصى هى مش محتاجة تخصص اصلا
انتى لو عندك موضوع على النت شايفه انه هيفيد
او حاجة كويسة فى كتاب تاخديها تدريج كدا مثلا على مرتين او اكتر
مش معضله

بصى لو هتعملى كورسات انجلش دى
يبقى من وان تو ثرى
اعملى حساب للمبتدئين اللى زى حالاتى
ولكى الاجر والثواب عند الله

مش مشكلة مافيه ناس كتير بتكتب نقل بعد القصيدة
عادى يعنى

انا عاايزة حته شوكولاته لو سمحتى

------ يقول...

بس حلوة اوى حكاية صوتك امانة دى

محسسانى اننا قاعدين فى الحزب الوطنى

ولا فى انتخابات الرياسة هههههههههه

MOHAMMED ELBANNA يقول...

شوكولاتة
مدونتك جميلة
ورأيي انك تحدثيها فعلاً علشان تفتح نفسك وتجذب وتفيد اكبر قدر ممكن من الناس .
وفعلاً التنمية البشرية بتفيد وتجذب عدد كبير من الناس .
وطبعاً لو هتنقلي اي خواطر او اشعار من مكان لازم تذكري المصدر .
ومتنسيش تظبطي الاستايل بتاع المدونة وتضيفي علية اشياء جذابة مفيدة .
لكن اوعي تقفلي المدونة وتتوقفي عن التدوين .
فلن نسمح بذلك .
تقبلي مروري
محمد البنا
طريق النجاح

طهر فؤادك يقول...

السلام عليكم ورحمة الله وبركاتة ,,
ربنا يوفقك ان شاء الله وعاوزك ان شاء الله قوية ... لان كل امر المؤمن خير زى ماعلمن رسولنا الكريم صلى الله علية وسلم :-عجباً لأمر المؤمن، إن أمره كله له خير، وليس ذلك لأحد إلا المؤمن، إن أصابته سراء شكر فكان خيرا له، وإن أصابته ضراء صبر فكان خيرا له. رواه مسلم.
- واكتبى ياستى اى حاجة واحنا هنسعد بيها ان شاء الله وربنا معاكى اللهم امين والمسلمين ..
وشوفى موضوع الجديد الله يكرمك .

مي يقول...

على فكرة دى غلاسة بقى ماليش دعوة
فييييينك يا اختى ايه الرخامة دى يابت
طب متعيطيش هاتى بوسة بهزر معاكى طب هاتى حتة شيكولاتة هههههههههه
مالك يابنتى بس معلش هى حالة وهتعدى كلنا مرينا بيها ولسة معانا هههههههههههه
متقلقيش
بصى موضوعاتك حلوة بجد
حكاية التنمية البشرية دى مش بطالة بس نزلى مثلا كل شهر موضوع عشان انا ماليش فيها اوىههههههههه
يعنى كانك كده بتعملى بوست معين فاهمة
ياريت كمان تحكى عن مواقف مثل شفتيها وتعلقى عليها
ممكن كمان تقولى ازاى نقوى نفسنا فى الانجليش او ايه الكتب اللى نقراها عشان تزيد من ثقافتنا فيه
والف بعد الشر عليكى ياشيكولاتى انا من غيرك علبة فاضية
بحبببببببببببببببببببببك وربنا يزيل الهم عنك يا قمراية
اممممممممممممواه

لا تـــشـــتــــاق يقول...

انا من وجهه نظري مش لازم تكتبي في كل حاجه
حاولى تكتبي في الحاجه الى انتى ناجحه فيها وحاولي تفيدى بيها الى هيدخل يزورك
وربنا يوفقك

شوكولاتة يقول...

فتاة من الصعيد
الله يسلمك ياميرو ياحبيبة قلبي
وشكرا على رأيك الحلو ده وطبعا إنتي عارفة قد إيه رأيك يهمني جدا

شكرا على اقتراحاتك

شوكولاتة يقول...

دكتورة ستوتة
إذن الشوكولاتة هي الحل :)

انا عارفة ان التنويع مهم بس أنا زهقت أصلا من موضوع التدوين محتاجة حاجة ترجعني ليه تاني من أول وجديد

منورة يادكتورة

شوكولاتة يقول...

صبرني يارب
مش عيب يعني ياصبصب ياللا ربنا ينتعك بالسلامة يا أوختشي
هاطلعك عليكي أوشاعة

نيهااههاهاهااااااااااا

بس تصدقي حلوة قوي فكرة التبويبات دي فعلا هاترضي كل الأذواق

سلاموز

شوكولاتة يقول...

شيمو الشعب حبيبي وشرياني
هو المرض متفشي قوي كده طيب معكيش حبايتين تاميفلو يمكن ينفعوا
هع هع هع

حلوة أكتب اللي ييجي على دماغي دي
اكسبريس يور سيلف

أموووووووووووووووه

شوكولاتة يقول...

بدراوي
يالهوي هو الموضوع ممكن يوصل اني هاتحرم من الشوكولاتة لأ ماينفعش اقطعوا عني الميه الهوا تصريحات بطرس غالي بس الشوكولاتة لأ
هههههههههه

طيب لما حضرتك عارف ان المرض معدي بتجيلي ليه بس وطالما مش عاوزني اقفل مدونتي افتح مدونتك كفاية كده

يعني من رأيك اقضيها كورسات أنجليش ماشي ياعم المستغل حاضر

شكرا أستاذ احمد

شوكولاتة يقول...

المعتصم
شكرا أستاذ مصطفى على النصيحة دي وهاحاول أطبقها وناس كتير فعلا نصحتني اني ماحطش نفسي في قالب معين
بس على فكرة أنا أنزل بوستات كل يوم ولازم تيجي تقرا انتو وراكم حد غيري
نيهاهاهااااااااااااا

حلوة عندي مدرسة الصبح دي طيب حضرت الشنطة ولا لأ

شوكولاتة يقول...

موني
جبتي المفيد والله بس المشكلة إن أنا ببقى حاسه بحاجات كتير قوي بس مش عارفة اطلعها واعبر عنها

تسلمي ياقمر

شوكولاتة يقول...

آيوشة
أنا فعلا ملاحظة إنك في الفترة الأخيرة أسلوب كتاباتك اتغير تماما وممكن يكون بقى أحسن من الأول بس أنا لسه ماوصلتش لأحسن طريقة أوصل بيها اللي جوايا

شكرا ياقمر على رأيك الجميل ده

شوكولاتة يقول...

دموع القمر
طبعا ندمتي على الزغروتين بعد مالاقتيه موضوع كئيييييييييب
معلش بوجع دماغكم معايا بحبكم بقى أعمل إيه

أمووووووووووه

شوكولاتة يقول...

دموع القمر
لأ ياحبيبتي العين صابتني خلاص بعد ماكنت شمعة منورة بقيت لمبة جاز محروقة ومملة جدا في كلامي
وياقمر انت تؤمر ده أنا اعملك كورسات انجليش من الاندر زيرو

بحبك ياقمرايا

شوكولاتة يقول...

دموع القمر
وطبعا نتيجة التصويت لحد دلوقتي 99.99 %
نيهاهاااااااااااااا

آه صح نسيت أقولك مبروك على النيو لوك

شوكولاتة يقول...

محمد البنا
اكيد رأي حضرتك يهمني جدا بس ياريت توضحلي اكتر شكل التغييرات اللي ممكن أضيفها للمدونة

تحياتي

شوكولاتة يقول...

طهر فؤادك
أشكرك على تذكيري بهذا الحديث
أنا فعلا قريت الموضوع عندك وإن شاء الله هاجهز بوست قريب

تحياتي

شوكولاتة يقول...

مي
إيه يابت البواخة دي
نيهاااااااااااا
واحدة بواحدة بقى هع هع هع
وأدي ياستي البوسة أموووووووووووه

إنتي جايز مش بتحبي مواد التنمية البشرية علشان مادرستيهاش أو ماحستيش إهميتها بشكل عملي
بس أنا وراكي لحد ماتقولي اديني الحقنة بسرعة أرجوك محتاجة الجرعة

بحبك ياميويتي

شوكولاتة يقول...

لاتشتاق
أنا بحاول أعمل كده بس في نفس الوقت بحاول أرضي جميع الأذواق

مودتي

Me7'o يقول...

شوكولاتة

أختى حبيبتى

زهقانة يا حبى

يبقى أكيد التلاجة فاضية

ههههههههههههههه

أنا عارفك

بقولك إيه يا روقة

إتكلمى عن موضوع الجواز واشتراطات الأبهات والحاجات اللى إنتى بتيجى تحكيهالى دى
وأتكلمى كمان عن شلة الألاطيش والبنات المجانين زمايلك

إنتى بتموتينى من الضحك عليهم

بس أبوس إيدك بلاش إنتى تضحكى

ههههههههه

سلام يا اخوتشى

حـــــــــــب الملائكه يقول...

السلام عليكم
عودة الجزااااااار للملاعب
اممممممممم
انا اول مرة اجى هنا اه صح
طب مش هاعلق
هاقولك مدونتك جميلة جدا والاسم ممتاز والصور دى جوعتنى والله

غير معرف يقول...

بسم الله الرحمن الرحيم

السلام عليكم

أنا جديد في عالم التدوين

دي مذكراتي بأكتبها بعد معاناة طويلة مع العادة السرية ,, المرة دي بجد نفسي أبدأ حياة جديدة ,, ربنا يثبتني

خطر على بالي إن دي تكون فكرة مدونتي , إني اشارككم أفكاري وذكرياتي , علشان الاقي حد يقويني ويشجعني , وكمان علشان اللي لسة هايبدأ يغرق في البحر اللي أنا غرقان فيه يلحق نفسه قبل فوات الأوان

أتمنى انكم تقبلوني وسطكم في عالم التدوين

Pink Dreams يقول...

حبيبه قلبى

تصدقى انا كمان نفس الحكايه دماغى فضيت خالص بعد الدراسه

خصوصا كمان ان انا مشغوله بيها شويه

بس ممكن حبيبتى تشوفى مثلا ايه المشاكل اللى انتى شايفاها فى مجتمعك وعاوزه تناقشيها

او مشاكل الشباب

او حتى موضوع شدك وانتى على النت تنقليه وفى الاخر تقولى رايك وتقومى كاتبه المصدر اللى جبتى منه المعلومه

تحياتى لاحلى شيكولاتايه

طوبه فضه وطوبه دهب يقول...

على فكره المدونه كدا تحفه واجمل مافيها وجودك ورئى حاولى فعلا تاخدى كورسات وتجددى من نفسك باستمرار والاغنيه تحفه فعلا ربنا يكرمك وتحققى كل اللى تتمنيه ياقمر

شوكولاتة يقول...

ميخو حليب هارتي السكرة
هههههههههههههههههه
ماشي ياميخو بتسيحلي في قلب المنتيئة
يابني ده انا عندكم من زمان وبعدين ده انت عشرة ياراجل عشرة 21 سنة تهون عليكي وتقوم مسيحلي كده ماشي ياحبي أنا هفوتهالك علشان انت بس وحشتني

وحشتني موت ياسكرة انت

شوكولاتة يقول...

حب الملايكة
طيب أقوم أجيب عدة الشغل يامعلمي هانشفي مين النهاردة
نيهااااااااااا

شكرا على رأيك في مدونتي وشرفتني بالزيارة

شوكولاتة يقول...

مذكرات تائب

أستاذي التائب أولا الحمد لله إن ربنا عافاك وهداك وأكيد طبعا نرحب بيك في عالم التدوين بس أنا شايفة إنك ماينفعش إنك تتفتح مدونة للكلام عن حاجة زي دي عملا بقول رسول الله " إذا بليتم فاستتروا" فلو حبيت تتكلم عن الموضوع ماشي بس ياريت ماتديهوش أكبر من حجمه لأن المدونات ليها هدف أكبر واعتبر اللي فات من حياتك صفحة واتقفلت خلاص

ثانيا ياريت تغير الاسم بتاع حضرتك لأنه اسم قد يراه الكثير غير لائق وخاصة في مدونة فتاه فياريت تغيره خليه مثلا يوميات تائب إلى الله ودي أول قاعدة في التدوين احترام مشاعر الآخرين وعدم ذكر أي كلمات خارجة أو لها أي إيحاءات خارجة وده المفتاح للاستمرار في عالم التدوين
ولما فضح السر وقد تاب الله عليك يعني خلاص الحمد لله ربنا تاب عليك مش لازم تقول انا عملت كذا وكذا وصدقني اللي عاوز يعمل حاجة غلط هايعملها ولو على باب جهنم والعكس صحيح تماما فلابد أن يكون لمدونتك هدف أسمى وأرقى من ذلك

تقبل نقدي لأنه في مصلحتك في المقام الأول وتحياتي

شوكولاتة يقول...

شوشو البمبي
شكرا ياجميلة على رأيك وأنتي عارفة انه بيهمني جدا

منورة ياحتة جاتوه

شوكولاتة يقول...

طوبة دهب
ميرسي قوي ياقمر على رأيك الرائع ده في مدونتي وصدقيني كلماتكم الرقيقة دي هي اللي هاتخليني أكمل معاكم وأعرفكم أكتر

منورة

romansy يقول...

ربنا يوفقك يا شيكو
تعرفى شوفى ايه اللى بيخطر على بالك واعمليه
التنميه البشريه مطلوبه وكمان كورسات الانجليش
بس بقى المهم فى كل دا هو احساسك انتى ومشاعرك انتى

حـــــروف متــبعترة " عــمرو الشــايب يقول...

شوكلاتة احب اقوللك ان اولا مراحب يا مراحب بعودتك و ياريت مش تنسي مدونتك بعد كدة

انا عاوز اشوف المدونة متنوزعة تكتبي فيها كل حاجة

كل الى تحسية مش لازم يكون ليها نمط معين يالا مستنيكي

شوكولاتة يقول...

رومنسي
اهم حاجة فعلا إن الواحد يعبر عن مشاعره بس أحيانا مابيعرفش يحدد هو حاسس بإيه أو يعبر إزاي

شكرا جدا لرأيك
تحياتي

شوكولاتة يقول...

عمرو وائل
الله يخليك يا استاذ عمرو أنا كنت حاسه أن فيه حاجةة نقصاني
وإن شاء الله أنزلكم بوستات حلوة قريب قوي

تحياتي

الحــ ــزين يقول...

الحــ ــزين
ربنا يبعد عنك الزهق يارب
وتكونى ديما بخير

همسة ايمان يقول...

انا جايه بس عشان اكسب شيكولاته اكتر

هههههه على فكرة فكرتينى بنفسى جاتلى

فترة كنت زهقت ومليت من المدونة بس والله

انا شايفة مدونتك جميله ةخليكى على نفس اسلوبك

ونوعى دايما ومجال التنميه البشريه

جميل اوووووى ياريت تفيدينا فيه

تقبـــــ مرورى واحترامى ــــلى

جمهورية شومبونجو العربية يقول...

السلام عليكم

ليييييية كدة

اوعى تقفليها

انتى كدة هتعملى انقلاب فى شومبونجو
وبعدين مش هاعرف اسيطر عليهم

دول حالفين يعملو موظهرات لو اقفلتيها
وبعدين انتى كدة هتزعيتى منك

دة انا بحب الشوكولاتة والشعب كلو بيحبها دول حتا شبها


هاتى بقا شوكولاتة علشان مزعلش


.....
رئيس الشوكولاتية
يوووووة
الجمهورية

شوكولاتة يقول...

الحزين
من هنا لحد بعد بكره لحسن المرض اتمكن مني
بس أن شاء الله هاخد قرصين مضاد حيوي وأرجعلكم على طول

تحياتي

شوكولاتة يقول...

همسة إيمان
ميري ليكي ياآلاء على كلامك الرقيق ده عن مدونتي وشرفتني جدا زيارتك
بس ياريت تعرفيني اتخلصتي من الحالة دي ازاي

يارب دايما متواصلين

شوكولاتة يقول...

شومبونجو

طيب ارشيني بقى بعلبتين شوكولاتة علشان ماقلبش الشعب عليك

ههههههههههههههههه

تحياتي ياريس

Unknown يقول...

تحياتي على تلك المدونة
ونرجو ان يكون بها جزء نستفيد منه
فعلا ربنا يتقبل مناو منكم

وأدعوك لزيارة مدونتي

ويبقى التواصل

ليس فقيرا من يحب يقول...

السلام عليكم

شوكلااااااااااااااااااااااااتى

ليس فقيرا من يحب يقول...

اودى وشى فين انا دلوقتى

كل ده تأخير يا سااااااااااااتر

ليس فقيرا من يحب يقول...

سماح بقه يا شوكلاااااااااااااااااااتى

(وش مكسوف)

ليس فقيرا من يحب يقول...

وبعدين اياكى والملل دا احساس

غبى قوى ياختى حتى الملل مليت منه

هههههههههههههههههههههههههههههه

ليس فقيرا من يحب يقول...

بصى اكتبى فى اى حاجه نفسك تكتبى

فيها اى شعور جواكى او صرخه نفسك

تكتبيها اكتبى حاجه مستك

خلي المدونه منوعه اعتبرى مدونتك

استراحه من قرف الدنيا

ليس فقيرا من يحب يقول...

انا هامشى بقى

اقعدى بالعافيه يا سكريه

امووووووووووووووووووووووووووووووواه

أميرة علي كوكب مهجور يقول...

يعني انا اغيب يومين ارجع الاقيكي كده لااااااااااااا و الف لااااااااا ع رائ ننوسه عجرم افتح قلبك افرح :) و كل شوكولاته كمان :)


انا مواقفة جدا ع التنمية البشرية و ياربت يا شوشو لو في حاجة عن كيفيه التعامل مع الناس النداله قليله الاصل دي نعملها ازاي :)

وانا من مكاني القابع في الكوكو المهجور اوجه ليكي رساله لا دموع بعد اليوم و فرفشي كده مفيش حاجة تستاهل و عم قول يارب :)

micheal يقول...

مش حقولك غير اكتبي اللي يجي في بالك أو اللي تحسي أنك عاوزة تخرجيه من جواكي وأنا حتابع في كل الأحوال
ليكي عندي هدية في البلوج
ألبون جديد
:))

غير معرف يقول...

امممم
تعرفي انني بعشق الشيكولاته ؟
اممممم
الشيكولاته دي كانت هتنسيني انا عايزه اقول ايه ..

اه
افتكرت ،
لو هنقفل مدوناتنا يبقي عملناها ليه من الاول !؟؟

لا
متقفليهاش ..
بالنسبه لشكل المدونه .. فـ بالنسبالي عايزه اشوفها زي ما انتي عاوزاها .. اهم حاجه تكون حاسه اللي هتكتبيه فيها اوي عشان تقدري توصليه اوي .. اوي :)

تحياتي

رابطة هويتي اسلامية يقول...

وكما وعدناكم بأن تستمر حملتنا وتأتي بكل جديد

ضيف حوارنا هذه الرسالة :::

الأستاذ معتز شاهين - باحث تربوي

صاحب مدونة إحنا وهما

وهي مدونة تهتم بالإستشارات التربوية

نتمني منكم المشاركة معنا في الحوار لمزيد من الإستفادة ولمزيد من الإفادة

مع تحياتنا

أسرة رابطة هويتي إسلامية

غير معرف يقول...

كيفك يا احلى بنوتة يارب تكوني بالف خير

وحشاني اوووووي وعارفة اني مقصرة معك بس نعمل ايه بحالة الملل الي بتيجي كل شوية

ميهمكيش ياقلبي حالة الملل بتيجي وتروح وهترجعي زي الفل

انا بحب مدونتك اووي ورايي بلاش تخليها متخصصة بشي معين

خليها شاملة كل شي تحبي تنزليه نزليه عادي على حسب مزاجك

يعني خدي راحتك عالاخر البيت بيتك ^ـ*

تحياتي ياقمر

Me7'o يقول...

فينك يا شوكولاتة

إرجعى يا بت
التدوين ناقصه شوكولاته

والله لو ما رجعتى لأسيحلك فى وسط المدونين

شوكولاتة يقول...

معتز شاهين
شكرا جدا على رأي حضرتك في المدونة المتواضعة دي وشكرا على الزيارة

تحياتي

شوكولاتة يقول...

ليس فقيرا من يحب

والله ياروني أنتي اتجننتي رسمي يابنتي مية تعليق إيه هي مدونة من غير بلوجر ولا إيه
ههههههههههههههه

شوكولاتة يقول...

ليس فقيرا من يحب

تكونيش طمعانة في الشكاليطة
لااااااااااا ماتحاوليش

شوكولاتة يقول...

ليس فقيرا من يحب

إن شاء الله المدونة في شكلها الجديد هتعبر عن شوكولاتة الحقيقية وهاكتب فيها من غير خوف بس بحذر أكتر

أموووووووووووووه

شوكولاتة يقول...

أميرة على كوكو مهجور
وأنتي كنتي غايبة ليه بقا يا هانم يكونش صاحب الكوكو رفع الإيجار وعاوز يطردك
هههههههههههههههه

حاضر ياست جونسون اند جونسون لادموع بعد اليوم

سلاموز

شوكولاتة يقول...

مايكل
متشكرة جدا يا أستاذ مايكل على النصيحة والهدية

تحياتي

شوكولاتة يقول...

هاجر زعبل
أولا منورة البلوج يا جوجو
وبكده انتي انضميتي لرابطة مهاوييس الشوكولاتة المتحدين

كلمتك عجبتني قوي على فكرة لما بتقوليلي عملنا مدوناتنا ليه من الأول
حسيت إن هدف مدونتي ضاع فعلا
شكرا جدا على نصيحتك ليه

يبقى التواصل

شوكولاتة يقول...

رابطة هويتي اسلامية
أشكركم جدا على هذا المجهود الرائع في نقل خلاصة هؤلاء لنا

تحياتي

شوكولاتة يقول...

نوارة
ياستي ولاتقصير ولا حاجة ماتعتذريش أنا متأكده ان كان فيه حاجة بعداكي عن المدونة بس يارب تكون خير وربنا يسعدك يارب

تحياتي

شوكولاتة يقول...

ميخو حليب هارتي السكرة
يالهوي كفاية تسييح يابني انت ايه مابترحمش امال لو مكنتش من لحمك ودمك كنت عملت فيه اييه

وحشتني يا اخويا ياحبيبي

donya يقول...

مساء الخير

اول زياره
ومن اولها هديكي نصيحه

كوني انتي ماتكتبيش ولاتمليش اللي انت عيزاه وحساه
ماترضيش الا ربك وضميرك وبس
وبالتالي هتنعمي بالراحه والرضا عن كل اعمالك


*تحياتي

غير معرف يقول...

بنتى الغالية شيكولاتة
وحشنى خالص ولم يمنعنى عنك غير ظروفى
قريت تعليق ليكى وكان ليكى 3 اسئلة
اولا انا الحمد لله بخير وبمر بظروف صعبة مع المرض لكن الحمد لله على كل شىء
ثانيا للاسف لااعرف شىء عن ديالا ولو عرفتى
ياريت تطمنينى ويمكن الشغل شغلها
ثالثا وده الاهم انا دعيت كثير بس عاوزة اطمن عملتى ايه ولو عاوزاة ايميلى ابعتهولك علشان تشرحى لى اكثر
تحياتى ودعواتك يااجمل شيكولاته

طهر فؤادك يقول...

السلام عليكم ورحمة الله وبركاتة ,,

اخبارك اية

والف سلامة عليكى ولا تيأسى ابدا من رحمة الله ولا من ضيق ولا من هم لان كل امر المؤمن خير وانتى الحمد الله خيرة وساعدتينا فى حملات لنصرة الاطفال والاقصى وفكرينك بالخير دايما وربنا يوفقك يارب ويبع عنك كل هم وحززن وغم ان شاء الله

اخوكى فى الله

شوكولاتة يقول...

دنيا

شكرا جدا على نصيحتك الغالية في أول زيارة لمدونتي ويارب متكونش الأخيرة لأنها أسعدتني جدا

ويبقى التواصل

شوكولاتة يقول...

أم مالك
ألف حمد وشكر إن حضرتك رجعتي بالسلامة وربنا مايغيبك عنا تاني أبدا ويارب تكوني في احسن صحة وحال

وشكرا جدا لأن حضرتك دعتيلي ودعاكي الحمد لله جاب نتيجة مذهلة الحمد لله ربنا راضي عني
واكيد نفسي أخد إيميلك علشان أحكيلك بالتفصيل

تحياتي

شوكولاتة يقول...

طهر فؤادك

أشكرك جدا لأهتمام حضرتك بالمدونة وربنا يزيح عنا وعنكم الهم والغم

تحياتي